Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hechos 13:1-52

13  Upérõ oĩ vaʼekue kongregasión* Antioquíape proféta* ha mboʼeharakuéra. Umíva hína Bernabé, Symeón oñehenóiva avei Niger, Lucio Cirenegua, Saulo ha Manaén, haʼe ningo mburuvicha Herodes kompañerokue ostudiárõ guare.  Haʼekuéra oajuna ha omombaʼeguasu aja Jehovápe*, espíritu sánto* heʼi: “Enterove umi hénte apytégui, pemboyke chéve Bernabé ha Sáulope. Che aiporavo chupekuéra ojapo hag̃ua peteĩ tembiapo”.  Upémaramo haʼekuéra oajuna, oñemboʼe, omoĩ ipo hiʼarikuéra ha oheja chupekuéra oho.  Upémarõ, koʼã kuimbaʼe oñemondóva espíritu sánto rupive oguejy Seléuciape, upépe ojupi peteĩ várkope ha oho Chíprepe.  Og̃uahẽvo hikuái Salamínape, oikuaauka Ñandejára Ñeʼẽ umi hudío sinagógape*. Haʼekuéra ogueraha avei Juánpe oipytyvõ hag̃ua chupekuéra.  Ohasapa rire hikuái pe ísla og̃uahẽ Páfospe, upépe otopa peteĩ hudío hérava Bar-Jesús, haʼe ningo pajeséro ha proféta japu,  ha oĩ Sergio Paulo ndive, pe governadór* upepegua. Ko kuimbaʼe iñakãporã ha ohenoika Bernabé ha Sáulope ohendusetereígui Ñandejára Ñeʼẽ.  Péro pe pajeséro Elimas oñemoĩ hesekuéra ndoipotáigui pe governadór ojerovia ñande Ruvicháre (Elimas heʼise pajeséro).  Saulo, hérava avei Pablo, henyhẽ espíritu sántogui, omaña porã hese 10  ha heʼi: “Nde tekove japu, mbaʼe vai apoha, Satanás* raʼy, reikóva reñemoĩ opa mbaʼe iporãvare, ¿arakaʼe peve piko reñehaʼãta rembyai Jehová rape hekopeguáva? 11  Koʼág̃a Jehová ndekastigáta, repytáta siégo ha are porã nderehechamoʼãvéima pe kuarahy ohesapérõ”. Upepete hesa iñapatĩmba, hoʼa hese pytũ ha oñepyrũ oheka mávapa ikatu ogueraha chupe ipógui. 12  Pe governadór ohechávo pe oikóva, ojerovia pe marandu porãre*, oponderaitereígui umi mbaʼe oaprendéva Jehovágui. 13  Upéi Pablo ha iñirũnguéra ojupi várkope Páfospe ha og̃uahẽ Perga de Panfíliape. Juan katu oheja chupekuéra ha oho jey Jerusalénpe. 14  Péro haʼekuéra osegínte oho Pérgagui ha og̃uahẽ Antioquía de Pisídiape; ha pe sábado* oike oguapy pe sinagógape. 15  Ojelee rire pe Léi* ha Profetakuéra kuatiañeʼẽ, umi mburuvicha sinagogapegua heʼika chupekuéra: “Ermanokuéra, perekóramo peteĩ marandu omokyreʼỹ vaʼerã koʼã héntepe koʼág̃a ikatu peje”. 16  Upémarõ Pablo opuʼã, oseñea chupekuéra okirirĩ hag̃ua ha heʼi: “Peẽ kuimbaʼe Israelgua ha opavave pekyhyjéva Ñandejáragui, pehendumína. 17  Israel Jára ningo oiporavo vaʼekue umi ñande ru ypykuépe, ha oikórõ guare hikuái arrivéñoicha Egíptope, oipytyvõ chupekuéra ha oiporu ipodér tuichaitéva oguenohẽ hag̃ua chupekuéra upégui. 18  Ha pe desiértope, cuarenta áñorupi oaguanta chupekuéra. 19  Ohundi rire siete tetã oĩva Canaánpe, ombojaʼo pe yvy umi isrraelítape. 20  Opa koʼã mbaʼe oiko cuatrocientos cincuenta áño pukukuérupi. ”Upe rire omoĩ chupekuéra umi hués, proféta Samuel tiémpo peve. 21  Upéi ojeruréma hikuái peteĩ rréi, ha Ñandejára omoĩ Saúlpe ha ogoverna cuarenta áñore. Haʼe ningo Quis raʼy ha Benjamín trivugua. 22  Ñandejára omboyke rire chupe, omoĩ Davídpe rréiramo, haʼe oñeʼẽ vaʼekue voi hese ha heʼi: ‘Aguerohoryete ningo David, Jesé raʼýpe, haʼe ojapóta opa mbaʼe che aipotáva’. 23  Ko kuimbaʼe ñemoñarégui, Ñandejára ogueru Jesúspe osalva hag̃ua Israélpe ha péicha okumpli opromete vaʼekue. 24  Ou mboyve Haʼe, Juan opredika vaʼekue enterove Israelguápe ojevautisa* vaʼerãha ohechauka hag̃ua oñarrepentiha*. 25  Péro Juan omohuʼãmbotávo hembiapo heʼi: ‘¿Mbaʼépa pepensa cherehe? Che ndahaʼéi hína upe peẽ peimoʼãva. Péro pe che rire oútava, che namereséi ni isandália sã ajora chupe ipýgui’. 26  ”Ermanokuéra, peẽ haʼéva Abrahán ñemoñare raʼykuéra, ha opavave okyhyjéva Ñandejáragui, haʼe ombou ñandéve ko marandu oikuaaukáva mbaʼéichapa ikatu jajesalva. 27  Péro umi Jerusalénpe oikóva ha umi mburuvicha ndohechakuaái vaʼekue pe kuimbaʼe haʼe hague pe Mesías*, haʼekuéra ohusgávo chupe, okumpli Profetakuéra heʼi vaʼekue. Ha koʼã mbaʼe ojelee jepi káda sábado. 28  Ha ndojuhúiramo jepe mbaʼérepa ojejuka vaʼerã, haʼekuéra ojerure Pilátope tojejuka chupe. 29  Ha ojejapopa rire opa mbaʼe ojehai vaʼekue hese Ñandejára Ñeʼẽme, oñemboguejy pe yvyrágui ha oñemoĩ sepultúrape. 30  Péro Ñandejára omopuʼã chupe omanóva apytégui, 31  ha heta árare ojechauka umi ou vaʼekuépe hendive Galiléagui Jerusalénpe ha koʼág̃a haʼekuéra oñeʼẽ hese umi héntepe. 32  ”Upévare ore koʼág̃a roikuaauka peẽme umi marandu porã oñepromete vaʼekue ñande rukuéra ypykuépe. 33  Ha upéva Ñandejára okumplipaite ñande itaʼyrakuéra rehehápe, omoingove jeývo Jesúspe, ojehai haguéicha sálmo dóspe: ‘Nde hína che raʼy, koestedía che aiko nde Túvaramo’. 34  Haʼe omoingove jey chupe omanóva apytégui ani hag̃ua arakaʼeve hete oñembyai, ha upéva ohechaukáma vaʼekue heʼívo: ‘Añetehápe ahechaukáta peẽme chembaʼeporãha*, Davídpe apromete haguéicha’. 35  Upévare ótro sálmo heʼi avei: ‘Nderehejamoʼãi ne rembiguái jeroviaha retekue oñembyai’. 36  David katu oservi vaʼekue Ñandejárape oikove aja, upéi omano*, oñeñotỹ umi ijypykuerakuéndi ha hete oñembyai. 37  Pe Ñandejára omopuʼã vaʼekue katu noñembyaíri. 38  ”Che ermanokuéra, che aikuaauka peẽme ko kuimbaʼe rupive oñeperdonaha peẽme pende pekádo. 39  Ndaikatúi ningo penderekojoja Moisés Léi rupive, péro ko kuimbaʼe omano rupi, entéro ogueroviáva ikatu hekojoja Ñandejára renondépe. 40  Upévare peñatendékena ani oiko penderehe umi Proféta kuatiañeʼẽme heʼíva: 41  ‘Pemañáke hese peẽ peporoapoʼíva, pehecharamóke ha pejei che renondégui, che ajapógui pende árape peteĩ tembiapo ni mbaʼevéicharõ ndapegueroviamoʼãiva oĩramo jepe omombeʼupaitéva peẽme’”. 42  Upéi haʼekuéra osẽvo, umi hénte joʼa joʼa ojerure chupekuéra tou jey pe sábado oúvape, oñeʼẽ hag̃ua koʼã mbaʼére. 43  Opa rire pe aty sinagógape heta hudío ha umi oikéva hudiokuéra rrelihiónpe* omoirũ Pablo ha Bernabépe. Haʼekuéra katu heʼi umi héntepe osegi hag̃ua oiko Ñandejára mborayhúpe*. 44  Pe sábado oúvape haimete opavave oĩva upe siudápe, oñembyaty ohendu hag̃ua Jehová Ñeʼẽ. 45  Umi hudío ohechávo umi henteitápe, ojepichaiterei*; upémarõ oñemoĩ hikuái Páblore ha otaky* opa mbaʼe haʼe heʼívare. 46  Upémaramo pyʼaguasúpe Pablo ha Bernabé heʼi: “Tekotevẽ kuri Ñandejára Ñeʼẽ ojekuaauka peẽme raẽve. Péro peẽ napehenduséi ha upéicha pehechauka napemereseiha jeikove opaveʼỹva, upévare ¡péina!, rohóta umi tetã ambueguápe. 47  Jehová omandágui oréve heʼívo: ‘Romoĩ rehesape hag̃ua tetãnguérape, reikuaauka hag̃ua yvy paha peve mbaʼéichapa asalváta yvyporakuérape’”. 48  Ohendúvo upéva umi tetã ambuegua ovyʼajoa ha ombotuicha Jehová Ñeʼẽ, ha opavave oñehaʼãva ohupyty jeikove opaveʼỹva, ojerovia. 49  Avei Jehová Ñeʼẽ iñasãi ohóvo opárupi upe tetãme. 50  Umi hudío katu omboliga umi kuña iñimportánteva omombaʼeguasúva Ñandejárape ha umi poguasukuéra upe siudapeguápe opersegi hag̃ua Pablo ha Bernabépe, ha omosẽ chupekuéra upe siudágui. 51  Upémarõ haʼekuéra oityvyro ipýgui yvytimbo* ha oho Icóniope. 52  Umi disípulo* katu henyhẽ espíritu sántogui ha vyʼápe oiko.

Nóta

Ehecha “Kongregasión”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha Informasión Oĩvéva 1.
Ehecha “Espíritu Sánto”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Griégope heʼi: “prokónsul”.
Ehecha “Satanás”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Sábado”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Arrepentimiénto”, diksionário oĩva ko Bíbliape.
Ehecha “Mesías”, diksionário oĩva ko Bíbliape.
Térã: “mbaʼeporã ijojahaʼỹva”, ehecha diksionário oĩva ko Bíbliape.
Griégope heʼi: “oke”.
Griégope heʼi: “umi prosélito”.
Térã: “mbaʼeporã ijojahaʼỹvape”.
Térã: “iselosoiterei”.
Ehecha “Blasfemia”, diksionário oĩva ko Bíbliape.
Oityvyróvo ipýgui yvytimbo ohechauka ndorekoveimaha rresponsavilida hesekuéra.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.