Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Juan 3:1-36

3  Oĩ vaʼekue peteĩ fariséo* hérava Nicodemo, haʼe ningo hudiokuéra mburuvicha.  Haʼe ou Jesús rendápe pyharekue ha heʼi: “Mboʼehára*, avave ningo ndaikatumoʼãi ojapo koʼã milágro nde rejapóva, Ñandejára noĩriramo hendive, upévare roikuaa nde haʼeha peteĩ mboʼehára rejúva Ñandejáragui”.  Jesús ombohovái: “Añetehápe haʼe ndéve: Peteĩ onase jeýva añoite ikatúta ohecha Ñandejára Rréino”.  Nicodemo heʼi: “¿Mbaʼéicha piko peteĩ kuimbaʼe itujámava onase jeýta? Ndaikatumoʼãingo oike isy retepýpe ha onase jey, ¿ajépa?”.  Jesús ombohovái: “Añetehápe haʼe ndéve: Pe nonaséiva y ha espíritugui ndaikatumoʼãi oike Ñandejára Rréinope.  Yvypóragui onaséva yvypóra hína, ha espíritugui onaséva espíritu hína.  Ani rehecharamo ko haʼéva ndéve: Peẽ penase jey vaʼerã.  Pe yvytu oipeju oipejuseha gotyo, nde rehendu hyapu, péro ndereikuaái moõguipa ou ni moõpa oho. Péicha avei entéro umi onaséva espíritugui”.  Upévo Nicodemo ombohovái: “¿Mbaʼéicha piko oikóta koʼã mbaʼe?”. 10  Jesús ombohovái chupe: “Nde ningo mboʼehára Israélpe, ¿mbaʼére piko upéicharõ ndereikuaái koʼã mbaʼe? 11  Añetehápe haʼe ndéve: Romombeʼu upe roikuaáva ha umi mbaʼe rohecháva roikuaauka, péro peẽ ndapegueroviái ore roʼéva. 12  Añeʼẽ ningo peẽme umi mbaʼe oikóvare ko yvy ape ári ha ndapegueroviái, ¿mbaʼéicha piko upéicharõ pegueroviáta amombeʼúramo peẽme umi mbaʼe oikóva yvágape? 13  Ni peteĩ yvypóra ndojupíri yvágape, síno pe oguejy vaʼekue yvágagui, pe Yvypóra Raʼy*. 14  Ha Moisés ohupi haguéicha pe mbói pe desiértope, upéicha avei ojehupíta pe Yvypóra Raʼýpe, 15  ikatu hag̃uáicha opavave ogueroviáva chupe ohupyty jeikove opaveʼỹva. 16  ”Ñandejára ohayhuetereígui pe múndo* omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva. 17  Ñandejára nomboúi Itaʼýra ohusga hag̃ua pe múndope, síno pe múndo ojesalva hag̃ua haʼe rupive. 18  Pe ojeroviáva hese ndojehusgamoʼãi. Pe ojeroviaʼỹva katu ojehusgáma ndojeroviáigui Ñandejára Raʼy peteĩetéva rérare. 19  Pe mbaʼerendy ou ko múndope, péro umi kuimbaʼe hembiapo vai rupi ohayhu pytũmby ohayhu rangue pe mbaʼerendy. Upévare ojehusga chupekuéra. 20  Pe hembiapo vaíva ndaijaʼéi pe mbaʼerendýre ha nosẽi hesakãháme ani hag̃ua ojekuaa hembiapokue. 21  Péro pe ojapóva iporãva ou hesakãháme, ojekuaa hag̃ua umi hembiapo ojejapoha Ñandejára oipotaháicha”. 22  Oiko rire koʼã mbaʼe, Jesús ha idisipulokuéra* oho umi kampáña oĩvare Judéape, upépe opyta hikuái peteĩ tiémpore ha oporovautisa*. 23  Péro Juan avei oporovautisa Enón, Salim ypýpe, upépe oĩgui heta y. Umi hénte ou meme ha ojevautisa, 24  upérõ ningo Juan neʼĩra ojegueraha kárselpe. 25  Upéi Juan disipulokuéra oñepyrũ odiskuti peteĩ hudíope mbaʼéichapa ikatu yvypóra ipotĩ Ñandejára renondépe. 26  Upémarõ oho hikuái Juan rendápe ha heʼi chupe: “Mboʼehára, ¿nemanduʼápa pe kuimbaʼe reñeʼẽ hague ha oĩva kuri nendive jahasávo rrío Jordán pe ótro ládo? Oime oporovautisa hína ha umi hénte ohopa hendápe”. 27  Juan ombohovái: “Peteĩ kuimbaʼe ndaikatúi orresivi mbaʼevete, noñemeʼẽiramo chupe yvágagui. 28  Peẽ voi pehendu che haʼe hague: Che ndahaʼéi hína pe Cristo*, péro añembou henonderã. 29  Pe omendáva pe nóviare, haʼe pe nóvio. Pe nóvio amígo katu oñemboʼy ijykére ha ovyʼaiterei ohendúvo pe nóvio oñeʼẽha. Upévare che avyʼaiterei. 30  Añete haʼe peẽme, koʼẽ koʼẽre hetavéta umi omoirũva Crístope, péro chehegui katu saʼivéta ohóvo”. 31  Pe oúva yvatégui tuichave enterove umi ótrogui. Pe yvy arigua katu yvy ariguánte ha oñeʼẽ umi mbaʼe ko yvy arigua rehe. Pe yvágagui oúva tuichaiteve enterovégui. 32  Haʼe omombeʼu upe ohecha ha ohendu vaʼekue, péro ni peteĩ kuimbaʼe ndogueroviái chupe. 33  Pe ogueroviáva haʼe heʼíva, ohechauka porã* Ñandejára ndaijapuiha. 34  Pe Cristo oikuaauka Ñandejára ñeʼẽ, Ñandejára ipojerágui omeʼẽvo espíritu sánto*. 35  Pe Túva ohayhu pe Taʼýrape ha omoĩ opa mbaʼe ipoguýpe. 36  Ojeroviáva pe Taʼýrare ohupytýta jeikove opaveʼỹva, pe naiñeʼẽrendúiva pe Taʼýrape katu ndohupytymoʼãi jeikove opaveʼỹva, ha Ñandejára pochy rendy opytáta hiʼári.

Nóta

Ehecha “Fariséo”, diksionário oĩva ko Bíbliape.
Térã: “Rabí”.
Ehecha “Yvypóra Raʼy”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Vautísmo”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “omoĩ hese iséllo”.
Ehecha “Espíritu Sánto”, diksionário oĩva ko Bíbliape.