Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hechos 5:1-42

5  Upéi, peteĩ karai hérava Ananías, hembireko Safira ndive ovende ijyvy,  ha oñemoĩ peteĩ ñeʼẽme hembirekóndi ñemiháme oñongatu hag̃ua pe yvy repykuégui imbaʼerã, ha hembyre katu ogueraha umi apóstolpe.  Upémarõ Pedro heʼi chupe: “Ananías, ¿maʼerã piko reheja Satanás* nembopyʼaguasu ha ndejapuse espíritu sántope* ha reipeʼa ñemiháme pe yvy repykuégui nembaʼerã?  ¿Ndahaʼéi voi piko nembaʼe raʼe revende mboyve? Ha upéi revende rire ningo pe hepykue nembaʼe jeýnte avei, ¿ajépa? ¿Mbaʼéicha piko repensa rejapóvo ko mbaʼe vaiete? Nde ningo ndejapu Ñandejárape, ndahaʼéi yvyporakuérape”.  Ohendúvo upéva Ananías hoʼa omano. Ha enterove ohendúva upe oiko vaʼekue okyhyjeterei opytávo.  Umi mitãrusu katu opuʼã olia hetekue télape ha ogueraha oñotỹ.  Upéi, ohasa rire tres órarupi, oike hembireko oikuaaʼỹre upe oiko vaʼekue.  Ha Pedro heʼi chupe: “Eremína chéve, ¿peẽ piko pevende raʼe pe yvy tánto rehe?”. Haʼe heʼi: “Upeichaite”.  Upémarõ Pedro heʼi: “¿Mbaʼére piko peẽ peñemoĩ peteĩ ñeʼẽme pembotavy hag̃ua Jehová* espíritupe? ¡Péina! Og̃uahẽma oúvo umi ogueraha vaʼekue oñotỹ ne ménape ha ndevehaitéma ndegueraháta”. 10  Upepete Safira hoʼa omano Pedro renondépe. Umi mitãrusu oikévo otopáma omano, ha ogueraha oñotỹ iména ykére. 11  Upévare, enterove oĩva kongregasiónpe* ha mayma ohendúva koʼã mbaʼe okyhyjeterei opytávo. 12  Umi apóstol katu ojapo meme heta milágro ha techapyrã umi hénte apytépe, ha enterove oñemoĩ peteĩ ñeʼẽme ha oñembyaty pe lugár héravape Salomón rogaguy. 13  Añetehápe ni peteĩ umi ótro noñanimái omoirũ chupekuéra, péro umi hénte oguerohory chupekuéra. 14  Opáichavo, hetaitereive ohóvo umi kuña ha kuimbaʼe ojeroviáva ñande Ruvicháre. 15  Umi hénte oguenohẽ avei heta hasývape hupa reheve umi tape guasúre, ikatu hag̃uáicha ohasakuévo Pedro, ikuarahyʼãngue jepe ohupyty chupekuéra. 16  Avei hetaiterei hénte ou umi puévlo oĩvagui Jerusalén ypýpe, ogueru hikuái hasýva ha oñendemoniávape, ha enterovetépe oñemonguera. 17  Péro pe saserdóte guasu* ha umi oĩva hendive, haʼéva umi saduséo* sektapegua*, opuʼã ha ipochyeterei*. 18  Upévare ojagarra hikuái umi apóstolpe ha ogueraha chupekuéra kárselpe. 19  Péro upe pyharépe Jehová ánhel ou oavri pe kársel rokẽ, oguenohẽ chupekuéra ha heʼi: 20  “Tapeho témplope ha akóinte peñeʼẽ umi héntepe jeikove opaveʼỹva rehe”. 21  Ohendu rire upéva, oike hikuái témplope koʼẽju jave ha oñepyrũ oporomboʼe. Upéi og̃uahẽvo pe saserdóte guasu ha umi oĩva hendive, heʼi hikuái oñembyaty hag̃ua pe Sanedrín* ha entéro umi karai guasukuéra Israelgua, avei omondo umi guárdia ogueru hag̃ua chupekuéra kárselgui. 22  Péro umi guárdia og̃uahẽvo ndotopái umi apóstol rehe. Upémarõ ou jey omombeʼu hag̃ua chupekuéra. 23  Heʼi hikuái: “Pe kársel rotopa oñemboty porã, ha umi guárdia oñemboʼyjoa hína okẽme, upéi roavrívo ndorotopái avavépe hyepýpe”. 24  Ohendúvo koʼã mbaʼe pe kapitán templopegua ha umi saserdóte ruvichakuéra* opyta ojepyʼapy, ndoikuaáigui mbaʼépepa opáta koʼã mbaʼe. 25  Upe rire og̃uahẽ peteĩ karai ha heʼi chupekuéra: “¡Péina! Umi kuimbaʼe pegueraha vaʼekue kárselpe, oime koʼág̃a oñemboʼy hína pe témplope ha omboʼe umi héntepe”. 26  Upémarõ pe kapitán ogueraha isoldadokuéra ha oho ogueru chupekuéra, péro ndotratavaíri umi apóstolpe, okyhyjégui umi hénte ojapírõ g̃uarã chupekuéra itápe. 27  Upémarõ ogueru chupekuéra pe Sanedrínpe. Upépe pe saserdóte guasu ombaʼeporandu chupekuéra ha 28  heʼi: “Roʼe porã kuri peẽme anivéma hag̃ua pemboʼe avavépe pe kuimbaʼe rérape, ha ¡péina!, pemyenyhẽma Jerusalén koʼã mbaʼe pemboʼévagui, ha pemoĩse katuete ore akã ári ko kuimbaʼe ruguykue”. 29  Pedro ha umi ótro apóstol ombohovái: “Ore oreñeʼẽrendu vaʼerã Ñandejárape ore ruvicháramo, yvyporakuérape rangue. 30  Ñande rukuéra ypykue Jára omopuʼã jey Jesúspe, pe kuimbaʼe peẽ pejuka vaʼekue pemosaingóvo yvyráre. 31  Chupe Ñandejára ombotuicha ha omboguapy ideréchape. Omoĩ chupe ikatu hag̃uáicha osalva ha omoingove umi héntepe*. Ñandejára ojapo upéva umi Israelgua ikatu hag̃uáicha oñarrepenti* ha oñeperdona chupekuéra ipekádo. 32  Ore rohecha koʼã mbaʼe ha pe espíritu sánto avei, Ñandejára omeʼẽva umi iñeʼẽrendúvape chupe mburuvicháramo”. 33  Ohendúvo koʼã mbaʼe ipochyeterei hikuái ha ojukase chupekuéra. 34  Péro opuʼã pe Sanedrínpe peteĩ fariséo*, hérava Gamaliel, haʼe peteĩ mboʼehára leipegua* oñemombaʼetereíva umi hénte apytépe, ha omanda toñeguenohẽ okápe sapyʼaite umi kuimbaʼépe. 35  Ha heʼi: “Kuimbaʼekuéra Israelgua, peñatende porãkena upe pejaposévare koʼã kuimbaʼére. 36  Por ehémplo, ndaʼareiete opuʼã Teudas, oñemoherakuã guasu opárupi, ha cuatrocientos kuimbaʼérupi omoirũ chupe. Péro upéi ojejuka Téudaspe, ha entéro umi iñeʼẽrendúva chupe isarambipa ha opa rei. 37  Upe rire, opuʼã vaʼekue avei Judas pe galiléo, ojejapórõ guare pe sénso, ha heta hénte ogueraha hapykuéri. Péro ko kuimbaʼe ou omano, ha entéro umi iñeʼẽrendúva chupe isarambipa opárupi. 38  Jahecha rire koʼã mbaʼe, haʼemíta peẽme: Ani pejapo mbaʼeve koʼã kuimbaʼére, pepoínte chuguikuéra (ko tembiapo térã umi mbaʼe ojaposéva hikuái oúramo yvyporakuéragui, katuete opa rei jeýta. 39  Péro oimérõ ou Ñandejáragui, napendepuʼakamoʼãi hesekuéra); cháke amo ipahápe ikatu hína peñemoĩ Ñandejárare”. 40  Upémarõ ojapo hikuái haʼe heʼíva, ohenói umi apóstolpe, ha ombyepoti rire, heʼi chupekuéra anivéma hag̃ua ni mbaʼevéicharõ oporomboʼe Jesús rérape, upéi opoi chuguikuéra. 41  Haʼekuéra katu osẽ pe Sanedríngui vyʼapópe, Ñandejára ohejágui ojeapoʼi chupekuéra Jesús réra rehehápe. 42  Upe rire káda día pe témplope ha umi ogahárupi omboʼe ha oikuaauka meme hikuái pe marandu porã* oñeʼẽva Cristo* Jesús rehe.

Nóta

Ehecha “Satanás”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha Informasión Oĩvéva 1.
Ehecha “Kongregasión”, diksionário oĩva ko Bíbliape.
Ehecha “Saserdóte Guasu”, diksionário oĩva ko Bíbliape.
Ehecha “Saduséo”, diksionário oĩva ko Bíbliape.
Ehecha “Sékta”, diksionário oĩva ko Bíbliape.
Térã: “iselosoiterei”.
Ehecha “Sanedrín”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Térã: “haʼe hag̃ua Agente Principal”. Ehecha “Agente Principal”, diksionário oĩva ko Bíbliape.
Ehecha “Arrepentimiénto”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Cristo”, diksionário oĩva ko Bíbliape.