Ehecha oĩva pype

Ehecha oĩva pype

Juan 1:1-51

1  Iñepyrũmbýpe, pe Ñeʼẽ oĩma vaʼekue voi, ha pe Ñeʼẽ oĩ vaʼekue Ñandejára ndive, ha pe Ñeʼẽ haʼe vaʼekue peteĩ ñandejára.  Iñepyrũmbýpe haʼe oĩ vaʼekue Ñandejára ndive.  Opaite mbaʼe ojejapo haʼe rupive ha heseʼỹ ndojejapói ni peteĩ mbaʼe.  Pe Ñeʼẽ rupive ikatu ojeikove ha hekove ohesape yvyporakuérape peteĩ mbaʼerendýicha.  Pe mbaʼerendy ohesape pytũmbýpe, ha pe pytũmby ndaipuʼakái hese.  Ñandejára ombou vaʼekue peteĩ kuimbaʼe, hérava Juan.  Ko kuimbaʼe ou oñeʼẽ umi héntepe pe mbaʼerendy rehe, ikatu hag̃uáicha opaichagua hénte oguerovia haʼe heʼíva rupive.  Haʼe ndahaʼéi vaʼekue pe mbaʼerendy, ou guei oñeʼẽ hag̃ua umi héntepe upe mbaʼerendy rehe.  Pe mbaʼerendy teete ohesapéva opaichagua yvypórape, oupotaite vaʼekue ko múndope*. 10  Haʼe oĩ vaʼekue pe múndope, ha Ñandejára ojevale hese ojapo hag̃ua pe múndo, péro pe múndo ndoikuaái chupe. 11  Ou ivállepe, péro umi ivallegua ndorresivíri chupe. 12  Upéicharamo jepe umi orresivívape chupe, omeʼẽ autorida oiko hag̃ua chuguikuéra Ñandejára raʼy, ojerovia rupi hérare. 13  Haʼekuéra onase péro ndahaʼéi yvyporakuéra onaseháicha, ha ndahaʼéi ni ituvakuéra, ni kuimbaʼe rembipota rupi, síno Ñandejára oipota rupi. 14  Pe Ñeʼẽ ou yvypóraicha, oiko ñande apytépe ha ñande jahecha hekomimbipa. Pe Túva omeʼẽ chupe tekomimbipa haʼégui Itaʼýra peteĩetéva. Haʼe henyhẽ mbaʼeporã ijojahaʼỹva* ha añetégui. 15  (Juan oñeʼẽ vaʼekue hese ha añetehápe osapukái voi. Juan hína pe heʼi vaʼekue: “Pe oúva che rapykuéri oñemotenondéma cherehe, haʼe ningo oĩma vaʼekue che mboyve”.) 16  Haʼe henyhẽ rupi mbaʼeporã ijojahaʼỹva ha añetégui, ñandéve akóinte oñemeʼẽ mbaʼeporã ijojahaʼỹva. 17  Pe Léi* ningo oñemeʼẽ Moisés rupive, péro Jesucristo rupive oĩ mbaʼeporã ijojahaʼỹva ha añetegua. 18  Ni peteĩ yvypóra arakaʼeve ndohechái Ñandejárape, péro pe taʼýra peteĩete Ñandejaraichagua, oĩva pe Túva ykére omyesakã mávapa haʼe. 19  Umi hudío omondo Jerusaléngui Juan rendápe umi saserdóte* ha levíta oporandu hag̃ua chupe: “¿Máva piko nde?”. 20  Haʼe noñembotavýi chuguikuéra, heʼi porã guei: “Che ndahaʼéi hína pe Cristo*”. 21  Ha oporandu hikuái: “¿Máva upéicharõ? ¿Elías piko?”. Haʼe heʼi: “Nahániri”. “¿Pe Proféta* oñepromete vaʼekue piko?” Haʼe ombohovái: “¡Nahániri!”. 22  Upévo heʼi chupe hikuái: “¿Máva piko nde?, eréna oréve roho hag̃ua romombeʼu umi orembou vaʼekuépe. ¿Mbaʼépa ere ndejehe?”. 23  Haʼe heʼi: “Che hína pe osapukáiva desiértore: ‘Pembojoja asy Jehová* rape’, heʼi haguéicha proféta Isaías”. 24  Umi ou vaʼekue oñeʼẽ Juan ndive ningo umi fariséo* remimbou. 25  Haʼekuéra katu oporandu chupe: “Nde ndahaʼéiramo Cristo, ni Elías ni pe Proféta oñepromete vaʼekue, ¿mbaʼérepa upéicharõ reporovautisa*?”. 26  Juan ombohovái heʼívo: “Che aporovautisa ýpe. Pende apytépe katu oñemboʼy peteĩ peẽ peikuaaʼỹva, 27  haʼe ou che rapykuéri ha che namereséi ni isandália sã jepe ajora”. 28  Koʼã mbaʼe oiko vaʼekue Betániape, Jordán rovái pe ótro ládo, Juan oporovautisa haguépe. 29  Pe ótro díape, Juan ohecha Jesús ouha hendápe, ha heʼi: “¡Pemañami, Ñandejára Ovecharaʼy, oipeʼáva yvyporakuéra pekádo! 30  Haʼe hína pe che haʼe vaʼekue: Che rapykuéri ou peteĩ kuimbaʼe oñemotenondéva cherehe, haʼe ningo oĩma vaʼekue che mboyve. 31  Ni che ndaikuaái kuri chupe, péro aporovautisa hína ýpe, ikatu hag̃uáicha haʼe ojekuaauka umi Israelguápe”. 32  Juan omombeʼu avei: “Ahecha pe espíritu sánto* oguejy yvágagui peteĩ palómaicha, ha opyta hiʼári. 33  Ni che ndaikuaái kuri chupe, péro Upe chembou vaʼekue aporovautisa hag̃ua ýpe heʼi chéve: ‘Rehecha vove pe espíritu sánto oguejy ha opytaha peteĩ kuimbaʼe ári, reikuaáta upéva haʼeha pe oporovautisáva espíritu sántope’. 34  Che ahecha vaʼekue upéva, ha amombeʼu haʼeha Ñandejára Raʼy”. 35  Pe ótro díape, Juan oñemboʼy jey upépe mokõi idisípulo* ndive, 36  ha ohechávo Jesús ohasaha ohóvo, osẽ heʼi: “¡Pemañami, Ñandejára Ovecharaʼy!”. 37  Ohendúvo chupe, umi mokõi idisípulo oho Jesús rapykuéri. 38  Upévo Jesús ojere ha ohechávo ouha hapykuéri heʼi chupekuéra: “¿Mbaʼe peipota?”. Haʼekuéra heʼi: “Rabí (heʼiséva Mboʼehára), ¿moõiko repyta hína?”. 39  Haʼe heʼi: “Pejúna pehecha”. Upémarõ oho ohecha hikuái moõpa oĩ, ha opyta hendive upe díape. Upérõ hína kaʼaru las cuátrorupi*. 40  Peteĩva umi ohendu vaʼekue Juánpe ha upéi oho Jesús rapykuéri héra Andrés, haʼe hína Simón Pedro ermáno. 41  Ñepyrũrã haʼe otopa iñermáno Simón rehe, ha heʼi chupe: “Rotopa pe Mesíaspe*” (heʼiséva Cristo). 42  Ha ogueraha chupe Jesús rendápe. Jesús omaña hese ha heʼi: “Nde hína Simón, Juan raʼy. Koʼág̃a nderérata Cefas” (heʼiséva Pedro). 43  Pe ótro díape haʼe ohose Galiléape, upérõ haʼe otopa Felípere ha heʼi chupe: “Eju chemoirũ”. 44  Felipe ningo Betsaidagua, Andrés ha Pedro válle. 45  Felipe otopa Natanael rehe ha heʼi chupe: “Oime rotopa pe kuimbaʼe oñeñeʼẽ hague Moisés Léipe ha Profetakuéra kuatiañeʼẽme, Jesúspe, José raʼy Nazaretgua”. 46  Péro Natanael heʼi: “¿Nazarétgui piko ikatu osẽ peteĩ mbaʼe iporãva?”. Felipe heʼi chupe: “Eju ehecha”. 47  Jesús ohecha Natanael ouha hendápe ha heʼi hese: “Pemañami, peteĩ isrraelíta arakaʼeve noporombotavýiva”. 48  Natanael heʼi chupe: “¿Nde piko mbaʼéicha chekuaa?”. Jesús ombohovái: “Felipe nerenói mboyve rohecha kuri pe ígo máta guýpe”. 49  Natanael ombohovái chupe: “Mboʼehára*, nde hína Ñandejára Raʼy, nde hína pe Rréi Israelgua”. 50  Jesús ombohovái chupe: “¿Nde piko reguerovia haʼe haguére ndéve rohecha hague pe ígo máta guýpe? Heta mbaʼe tuichavéva koʼãvagui rehecháta hína”. 51  Heʼi avei chupekuéra: “Añetehápe haʼe peẽme: Pehecháta pe yvága ojavri ha Ñandejára anhelkuéra ojupi ha oguejyha pe Yvypóra Raʼy* rendápe”.

Nóta

Ehecha “Múndo”, diksionário oĩva ko Bíbliape.
Térã: “Ñandejára oguerohoryeterei chupe”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Saserdóte”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha Informasión Oĩvéva 1.
Ehecha “Fariséo”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “pe óra décimarupi”.
Ehecha “Mesías”, diksionário oĩva ko Bíbliape.
Térã: “Rabí”.
Ehecha “Yvypóra Raʼy”, diksionário oĩva ko Bíbliape.