Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Juan 11:1-57

11  Upéi peteĩ kuimbaʼe hérava Lázaro, hasy, haʼe Betaniagua ha iñermána María ha Marta oiko avei upépe hendive.  María ningo pe omona vaʼekue aséite hyakuã asýva ñande Ruvicha py rehe ha omokã iñakãraguépe, ha iñermáno Lázaro hína pe hasýva.  Upémarõ iñermanakuéra heʼika Jesúspe: “Karai, hasy ningo ne amígo rehayhuetéva”.  Jesús ohendúvo upéva heʼi: “Ko mbaʼasy ndahaʼéi haʼe omano hag̃ua, síno oñembotuicha hag̃ua Ñandejárape, ha péicha Ñandejára Raʼy ikatúta oñembotuicha avei”.  Jesús ohayhu Marta, María ha Lázarope.  Upéicharamo jepe oikuaávo Lázaro hasyha, opytavénte dos día upe oĩháme.  Upe rire heʼi idisipulokuérape*: “Jaha jey Judéape”.  Idisipulokuéra heʼi chupe: “Mboʼehára*, ramoite ningo umi hudío ndejapise itápe ndejuka hag̃ua, ¿ha piko reho jeýta upépe?”.  Jesús ombohovái: “Peteĩ día ningo oreko doce óra hesakãha, ¿ajépa? Oĩramo oikóva arakuépe, noñepysangái mbaʼevére ohechágui pe mbaʼerendy ohesapéva ko múndo*. 10  Péro oĩramo oikóva pyharekue, oñepysanga oimeraẽ mbaʼére oĩgui pytũmbýpe”. 11  Jesús heʼi koʼã mbaʼe ha upéi heʼive: “Ñane amígo Lázaro oke hína, péro che aháta amombáy chupe”. 12  Upévo idisipulokuéra heʼi: “Ore Ruvicha, oimérõ oke hína okueráta”. 13  Añetehápe Jesús heʼi chupekuéra Lázaro omanomaha. Péro haʼekuéra oimoʼã haʼe heʼiha Lázaro okenteha. 14  Upémarõ Jesús heʼi porã chupekuéra: “Lázaro omanóma, 15  ha avyʼa naiméi haguére upépe, péicha ikatúta imbareteve pende jerovia pehechávo pe ajapótava. Jahána hendápe”. 16  Upévo Tomás, ojeheróva Gemelo, heʼi iñirũnguérape: “Jaha katu hendive, tañamano jepe raʼe”. 17  Jesús og̃uahẽvo, ojapóma cuatro día Lázaro oĩ hague pe sepultúrape. 18  Betania opyta tres kilómetrorupinte Jerusaléngui. 19  Upévare heta hudío ou okonsola Marta ha Maríape iñermáno omano haguére. 20  Marta ohendúvo Jesús ouha, osẽ ohug̃uaitĩ chupe, María katu opytánte hógape oguapy. 21  Upévo Marta heʼi Jesúspe: “Karai, reimérire koʼápe, che ermáno nomanói vaʼerãmoʼã. 22  Upéicharamo jepe aguerovia Ñandejára omeʼẽtaha ndéve oimeraẽ mbaʼe rejeruréva chupe”. 23  Jesús heʼi chupe: “Ne ermáno opuʼã jeýta”. 24  Marta heʼi: “Che aikuaa oñemoingove jeytaha chupe pe ára pahápe”. 25  Jesús heʼi chupe: “Che hína pe ñemoingove jey ha che rupive oikove jey umi hénte. Pe ojeroviáva cherehe omanóramo jepe oikove jeýta, 26  ha entéro oikovéva ha ojeroviáva cherehe nomanomoʼãi arakaʼeve. ¿Ndépa reguerovia upéva?”. 27  Marta heʼi: “Aguerovia Karai, che aguerovia nde haʼeha pe Cristo*, Ñandejára Raʼy, Upe ojeʼe vaʼekue outaha ko múndope”. 28  Heʼi rire upéva, oho ohenói iñermána Maríape, ha heʼi chupe ñemiháme: “Pe Mboʼehára oime ou ha nerenoika”. 29  María ohendúvo upéva, pyaʼe opuʼã ha oho hendápe. 30  Upérõ Jesús neʼĩra og̃uahẽ pe puévlope, oĩ gueteri Marta ohug̃uaitĩ haguépe chupe. 31  Umi hudío oĩva hendive pe ógape ha okonsoláva chupe, ohecha María apúrope opuʼãha osẽ. Haʼekuéra oho hapykuéri oimoʼãgui ohotaha pe sepultúrape hasẽ hag̃ua. 32  María katu og̃uahẽ Jesús oĩháme ha ohechávo chupe, oñesũ henondépe ha heʼi: “Karai, reimérire koʼápe, che ermáno nomanói vaʼerãmoʼã”. 33  Jesús ohecha mbaʼéichapa María ha umi hudío ou vaʼekue hendive hasẽmba, upéva oguapyeterei hese, oñeñandu vaieterei, 34  ha heʼi: “¿Moõ piko pemoĩ raʼe hetekue?”. Haʼekuéra heʼi: “Karai, ejúna ehecha”. 35  Upévo Jesús hasẽ. 36  Upévare umi hudío oñepyrũ heʼi: “¡Pemañamína, mbaʼeichaitépa ohayhu raʼe chupe!”. 37  Ha ijapytepekuéra oĩ heʼíva: “Ko kuimbaʼe ningo omonguera kuri pe isiégo vaʼekuépe, ¿ndaikatúi piko raʼe ojapo avei oimeraẽ mbaʼe ani hag̃ua Lázaro omano?”. 38  Upéi Jesús oñembyasyeterei jey, ha oho pe sepultúra oĩháme, upéva ningo oĩ itakuápe ha oñemboty peteĩ ita guasúpe. 39  Jesús heʼi: “Peipeʼa pe ita”. Marta, pe omanóva reindy, heʼi chupe: “Karai, ojapóma ningo cuatro día omano hague ha oiméne inéma”. 40  Jesús heʼi chupe: “¿Ndaʼéi piko ndéve raʼe regueroviáramo rehechataha Ñandejára tuichaha?”. 41  Upémarõ oipeʼa hikuái pe ita. Jesús katu omaña yvága gotyo ha heʼi: “Che Ru, aagradese ndéve cherendu haguére. 42  Añetehápe, che aikuaa voi akóinte nde cherenduha; péro añemboʼe ndéve koʼã hénte oĩva koʼápe oguerovia hag̃ua nde chembou hague”. 43  Ha heʼipa rire koʼã mbaʼe, hatã heʼi: “¡Lázaro, esẽ!”. 44  Ha pe kuimbaʼe omano vaʼekue, osẽ okápe, ipy ha ipo ojejokuapa, hova katu ojejahoʼi páñope. Jesús heʼi: “Peipeʼa chugui umi ojejokuaha ha peheja toho”. 45  Ha heta hudío ou vaʼekue María rendápe, ohecha upe ojapóva ha ojerovia Jesús rehe. 46  Péro ijapyteguikuéra oĩ avei ohóva umi fariséo* rendápe ha omombeʼu chupekuéra Jesús ojapo vaʼekue. 47  Upémarõ umi saserdóte ruvicha* ha fariseokuéra ombyaty pe Sanedrínpe*, ha oñepyrũ heʼi hikuái: “¿Mbaʼéiko jajapóta? Pe kuimbaʼéngo ojapo heta milágro. 48  Jahejáramo osegi péicha enterove ojeroviáta hese ha umi rrománo oúta oipeʼa ñandehegui ñane témplo ha ñane retã”. 49  Peteĩva ijapyteguikuéra hérava Caifás, upe áñope haʼe vaʼekue saserdóte guasu*, osẽ heʼi: “Peẽ ndapeikuaái mbaʼeve, 50  ha ndapehechakuaái ñane retã iñimportanteveha peteĩ kuimbaʼégui. Iporãvéngo haʼe omano oñehundipa rangue ko tetã”. 51  Péro ko mbaʼe ndeʼíri ijehegui reínte, haʼéngo saserdóte guasu upe áñope, upévare oprofetisa* Jesús omano vaʼerãha upe tetãre, 52  ha ndahaʼéi upe tetãre añónte, síno avei ombyaty hag̃ua peteĩ atýpe Ñandejára raʼykuéra isarambipa vaʼekue. 53  Ha upe día guive haʼekuéra oñemongeta ohecha hag̃ua mbaʼéichapa ojukáta Jesúspe. 54  Upévare Jesús ndoikovéima okorre ohechatahárupi chupe umi hudío, oho upégui desiérto ypýpe, peteĩ siuda héravape Efraín, ha opyta upépe idisipulokuérandi. 55  Upérõ hiʼag̃uíma umi hudiokuéra Páskua* ha upe mboyve heta hénte ou kampáñagui Jerusalénpe, oñemopotĩ hag̃ua pe Léi* heʼiháicha. 56  Haʼekuéra oñepyrũ oheka Jesúspe, ha oĩ aja pe témplope heʼi ojupe: “¿Mbaʼépa peẽ peje? ¿Ndoumoʼãi piko ni ko areterã?”. 57  Umi saserdóte ruvicha ha fariseokuéra katu heʼi, oĩramo oikuaáva moõpa oĩ Jesús, tomombeʼu, haʼekuéra ojagarra hag̃ua chupe.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “Rabí”.
Ehecha “Múndo”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Sanedrín”, diksionário oĩva ko Bíbliape.
Ehecha “Saserdóte Guasu”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Páskua”, diksionário oĩva ko Bíbliape.
Ehecha “Léi”, diksionário oĩva ko Bíbliape.