Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hechos 19:1-41

19  Upe tiémpope avei, Apolos oĩ aja Coríntope, Pablo ohasa umi sérrorupi ha oguejy Éfesope, upépe ojuhu una partída disípulo,  ha heʼi chupekuéra: “¿Peẽme piko oñemeʼẽ raʼe espíritu sánto* peñepyrũrõ guare pejerovia?”. Haʼekuéra heʼi: “¿Mbaʼére piko?, ore ni norohendúiva oĩha espíritu sánto”.  Haʼe heʼi: “¿Mbaʼéicha piko peẽ pejevautisa* raʼe?”. Haʼekuéra heʼi: “Rojevautisa Juan omboʼe haguéicha”.  Upévo Pablo heʼi: “Juan ovautisa vaʼekue umi héntepe, haʼekuéra ohechauka hag̃ua oñarrepentiha*, ha heʼi enterovépe ojerovia hag̃ua upe haʼe rire oútava rehe, upéva hína Jesús”.  Ohendúvo koʼã mbaʼe ojevautisa hikuái ñande Ruvicha Jesús rérape.  Pablo katu omoĩ ipo hiʼarikuéra, upévo oguejy hesekuéra espíritu sánto, ha oñepyrũ oñeʼẽ hikuái diferénte idióma ha oprofetisa*.  Oñondivepa oĩ hikuái doce kuimbaʼérupi.  Upéi Pablo oike pe sinagógape*, ha tres mése aja pyʼaguasúpe oñeʼẽ, ojapo diskúrso oñeʼẽva Ñandejára Rréinore ha oñehaʼã oikekuaa umi héntepe opoko hag̃ua ikorasõre.  Péro oĩ umi oñemohatã, ndogueroviaséi ha okopíva Ñandejára Rapére umi hénte renondépe, upémarõ Pablo oheja chupekuéra ha ogueraha hendive umi disípulope. Ha káda día ojapo diskúrso Tirano mboʼehaópe. 10  Ojapo upéva dos áñore, upéicha rupi opavave oikóva Ásiape*, tahaʼe hudío térã griégo ohendu Ñandejára Ñeʼẽ. 11  Ha Ñandejára osegi ojapo milágro tuichaitereíva Pablo rupive. 12  Ojegueraha umi hasývape páño ha delantál haʼe oiporu vaʼekue ha okuera hikuái, avei umi demónio* osẽmba chuguikuéra. 13  Péro oĩ avei hudío okorréva opárupi omosẽ hag̃ua demóniope, ha oiporusemoʼã hikuái ñande Ruvicha Jesús réra heʼívo umi oñendemoniávape: “Jesús, upe Pablo opredikáva rérape, haʼe peẽme pesẽ hag̃ua”. 14  Oĩ peteĩ saserdóte ruvicha* hudío hérava Esceva, haʼe oreko siete itaʼýra ojapóva avei upéva. 15  Pe demónio katu ombohovái chupekuéra: “Che aikuaa Jesúspe ha Páblope, péro ¿máva piko peẽ?”. 16  Upévo pe endemoniádo opo ojepoi hiʼarikuéra, ha ipuʼaka hesekuéra, upémarõ haʼekuéra odipara opívo upe ógagui ha oñelastima vaipa chupekuéra. 17  Ha opavave oikuaa upéva, tahaʼe hudío térã griégo oikóva Éfesope; ha enterovéva opyta okyhyjepa. Ñande Ruvicha Jesús réra katu oñembotuichave ohóvo. 18  Ha heta ojerovia vaʼekue ou omombeʼu ha oikuaauka umi mbaʼe ojapóva, opavave renondépe. 19  Avei heta umi ojapóva máhia ogueru ilivrokuéra, ombyaty ha ohapy opavave renondépe. Ha okalkulávo hikuái mboýpa ovale, otopa ohupytyha cincuenta mil monéda de pláta. 20  Péicha Jehová* Ñeʼẽ tuicha puʼaka reheve okakuaa ha imbareteve ohóvo. 21  Oikopa rire koʼã mbaʼe, Pablo odesidi* ohotaha Jerusalénpe, ohasa rire Macedonia ha Acáyarupi, ha heʼi: “Ag̃uahẽ rire upépe, ahasa vaʼerã avei Rómape”. 22  Upémaramo omondo Macedóniape mokõi hembijokuái, Timoteo ha Erasto, péro haʼe opytamie Ásiape. 23  Upe tiémpope oiko tuicha guyryry Ñandejára Rape káusare. 24  Peteĩ platéro hérava Demetrio ojapo plátagui nícho Ártemispe g̃uarã, ha upéicha omogana heta pirapire umi artesánope. 25  Demetrio ombyaty chupekuéra ha ótro ojehekáva koʼã mbaʼépe ha heʼi: “Kuimbaʼekuéra, peẽ peikuaa porã ko negósio rupive ñaganaha heta pirapire. 26  Pehendu ha pehechaháicha, ndahaʼéi voi Éfesope añónte Pablo oikóva omboliga umi héntepe okambia hag̃ua opensa lája, heʼívo umi ñandejára ñande jajapóva ndahaʼeiha mbaʼeve. Upéva ojapóma avei oparupiete Ásiarupi. 27  Ha ivaiveha, koʼág̃a enterove oñeʼẽ vaítama ñane negósiore. Ha ipahápe ñande diósa tuichaite Ártemis tupao opyta reíta. Peẽ peikuaaháicha, enterovévante Ásiape ha oparupiete ko yvy ape ári omombaʼeguasu Ártemispe, péro koʼág̃a opytáta tesaráipe”. 28  Ohendúvo upéva umi kuimbaʼe ipochyeterei ha oñepyrũ osapukái: “¡Ndaipóri Ártemis Efesogua rasaharã!”. 29  Upévo oiko tuicha guyryry upe siudápe, oñondivepa umi henteita ojasuru pe teátrope ha tyryryhápe ogueraha Gayo ha Aristárcope, koʼãva hína masedónio oviaháva jepi Pablo ndive. 30  Pablo katu oikesemoʼã pe hénte atýpe, péro umi disipulokuéra ojoko chupe. 31  Ha umi omoakãva fiésta ha huegokuéra imbaʼeporãva hendive, heʼika chupe anínte hag̃ua oike pe teátrope ikatúgui ojejuka upépe. 32  Upe aja umi hénte osapukaipa, peteĩva heʼi kóicha, umi ótro katu amóicha, ha ipyʼatarovapa hikuái. Oĩ voi heta ni ndoikuaáiva mbaʼérepa oñembyaty upépe. 33  Upémaramo haʼekuéra oñondivepa oguenohẽ Alejándrope pe atýgui, ha umi hudío omyaña chupe tenonde gotyo. Alejandro katu oseñea umi héntepe ohendumi hag̃ua chupe. 34  Opillávo hikuái haʼe hudioha, oñepyrũ osapukái oñondivepa: “¡Ndaipóri Ártemis Efesogua rasaharã!”, ha péicha osegi osapukái dos órarupi. 35  Hasypeve pe intendénte omokirirĩ umi henteitápe ha heʼi: “Kuimbaʼekuéra Efesogua, ¿máva piko ndoikuaái Éfeso haʼeha pe siuda oñangarekóva Ártemis ipoderosaitéva tupaóre ha pe haʼanga yvágagui hoʼa vaʼekuére? 36  Añetehápe ndaipóri onega vaʼerã koʼã mbaʼe, upévare iporãve peñetrankilisa ha ani pejapo vyrorei. 37  Koʼã kuimbaʼe peguerúva koʼápe ningo ndoikói omonda tupaokuérape ni ndotakýi* ñande diósa Ártemis rehe. 38  Upévare Demetrio ha umi artesáno oĩva hendive oguerekórõ heʼi vaʼerã koʼãva kóntrape, haʼekuéra oikuaa porã arakaʼépa oñeñatende umi trivunálpe, ha upépe oĩha umi governadór ohusga hag̃ua koʼã mbaʼe. 39  Péro peipotáramo ojehecha ótra kósa, upéva ojedesidi vaʼerã umi hénte ko siudapegua oñembyaty vove pe léi heʼiháicha. 40  Cháke ko jajapo vaʼekuére koestedía, ikatu ojeʼe ñanderehe ñapuʼãha mburuvichakuérare. Ndajarekói ningo jaʼe vaʼerã oñeporandúrõ ñandéve mbaʼérepa jajapo koichagua sarambi”. 41  Heʼipávo koʼã mbaʼe, omondopa umi héntepe.

Nóta

Ehecha “Espíritu Sánto”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Arrepentimiénto”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Ehecha nóta oĩva Hch 2:9-pe.
Ehecha “Demónio”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Ehecha Informasión Oĩvéva 1.
Griégope heʼi: “odesidi ijespíritupe”.
Ehecha “Blasfemia”, diksionário oĩva ko Bíbliape.