Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Juan 13:1-38

13  Og̃uahẽ mboyve pe arete hérava Páskua*, Jesús oikuaáma vaʼekue og̃uahẽmaha hiʼóra oho hag̃ua ko múndogui* pe Túva rendápe. Jesús ohayhueterei idisipulokuérape*, ha ipahaite peve ohayhu chupekuéra.  Upérõ osena hína hikuái, ha pe Aña* omoingéma Judas korasõme otraisiona hag̃ua Jesúspe. Judas hína Simón Iscariote raʼy.  Jesús katu oikuaáma pe Túva omoĩ hague ipoguýpe opa mbaʼe. Haʼe oikuaa avei Ñandejára ombou hague chupe ha oho jeytamaha Ñandejára rendápe.  Upérõ Jesús opuʼã meságui, oipeʼa ijao joʼaha, ha ojagarra peteĩ toálla.  Upéi omoĩ y peteĩ palangánape, ombojepyhéi idisipulokuérape ha omokã chupekuéra pe toállape.  Oñembojávo Simón Pedro rendápe, haʼe heʼi: “Che Ruvicha, ¿mbaʼéicha piko nde chembojepyhéita?”.  Jesús ombohovái chupe: “Koʼág̃a nde nerentendéi ko ajapóva, péro ág̃a amo gotyove rentendéta”.  Pedro heʼi chupe: “Nde ni mbaʼevéicharõ nachembojepyheimoʼãi”. Jesús ombohovái: “Nderehejáiramo rombojepyhéi, ndaikatumoʼãi reime chendive”.  Upévo Simón Pedro heʼi: “Che Ruvicha, upéicharõ ani che py añónte, síno che po ha che akã avei”. 10  Jesús ombohovái: “Pe ojahu vaʼekue ipotĩmbaitéma, ha ipýntema tekotevẽ ojohéi. Ha peẽ penepotĩma, péro oĩ hína peteĩ pende apytépe naipotĩriva”. 11  Jesús oikuaáma voi mávapa upe otraisionátava chupe, upévare heʼi: “Pende apytépe oĩ hína peteĩ naipotĩriva”. 12  Upéi, ombojepyheipa rire chupekuéra, Jesús omoĩ ijao joʼaha, oho oguapy jey mesápe ha heʼi: “¿Peikuaápa mbaʼépa heʼise pe ajapo vaʼekue penderehe? 13  Peẽ peje chéve: ‘Mboʼehára’, ha ‘Che Ruvicha’, ha añete la pejéva. 14  Che ningo pene Mboʼehára ha pende Ruvicha, ha upéicharamo jepe pombojepyhéi, upéicharõ peẽ avei pejohéi vaʼerã ojupe pende py. 15  Che ahechauka peẽme mbaʼéichapa pejapo vaʼerã, ha che ajapo haguéicha, peẽ avei pejapo vaʼerã. 16  Añetehápe haʼe peẽme: Pe tembiguái ndaikatúi tuichave ipatróngui, ha pe ojejokuáiva ndaikatúi tuichave pe ojokuáivagui chupe. 17  Peẽ peikuaáma koʼã mbaʼe, ha pejapóramo katu pevyʼáta. 18  Nañeʼẽi hína opavavére, che aikuaa umi aiporavo vaʼekuépe. Péro oñekumpli vaʼerã Ñandejára Ñeʼẽ heʼíva: ‘Pe okarúva jepi chendive opuʼã cherehe’. 19  Che haʼéma voi peẽme oikotaha ko mbaʼe, ikatu hag̃uáicha ág̃a pehecha vove oñekumpliha cherehe, peikuaa upe ojehai vaʼekue oñeʼẽha cherehe. 20  Añetehápe haʼe peẽme: Pe orresivíva torypápe che remimboúpe, chéve avei cherresivi. Ha pe cherresivíva torypápe, orresivi avei upe chembou vaʼekuépe”. 21  Heʼi rire koʼã mbaʼe, Jesús ojepyʼapy ha oñeñandu vaieterei, upévare heʼi porã chupekuéra: “Añetehápe haʼe peẽme: Pende apytépe oĩ peteĩ chetraisionátava”. 22  Umi idisípulo katu oñepyrũ omaña ojuehe ndoikuaáigui mávarepa heʼi péicha. 23  Upérõ Jesús ykére oguapy hína peteĩ idisípulo haʼe ohayhúva. 24  Upémarõ Simón Pedro oseñea* chupe ha heʼi: “Eporandúna chupe mávarepa heʼi péicha”. 25  Upévo haʼe oñembojave Jesús rehe ha oporandu chupe: “Che Ruvicha, ¿máva piko upéva?”. 26  Jesús ombohovái: “Amyakỹta ko pan pedáso, ha upe ameʼẽvape, upéva haʼe”. Upéi omyakỹ pe pan pedáso ha omeʼẽ Júdaspe, Simón Iscariote raʼy. 27  Judas ojagarra rire pe pan pedáso, Satanás* oike ipyʼapýpe. Upévare Jesús heʼi chupe: “Upe rejapótava, pyaʼeve ejapo”. 28  Péro ni peteĩva umi oguapýva mesápe ndoikuaái mbaʼérepa heʼi chupe upéicha. 29  Judas ningo oreko pe pláta ryru, upévare oĩ opensáva Jesús heʼiha chupe: “Ejoguána umi mbaʼe ñaikotevẽva ko areterã”, térã omeʼẽ hag̃ua umi imboriahúvape. 30  Upéicharõ, Judas ojagarra rire pe pan pedáso upepete osẽ oho. Pyharéma upérõ. 31  Haʼe osẽ rire, Jesús heʼi: “Koʼág̃a oñembotuicha pe Yvypóra Raʼýpe*, ha haʼe rupive oñembotuicha Ñandejárape. 32  Ñandejára ombotuicháta pe Yvypóra Raʼýpe, ha ojapóta upéva koʼag̃aite voi. 33  Che raʼykuéra pohayhuetéva, sapyʼamíntema aiméta penendive. Upéi peẽ cherekáta ha haʼe haguéicha umi hudíope, peẽme avei haʼéta koʼág̃a: ‘Che ahatahápe peẽ ndaikatúi peho’. 34  Ameʼẽ peẽme peteĩ mandamiénto pyahu: pejoayhúkena. Che pohayhu haguéicha, peẽ pejoayhu vaʼerã avei. 35  Péicha pejoayhúramo, enterove ohechakuaáta peẽ haʼeha che disípulo”. 36  Upévo Simón Pedro heʼi chupe: “Che Ruvicha, ¿moõiko rehóta?”. Jesús ombohovái: “Che ahatahápe nde ndaikatúi chesegi koʼág̃a, péro upéi chesegíta”. 37  Pedro heʼi: “Che Ruvicha, ¿mbaʼére piko ndaikatúi rosegi koʼág̃a? Che ningo che rekove* ameʼẽta nderehehápe”. 38  Jesús ombohovái chupe: “¿Remeʼẽta piko nde rekove* cherehehápe? Añetehápe haʼe ndéve: Pe gállo osapukái mboyve, nde chenegáta tres vése”.

Nóta

Ehecha “Páskua”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “Diablo”, ehecha diksionário oĩva ko Bíbliape.
Griégope heʼi: “oseñea chupe omomýivo iñakã”.
Ehecha “Satanás”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Griégope heʼi: “che álma”. Ehecha “Álma”, Informasión Oĩvéva 7A-pe.
Griégope heʼi: “ne álma”.