Ehecha oĩva pype

Ehecha oĩva pype

Juan 2:1-25

2  Upéi, dos día haguépe oiko peteĩ kasamiénto Caná oĩva Galiléape, ha Jesús sy oĩ upépe.  Upe kasamiéntope oñeinvita avei Jesús ha idisipulokuérape*.  Opapotávo pe víno, isy ou heʼi Jesúspe: “Opángo chuguikuéra la víno”.  Péro Jesús heʼi chupe: “¿Mbaʼére piko che ajepyʼapýta upévare? Neʼĩra gueteri og̃uahẽ che óra”.  Isy heʼi umi oservívape: “Pejapo opa mbaʼe heʼíva peẽme”.  Upépe oĩ seis kambuchi ojejapo vaʼekue itágui, umi hénte oiporu jepi koʼãva oñemopotĩ hag̃ua hudiokuéra léi heʼiháicha. Káda kambuchípe ija cuarenta y cuatro térã sesenta y seis lítrorupi.  Jesús heʼi chupekuéra: “Pemyenyhẽ ýgui umi kambuchi”. Ha omyenyhẽte hikuái.  Upéi heʼi: “Koʼág̃a peguenohẽ michĩmi ha pegueraha pe kasamiénto omoakãvape”. Ha haʼekuéra ogueraha.  Pe kasamiénto omoakãva otantea pe víno oiko vaʼekue ýgui, péro haʼe ndoikuaái moõguipa osẽ, umi tembiguái katu oikuaa, haʼekuéra voi onohẽgui pe y. Upévo pe kasamiénto omoakãva ohenói pe nóviope, 10  ha heʼi chupe: “Oimeraẽ ótro kuimbaʼe ningo omoĩ raẽ pe víno iporãva ha umi hénte okaʼu rire, omoĩ pe ivaivéva. Upéva rangue katu nde reservi pe víno iporãva koʼág̃a”. 11  Jesús ojapo ko mbaʼe Caná oĩva Galiléape, péicha oñepyrũ ojapo umi milágro ha ohechauka hekomimbipa, ha idisipulokuéra ojerovia hese. 12  Upe rire Jesús, isy, umi iñermáno ha idisipulokuéra oguejy Capernáumpe, péro ndahiʼaréi upépe. 13  Upérõ hiʼag̃uíma umi hudiokuéra Páskua* ha Jesús ojupi Jerusalénpe. 14  Ha otopa pe témplope umi ovendéva vaka, ovecha, palóma ha umi kambísta oguapýva hína. 15  Upémarõ haʼe ojapo peteĩ harreadór piólagui ha omosẽ chupekuéra pe témplogui, umi ovecha ha vakakuéra reheve, avei oipetepa yvýre umi kambistakuéra mesa ha omosarambipa imonedakuéra. 16  Ha heʼi umi palóma vendehápe: “¡Peipeʼa koʼã mbaʼe koʼágui! ¡Che Ru róga ndahaʼéi merkádo!”. 17  Upévo idisipulokuéra imanduʼa pe ojehaívare Ñandejára Ñeʼẽme: “Nde róga ahayhuetereígui tatáicha okaru cherehe”. 18  Umi hudío katu ombohovái chupe: “¡Ejapóna peteĩ milágro rehechauka hag̃ua Ñandejára omeʼẽha ndéve autorida rejapo hag̃ua koʼã mbaʼe!”. 19  Jesús ombohovái chupekuéra: “Peitýna ko témplo ha che amopuʼã jeýta tres díape”. 20  Upévo umi hudío heʼi: “Ko témplo ningo oñemopuʼã kuri cuarenta y seis áñope, ¿ha piko nde remopuʼãta tres díapente?”. 21  Péro Jesús heʼívo témplo oñeʼẽ hína hetére. 22  Upéi Jesúspe oñemopuʼã rire omanóva apytégui, idisipulokuéra imanduʼa haʼe heʼími hague ko mbaʼe. Ha haʼekuéra oguerovia Ñandejára Ñeʼẽ ha Jesús heʼi vaʼekue. 23  Upéicharõ jepe, oĩrõ guare Jerusalénpe Paskuarã, oĩ vaʼekue heta ojeroviáva hérare ohechávo umi milágro ojapóva. 24  Péro Jesús ndojeroviapái hesekuéra oikuaágui enterovépe, 25  haʼe oikuaa yvypóra pyʼapy, upévare natekotevẽi avave heʼi chupe mbaʼeve avavére.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Páskua”, diksionário oĩva ko Bíbliape.