Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Juan 10:1-42

10  “Añetehápe haʼe peẽme: Pe kuimbaʼe ndoikéiva pe okẽrupi ovechakuéra korápe, ojupíva guei ótro hendárupi, upéva hína mondaha ha mbaretépe ogueraháva mbaʼe ahéno.  Péro pe oikéva okẽrupi, haʼe hína pe ovecharerekua.  Chupe oavri pe okẽre oñangarekóva, umi ovecha katu ohendu iñeʼẽ, ha haʼe ohenói ijovechakuérape hérarupi ha oguenohẽ okápe.  Oguenohẽmbávo ijovechakuéra, pe ovecharerekua oho henonderã ha umi ovecha oho hapykuéri oikuaágui iñeʼẽ.  Peteĩ extráño rapykuéri ni mbaʼevéicharõ ndohomoʼãi hikuái, odiparapáta guei chugui ndoikuaáigui umi extráño ñeʼẽ”.  Jesús omombeʼu ko ehémplo, péro haʼekuéra nontendéi mbaʼépa heʼise chupekuéra.  Upévare Jesús heʼi jey: “Añetehápe haʼe peẽme: Che hína pe okẽ, oike hag̃ua umi ovecha.  Entéro umi che rérape ou guaʼúva, umíva hína mondaha ha mbaretépe ogueraháva mbaʼe ahéno; péro umi ovecha nohendúi chupekuéra.  Che hína pe okẽ; oimeraẽ oúva che rendápe oike hag̃ua pe korápe, ojesalváta. Oike ha osẽta ha ojuhúta kapiʼipe. 10  Pe mondaha ou omonda, ojuka ha ohundi hag̃uánte. Che katu aju oikove hag̃ua hikuái opa árare. 11  Che hína pe ovecharerekua imbaʼeporãva. Pe ovecharerekua imbaʼeporãva omeʼẽ hekove* umi ovechakuéra rehehápe. 12  Pe kuimbaʼe plátarente ombaʼapóva, ndahaʼéi ovecharerekua, ha umi ovecha ndahaʼéigui imbaʼe, ohechávo ou pe lóvo oheja rei umi ovecha ha odipara (pe lóvo katu ojagarra ha omosarambipa umi ovecha). 13  Pe kuimbaʼépe ningo ojepagánte ha upévare ndojepyʼapýi umi ovecháre. 14  Che hína pe ovecharerekua imbaʼeporãva, aikuaa che ovechakuérape ha umi che ovecha chekuaa chéve avei. 15  Upéicha avei pe Túva chekuaa ha che aikuaa pe Túvape. Ha ameʼẽ che rekove* umi ovechakuéra rehehápe. 16  ”Areko ambue ovechakuéra, oĩva ótro korápe, umívape avei aguerúta ha ohendúta che ñeʼẽ, péicha oikóta chuguikuéra peteĩ ovecha aty ha peteĩ ovecharerekua. 17  Pe Túva cherayhu, ameʼẽ rupi che rekove*, ikatu hag̃uáicha upéi oñemeʼẽ jey chéve. 18  Avave ndoipeʼái chehegui, síno ameʼẽ chejeheguiete. Areko autorida ameʼẽ hag̃ua, ha areko autorida oñemeʼẽ jey hag̃ua chéve. Péicha heʼi chéve che Ru ajapo hag̃ua”. 19  Ohendúvo koʼã mbaʼe, umi hudío oñepyrũ jey ojodiskuti. 20  Heta oĩ heʼíva: “Kóvango oñendemonia ha itarováma. ¿Maʼerã piko pehendu chupe?”. 21  Ótro katu heʼi: “Péicha noñeʼẽmoʼãi peteĩ endemoniádo. Peteĩ demónio* ndaikatúi omonguera peteĩ isiégovape, ¿ajépa?”. 22  Upérõ Jerusalénpe ojegueromanduʼa pe témplo oñemeʼẽ hague Ñandejárape*. Upérõ araroʼy, 23  ha Jesús oguata oikóvo pe témplore, oĩháme pe lugár hérava Salomón rogaguy. 24  Upépe umi hudío ou ojerepa hese ha heʼi: “¿Mbaʼére piko neremombeʼúi gueteri oréve* mávapa nde? Ere porãna oréve oiméramo nde haʼe hína pe Cristo*”. 25  Jesús ombohovái chupekuéra: “Haʼémango peẽme ha upéicharamo jepe ndapegueroviái. Umi mbaʼe ajapóva che Túva rérape, umíva ohechauka mávapa che. 26  Péro peẽ ndahaʼéigui che ovecha, ndapegueroviái. 27  Che ovechakuéra ohendu che ñeʼẽ, che aikuaa chupekuéra ha haʼekuéra ou che rapykuéri. 28  Che ameʼẽta chupekuéra jeikove opaveʼỹva, arakaʼeve noñehundimoʼãi hikuái ha avave ndoipeʼamoʼãi che poguýgui. 29  Umi ovecha che Ru omeʼẽva chéve tuichave opaite mbaʼégui, ha avave ndaikatumoʼãi oipeʼa chupekuéra pe Túva poguýgui. 30  Che ha pe Túva ningo peteĩnte*”. 31  Upévo umi hudío ojagarra jeýma ita ojapi hag̃ua Jesúspe. 32  Haʼe katu heʼi chupekuéra: “Ajapo pene renondépe heta mbaʼe porã pe Túva omandágui chéve. ¿Mavaite umi mbaʼe porã ajapo vaʼekuérepa chejapise?”. 33  Umi hudío ombohovái chupe: “Ndorojapimoʼãi rejapo haguére mbaʼe porã, síno retaky* rupi Ñandejárare. Ndéngo kuimbaʼénte ha ere ndejehe peteĩ ñandejaraha”. 34  Jesús heʼi chupekuéra: “Pende Léipe* Ñandejára heʼi: ‘Peẽ hína ñandejára’, ¿ajépa? 35  Upéicharõ, haʼe voi ohenói ‘ñandejára’ umi kuimbaʼépe, jepe Iñeʼẽme oñekondena chupekuéra. Ha Ñandejára Ñeʼẽ arakaʼeve ndojavýi. 36  ¿Mbaʼéicha piko upéicharõ pejéta atakyha Ñandejárare haʼe haguére: ‘Che hína Ñandejára Raʼy?’ Chéngo hína pe kuimbaʼe Ñandejára omomarangatu ha ombou vaʼekue ko múndope*. 37  Ndajapóiramo che Ru rembipota, ani pejerovia cherehe. 38  Péro ajapóramo upéva katu, ndapejeroviáiramo jepe cherehe, pegueroviána umi mbaʼe ajapóva, ikatu hag̃uáicha peikuaa ha akóinte pentende porãve pe Túva oĩha chendive ha che aĩha pe Túvandi”. 39  Upévare oñehaʼã jey hikuái ojagarra chupe, péro haʼe ojehekýi chuguikuéra. 40  Upémarõ haʼe ohasa jey pe Jordán, Juan oñepyrũ haguépe oporovautisa*, ha opyta upépe. 41  Upévo heta hénte ou hendápe ha oñepyrũ heʼi ojupe: “Añetehápe Juan ndojapói ni peteĩ milágro, péro siertoite raʼe opa mbaʼe heʼi vaʼekue ko kuimbaʼére”. 42  Ha upépe heta hénte ojerovia hese.

Nóta

Griégope heʼi: “hiʼálma”. Ehecha “Álma”, Informasión Oĩvéva 7A-pe.
Griégope heʼi: “che álma”.
Griégope heʼi: “che álma”.
Ehecha “Demónio”, diksionário oĩva ko Bíbliape.
Térã: “Fiesta de la Dedicación”.
Griégope heʼi: “ore álmape”.
Ehecha “Cristo”, diksionário oĩva ko Bíbliape.
Térã: “roime peteĩ ñeʼẽme”.
Ehecha “Blasfemia”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.