Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hechos 18:1-28

18  Upe rire Pablo osẽ Aténasgui ha og̃uahẽ Coríntope.  Ha otopa peteĩ hudíore hérava Áquila, haʼe ningo Pontogua ha og̃uahẽ ramoite Itáliagui hembireko Priscílandi, Claudio omosẽmba rupi umi hudíope Rómagui. Upémarõ haʼe oho hendivekuéra.  Haʼekuéra ningo ojapo óga kárpa* ha Pablo upéichante avei, upévare haʼe opyta ombaʼapo hendivekuéra.  Péro káda sábado* ojapo diskúrso sinagógape*, ha oikekuaa rupi umi hudío ha griégope, ojerovia hikuái.  Upéi Silas ha Timoteo oguejy rire Macedóniagui, Pablo oñemeʼẽmbaite opredika hag̃ua Ñandejára Ñeʼẽ umi hudíope, ha ohechauka chupekuéra Jesús haʼeha pe Cristo*.  Péro haʼekuéra osegi oñemoĩ Páblore ha okopi hese, upémarõ haʼe oityvyro ijao ha heʼi: “Pende ruguy topyta pene akã ári, che chepotĩ. Koʼág̃a guive aháta umi tetã ambuegua rendápe”.  Upe rire oho Ticio Justo rógape, ko kuimbaʼe ningo omombaʼeguasu Ñandejárape, ha hóga oĩ pe sinagóga ykére.  Crispo, pe mburuvicha sinagogapegua, ha hogayguakuéra ojerovia ñande Ruvicháre. Ha heta hénte Corintogua ojerovia avei ha ojevautisa*.  Peteĩ pyharépe ñande Ruvicha heʼi Páblope peteĩ visión* rupive: “Ani rekyhyje, esegi eñeʼẽ ha ani rekirirĩ, 10  che aimégui nendive avave nanenupãmoʼãi ni nandetratavaimoʼãi; ko siudápe ningo oĩ heta ojeroviátava cherehe”. 11  Upémaramo opyta upépe ijapytepekuéra omboʼe Ñandejára Ñeʼẽ un áño seis mésere. 12  Galión haʼérõ guare governadór Acáyape, umi hudío oñemoĩ peteĩ ñeʼẽme opuʼã hag̃ua Páblore, ogueraha chupe trivunálpe 13  ha heʼi hikuái: “Ko kuimbaʼe oiko omboliga umi héntepe okambia hag̃ua omombaʼeguasu lája Ñandejárape, ha péicha rupi oñemoĩ hikuái pe léi rehe”. 14  Pablo oñeʼẽta javete, Galión osẽ heʼi umi hudíope: “Peẽ hudiokuéra, ko kuimbaʼe ojapórire peteĩ mbaʼe hekopeʼỹ térã ivaietereíva, che chepasiénsia vaʼerãmoʼã pohendu hag̃ua. 15  Péro peiko vaítaramo ñeʼẽre, térare ha pende léi rehe, pejecha peẽ. Che ndahusgaséi koʼã mbaʼe”. 16  Upévo omosẽ chupekuéra pe trivunálgui. 17  Upémarõ ojagarra hikuái Sóstenespe, mburuvicha sinagogapegua, ha oñepyrũ ombyepoti chupe trivunál renondépe. Péro Galiónpe ndoúi ni ndohói la haʼekuéra ojapóva. 18  Pablo katu opyta rire upépe heta árare, ojedespedi umi ermánogui, ojupi várkope ha oho Síriape, Priscila ha Áquilandi. Cencréaspe ningo haʼe oñemoakãperõ kuri okumpli hag̃ua opromete vaʼekue Ñandejárape. 19  Upéi, og̃uahẽvo hikuái Éfesope, Pablo oheja chupekuéra upépe, péro haʼe oike sinagógape omboʼe umi hudíope ha oipytyvõ chupekuéra ojepyʼamongeta hag̃ua. 20  Haʼekuéra ojeruréramo jepe chupe opytave hag̃ua, haʼe ndopytái. 21  Ojedespedi guei chuguikuéra ha heʼi: “Jehová* oipotáramo, aju jeýta pene rendápe”. Upéi ojupi várkope Éfesope, 22  oguejy Cesaréape, ojupi osaluda pe kongregasiónpe* ha oguejy Antioquíape. 23  Opyta rire peteĩ tiémpore upépe, oho okorre umi siuda oĩvare Galacia ha Frigia tuichakuére omombarete hag̃ua enterove disípulope*. 24  Upérõ og̃uahẽ Éfesope peteĩ hudío Alejandriagua hérava Apolos, haʼe iñeʼẽkuaa ha oikuaa porã Ñandejára Ñeʼẽ. 25  Chupe ningo oñehekomboʼe vaʼekue Jehová rapére, ha espíritu rupive kyreʼỹme oporomboʼe ha oñeʼẽ hekoitépe Jesús rehe. Péro haʼe oikuaa pe vautísmo Juan opredika vaʼekue añónte. 26  Ha oñepyrũ oñeʼẽ pyʼaguasúpe sinagógape. Priscila ha Áquila ohendúvo chupe, ogueraha hendivekuéra ha omyesakã porãve chupe Ñandejára rape. 27  Apolos ohose avei Acáyape, upémarõ umi ermáno ohai kárta umi disípulope ha ojerure chupekuéra torresivi chupe torypápe. Upépe oĩ vaʼekue ojeroviáva Ñandejára imbaʼeporãiterei* haguére, ha Apolos og̃uahẽvo tuichaiterei oipytyvõ chupekuéra 28  kyreʼỹme ha hekoitépe ohechauka rupi opavave renondépe umi hudío ojavyha, ha Ñandejára Ñeʼẽ rupive ohechauka Jesús haʼeha pe Cristo.

Nóta

Oiméne ojejapo mymba pirégui.
Ehecha “Sábado”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Visión”, diksionário oĩva ko Bíbliape.
Ehecha Informasión Oĩvéva 1.
Ehecha “Kongregasión”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “ohechauka rupi mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.