Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Juan 19:1-42

19  Upévo Pilato ojagarra Jesúspe ha ombyepoti chupe harreadórpe.  Ha umi soldádo ojapo peteĩ koróna ñuatĩgui, omoĩ chupe iñakãre ha omonde hese peteĩ ao joʼaha pytãhũ.  Ha oñepyrũ oñemboja hendápe ha heʼi: “¡Mbaʼéichapa hudiokuéra Rréi!”, avei ohovapete chupe hikuái.  Pilato katu osẽ jey okápe ha heʼi chupekuéra: “¡Pemañami! Agueru peẽme okápe peikuaa hag̃ua ndajuhuiha hese mbaʼeve ivaíva”.  Upémarõ Jesús osẽ okápe, oreko iñakãre pe koróna ojejapóva ñuatĩgui, ha pe ao joʼaha pytãhũva. Pilato heʼi umi héntepe: “¡Péina! ¡Ko kuimbaʼe!”.  Péro umi saserdóte ruvichakuéra* ha umi guárdia ohechávo Jesúspe oñepyrũ osapukái: “¡Ejuka chupe*! ¡Ejuka chupe!”. Pilato katu heʼi chupekuéra: “Pejagarra upéicharõ peẽ voi pemosaingo chupe yvyráre. Che ndajuhúi hese mbaʼeve ivaíva”.  Umi hudío ombohovái: “Ore roguereko peteĩ Léi*, ha pe Léi heʼiháicha omano vaʼerã, heʼi haguére ijehe haʼeha Ñandejára raʼy”.  Pilato okyhyjevéntema ohendúvo haʼekuéra heʼíva,  oike jey pe governadór rógape ha heʼi Jesúspe: “¿Moõgua piko nde?”. Jesús katu ndeʼíri chupe mbaʼeve. 10  Upémarõ Pilato heʼi: “¿Nereñeʼẽmoʼãi piko chéve? ¿Ndereikuaái piko che arekoha autorida apoi hag̃ua ndehegui ha arekoha autorida romosaingo hag̃ua yvyráre?”. 11  Jesús ombohovái chupe: “Ndereguerekói vaʼerãmoʼã mbaʼeveichagua autorida rejapo hag̃ua cherehe mbaʼeve, Ñandejára nomeʼẽirire ndéve. Upévare pe kuimbaʼe chemeʼẽ vaʼekue nde pópe ipekádo tuichave ndehegui”. 12  Upévare Pilato oñehaʼã jey opoi Jesúsgui. Péro umi hudío osapukaipa: “Repoíramo pévagui, nde ndahaʼéi César* amígo. Oimeraẽ heʼíva ijehe rreiha, oñemoĩ hína César rehe”. 13  Ohendu rire koʼã mbaʼe Pilato onohẽ okápe Jesúspe, ha oguapy pe tarímape. Upéva oĩ peteĩ lugár héravape Empedrádo, evréope oñehenóiva Gábbata. 14  Upérõ ningo pe día ojepreparaha hikuái pe Paskuarã*, ha las dócerupi* Pilato heʼi umi hudíope: “¡Pemañami! ¡Pende Rréi!”. 15  Haʼekuéra katu osapukái: “¡Ejuka chupe! ¡Ejuka chupe! ¡Emosaingo yvyráre!”. Pilato heʼi chupekuéra: “¿Pende Rréipe piko peipota amosaingo yvyráre?”. Umi saserdóte ruvichakuéra katu ombohovái: “César añoite la ore rréi”. 16  Upémarõ Pilato omeʼẽ chupekuéra Jesúspe omosaingo hag̃ua yvyráre. Upévo haʼekuéra ogueraha chupe. 17  Jesús ogueraha ijapére pe yvyra pohýi*, ha oho pe lugár héravape Akãngue Renda, evréope oñehenóiva Gólgota. 18  Upépe oñemosaingo chupe yvyráre, hendive oñemosaingo avei mokõi kuimbaʼépe ijykére, ha Jesús opyta mbytépe. 19  Pilato ohai avei peteĩ letrérore: “Jesús Nazaretgua, hudiokuéra Rréi”, ha omoĩka upéva pe yvyráre. 20  Pe lugár Jesús oñemosaingo hague opyta pe siuda ypýpe, upévare heta hudío olee pe letréro heʼíva. Ha ojehai voi evréo, latín ha griégope. 21  Umi saserdóte ruvichakuéra* katu oñepyrũ heʼi Pilátope: “Anína rehai: ‘Hudiokuéra Rréi’, ehai guei haʼe heʼi hague: ‘Che hína hudiokuéra Rréi’”. 22  Pilato ombohovái: “Pe ahai vaʼekue, opytáma amoĩ haguéicha”. 23  Umi soldádo omosaingo rire Jesúspe yvyráre, ojagarra ijao joʼaha, omondoro cuatro hendápe ha omeʼẽ káda soldádope peteĩ párte. Ha ojagarra avei pe ijao iguypegua, péva noñembovyvýi síno ojetehe de unoite. 24  Upévare heʼi ojupe: “Ani ñamondoro, jasorteántena, jadesidi hag̃ua mávapepa opytáta”. Péicha oiko oñekumpli hag̃ua Ñandejára Ñeʼẽ heʼíva: “Oñembojaʼo hikuái che ao joʼaháre, ha che ao iguypegua katu osortea”. Ha umi soldádo añetehápe ojapo upeichaite. 25  Pe yvyra Jesús oñemosaingoha ypýpe katu, oñemboʼy hína isy ha isy ermána; María, Clopas rembireko ha María Magdalena. 26  Jesús ohechávo oñemboʼyha ijypýpe isy ha idisípulo* haʼe ohayhúva, heʼi isýpe: “¡Che sy, koʼág̃a guive péva hína ne memby!”. 27  Upéi heʼi idisípulope: “¡Koʼág̃a guive haʼe hína nde sy!”. Ha upe óra guive idisípulo ogueraha hendive Maríape hógape. 28  Upe rire, Jesús oikuaa oikopáma hague opa mbaʼe, ha oñekumpli hag̃ua Ñandejára Ñeʼẽ, heʼi: “Cheyʼuhéi”. 29  Upépe oĩ peteĩ mbaʼyru henyhẽtéva víno háigui, upémarõ omoĩ hikuái peteĩ takuárare espónha, omyakỹ pype ha omboja Jesús jurúre. 30  Hoʼu rire pe víno hái Jesús heʼi: “Ajapopaitéma nde rejerure vaʼekue chéve”, upéi oñakãity ha omano*. 31  Upérõ pe Ára* umi hudío Ojepreparaha sabadorã*, upévare ojerure hikuái Pilátope oñehetymamopẽ hag̃ua umi oñemosaingóva hína yvyráre ha upéi toñemboguejy ani hag̃ua opyta upépe hetekue sábado árape (ha upérõ kuri sábado guasu). 32  Upéi ou umi soldádo ha ohetymamopẽ umi mokõi kuimbaʼe oñemosaingo vaʼekue yvyráre Jesús ndive. 33  Péro oúvo Jesús rendápe, ohecha hikuái haʼe omanóma hague ha nomopẽi chugui hetyma. 34  Upéicharamo jepe peteĩ soldádo oikutu chupe ilánsape ikostílla paʼũme, ha osẽ chugui tuguy ha y. 35  Pe kuimbaʼe omombeʼúva koʼã mbaʼe ndaijapúi, haʼe voi ningo ohecha oiko hague. Upévare oikuaa porã upe heʼíva añeteha, peẽ ikatu hag̃uáicha peguerovia avei. 36  Añetehápe koʼã mbaʼe oiko oñekumpli hag̃ua Ñandejára Ñeʼẽ heʼíva: “Ni peteĩ ikangue noñemopẽmoʼãi”. 37  Ha avei pe heʼíva Ñandejára Ñeʼẽ ótro hendápe: “Ojesarekóta hikuái Upe haʼekuéra oikutu vaʼekuére”. 38  Upéi, koʼã mbaʼe oikopa rire José Arimateagua oho ojerure Pilátope ikatúpa ogueraha Jesús retekue. José ningo Jesús disípulo vaʼekue, péro nomombeʼúi avavépe okyhyje rupi umi hudíogui. Upémarõ Pilato omeʼẽ chupe permíso ha haʼe ou ogueraha Jesús retekue. 39  Ha Nicodemo, pe oúma vaʼekue peteĩ pyharépe Jesús rendápe, ou avei ha ogueru treinta kílorupi mírra* ha aloe oñembojeheʼapyre. 40  Haʼekuéra ojagarra Jesús retekue, omona hese umi mbaʼe ryakuã porã ha olia téla de línope. Péicha umi hudío oprepara jepi umi teʼongue oñeñotỹ hag̃ua. 41  Jesús oñemosaingo hague ypýpe oĩ peteĩ hardín, upépe oĩ peteĩ sepultúra pyahu, ha neʼĩra avave oñemoĩ pype. 42  Upérõ umi hudío ojepreparáma hína pe areterã, ha hiʼag̃ui rupi pe sepultúra, omoĩ hikuái Jesúspe upépe.

Nóta

Ehecha “Saserdóte Ruvichakuéra”, diksionário oĩva ko Bíbliape.
Griégope heʼi: “Emosaingo chupe yvyráre”.
Ehecha “Léi”, diksionário oĩva ko Bíbliape.
Péicha oñehenói vaʼekue umi mburuvicha guasúpe Rómape.
Koʼápe heʼívo Páskua heʼise hína pe semána ojegueromanduʼaha pe Páskua, pévape oike avei Pan Ilevaduraʼỹva Arete. Ehecha “Páskua”, diksionário oĩva ko Bíbliape.
Griégope heʼi: “pe óra séxtarupi”.
Ehecha “Yvyra Pohýi”, Informasión Oĩvéva 6-pe.
Griégope heʼi: “hudiokuéra saserdóte ruvicha”.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “haʼe ndorrespiravéi”.
Upéva hína viernes.
Ehecha “Sábado”, diksionário oĩva ko Bíbliape.
Ehecha “Mírra”, diksionário oĩva ko Bíbliape.