Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Juan 21:1-25

21  Upe rire Jesús ojechauka jey idisipulokuérape* mar de Tiberíades ypýpe. Ha upéva oiko vaʼekue péicha:  Upérõ oĩ oñondive Simón Pedro ha Tomás ojeheróva Gemelo, Natanael, haʼe hína Canagua oĩva Galiléape, oĩ avei Zebedeo raʼykuéra ha ótro mokõi idisípulo.  Simón Pedro heʼi chupekuéra: “Aháta peskádape”. Haʼekuéra heʼi: “Rohóta nendive”. Ha osẽ ojupi hikuái pe kanóape, péro upe pyharépe noguenohẽi mbaʼevete.  Upéi, koʼẽmbotávoma Jesús oñemboʼy hína pe mar rembeʼýpe, péro umi idisípulo ndopillái haʼeha Jesús.  Upémarõ Jesús heʼi: “Che irũnguéra, ¿perekóma piko peʼu vaʼerã?”. Haʼekuéra ombohovái: “¡Nahániri!”.  Haʼe heʼi chupekuéra: “Peitýna pende rred pe kanóa derécha gotyo ha penohẽta”. Ha oity hikuái, péro ndaikatuvéima oguenohẽ hetaitereígui umi pira.  Upévo pe disípulo Jesús ohayhúva heʼi Pédrope: “¡Péva ñande Ruvicha hína!”. Simón Pedro ohendúvo haʼeha Jesús omonde ijao joʼaha oĩgui opívo, ha ojepoi pe ýpe.  Haʼekuéra namombyrýi oĩ pe kóstagui, noventa métrorupinte, upévare umi ótro disípulo oúnte pe kanoaʼípe ha oitira oúvo pe rred henyhẽtéva pirágui.  Péro haʼekuéra oguejývo pe kanóagui, ojuhu tatapỹi ári pira ha pan. 10  Jesús heʼi chupekuéra: “Pegueru umi pira penohẽ ramóvagui”. 11  Simón Pedro ojupi jey pe kanóape, onohẽ pe rred ýgui ha otopa oĩha pype ciento cincuenta y tres pira tuicháva. Péro hetaitereíramo jepe, pe rred ndosorói. 12  Jesús heʼi chupekuéra: “Peju perambosa”. Ni peteĩva umi idisípulo noñanimái oporandu chupe: “¿Nde piko máva?”, oikuaámagui hikuái haʼeha Jesús. 13  Jesús katu oñemboja, ojagarra pe pan, omeʼẽ chupekuéra ha péicha avei pe pira. 14  Upérõ tres veseháma Jesús ojechauka idisipulokuérape, oñemopuʼã rire omanóva apytégui. 15  Orambosapa rire hikuái, Jesús heʼi Simón Pédrope: “Simón Juan raʼy, ¿ndépa cherayhuve koʼã mbaʼégui?”. Haʼe heʼi: “Si che Ruvicha, nde reikuaa rohayhuha”. Jesús heʼi: “Emongaru umi che ovecharaʼýpe”. 16  Upéi dos veseha Jesús oporandu jey: “Simón Juan raʼy, ¿cherayhu piko?”. Haʼe heʼi: “Si che Ruvicha, nde reikuaa rohayhuha”. Jesús heʼi: “Eñangareko che ovecha mimíre peteĩ ovecharerekuáicha”. 17  Haʼe oporandu jey chupe tres veseha: “Simón Juan raʼy, ¿cherayhu piko?”. Pedro oñeñandu vaieterei oporandu haguére chupe tres vése voi: “¿Cherayhu piko?”. Upémarõ heʼi Jesúspe: “Che Ruvicha, ndéngo reikuaa opa mbaʼe, reikuaa porã ningo che rohayhuha”. Jesús heʼi chupe: “Emongaru umi che ovecha mimi. 18  Añetehápe haʼe ndéve: Nemitãvérõ guare, neaño reñemonde ha reho rehosehápe. Péro ág̃a ndetuja vove reipysóta nde jyva ha ótro nemondéta ha ndegueraháta rehoseʼỹháme”. 19  Péicha Jesús oikuaauka mbaʼéichapa Pedro omanóta ha ombotuicháta Ñandejárape. Ha upévo heʼi chupe: “Ndékena akóinte chemoirũ”. 20  Ojerévo Pedro ohecha pe disípulo Jesús ohayhuetéva ouha hapykuéri. Haʼe hína pe oguapy vaʼekue Jesús ykére pe séna aja, upéi oñemboja hese ha oporandu: “Che Ruvicha, ¿mávapa upe netraisionátava?”. 21  Upévare omañávo hese, Pedro oporandu Jesúspe: “Che Ruvicha, ¿mbaʼe piko ojapóta kóva?”. 22  Jesús ombohovái chupe: “Che aipotáramo haʼe opyta aju peve, ¿piko mbaʼe ndéve upéva? Ndékena akóinte chemoirũ”. 23  Upévare umi ermáno apytépe ojeʼe upe disípulo nomanomoʼãiha. Péro Jesús ndeʼíri nomanomoʼãiha, haʼéngo heʼínte: “Che aipotáramo haʼe opyta aju peve, ¿piko mbaʼe ndéve upéva?”. 24  Kóva hína pe disípulo omombeʼu ha ohaíva koʼã mbaʼe, ha jaikuaa añeteha upe haʼe omombeʼúva. 25  Añetehápe, oĩ hetave mbaʼe Jesús ojapo vaʼekue, péro peichahágui ojehaipátaramo umíva, chéverõ g̃uarã ko múndope* ndaijapamoʼãi umi kuatiañeʼẽ.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Múndo”, diksionário oĩva ko Bíbliape.