Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hechos 12:1-25

12  Upe tiémpope rréi Herodes oñepyrũ opersegi umi ermáno kongregasionpegua.  Espádape ojuka Santiago, Juan ermánope.  Ha ohechávo umi hudíope ogustaha upe ojapóva, ojagarra avei Pédrope. (Upéva oiko pe Pan Ilevaduraʼỹva Arete* aja.)  Pe rréi oheja chupe préso ha omoĩ dieciséis soldádo oñangareko hag̃ua hese, umíva ojopyru cuatro a cuatro opyta hag̃ua oñatende. Herodes ningo oguerahase Pédrope umi hénte renondépe ohasa rire pe Páskua*.  Upévare Pedro oĩ kárselpe, péro pe kongregasión oñemboʼe meme hese Ñandejárape ipyʼaite guive.  Pe pyhare Herodes ogueraha mboyve chupe, Pedro oke hína mokõi soldádo paʼũme, oñeñapytĩ mokõi kadénape, ha pe kársel rokẽme oĩ avei guárdia oñatendéva.  Péro ¡péina!, Jehová ánhel oñemboʼy upépe, ha peteĩ mbaʼerendy ohesapepa pe kalavóso. Pe ánhel oñatõi Pédrope ikostádope, omombáy chupe ha heʼi: “¡Pyaʼe epuʼã!”. Upévo umi kadéna hoʼa ipógui.  Pe ánhel heʼi chupe: “Eñemonde ha eñapytĩ ne sandália”. Ha haʼe ojapo upéicha. Ipahápe heʼi chupe: “Emonde nde ao joʼaha ha eju che rapykuéri”.  Upémarõ Pedro osẽ ha oho hapykuéri, péro ndopillái añeteha pe ánhel ojapóva. Haʼe oimoʼã ohechanteha peteĩ visión*. 10  Ha ohasa hikuái mokõi guárdia aty renondérupi, og̃uahẽ pe okẽ de iérrope oñesẽhárupi ojeho hag̃ua pe siudápe, ha pe okẽ ojavri ijeheguínte. Osẽ rire upégui osegi hikuái peteĩ tapére, ha upepete pe ánhel oheja chupe. 11  Upévo Pedro opilla sapyʼa la oiko vaʼekue ha heʼi: “Koʼág̃a añetehápe aikuaa Jehová ombou hague hiʼánhel cheguenohẽ hag̃ua Herodes poguýgui ha opa mbaʼe umi hudío oipota vaʼekuégui oiko cherehe”. 12  Ohechakuaa rire ko mbaʼe, Pedro oho María rógape, haʼe ningo Juan sy upe oñehenóivape avei Marcos, upépe oĩ heta oñembyatýva ha oñemboʼe hína. 13  Pedro ombotávo pe okẽ, ou oñatende hese peteĩ sirviénta hérava Rode, 14  iñeʼẽre opilla haʼeha Pedro ha ovyʼaitereígui ndoavríri pe okẽ. Upéva rangue odipara oike jey hendapekuéra omombeʼu Pedro oñemboʼyha hína pe okẽme. 15  Haʼekuéra heʼi chupe: “Ndetarováma ningo”. Péro haʼe heʼi jey jey upeichaha. Haʼekuéra oñepyrũ heʼi: “Péva hiʼánhel”. 16  Pedro katu opyta upépe ha ombota pe okẽ. Haʼekuéra oavrívo ohecha chupe ha opyta ijurujaipa. 17  Péro haʼe oseñea chupekuéra ipópe okirirĩ hag̃ua, ha omombeʼupaite mbaʼéichapa Jehová oguenohẽ chupe kárselgui. Ha heʼi: “Pemombeʼumi koʼã mbaʼe Santiago ha umi ermánope”. Ha osẽ oho ótro hendápe. 18  Koʼẽmba rire oiko tuicha guyryry umi soldadokuéra apytépe, ndoikuaáigui hikuái mbaʼépa oiko raʼe Pédrogui. 19  Herodes oheka chupe oparupiete, ha ndojuhúimaramo, ombaʼeporandu umi guárdiape ha omanda ojegueraha hag̃ua ojekastiga chupekuéra. Upéi oguejy Judéagui Cesaréape ha opyta upépe sapyʼami. 20  Upéi Herodes oñorairõse umi Tiro ha Sidongua ndive. Péro haʼekuéra ojogua jepi hiʼupy Herodes retãgui ha upévare oiko porãse jey hendive. Upearã oñemoĩ hikuái peteĩ ñeʼẽme ha ou oñeʼẽ raẽ Blasto ndive, haʼe ningo oreko ikárgope pe rréi róga. 21  Péro peteĩ díape Herodes omonde ao porã omimbipáva, oguapy pe tarímape ha oñepyrũ ojapo peteĩ diskúrso opavave renondépe. 22  Upévo umi henteita ijatýva upépe oñepyrũ osapukái: “¡Ko oñeʼẽva ndahaʼéi yvypóra, peteĩ ñandejára voi katu!”. 23  Upepete Jehová ánhel okastiga chupe nombotuichái haguére Ñandejárape, upévare haʼe oñepyrũ hasopa ha omano. 24  Jehová Ñeʼẽ katu iñasãive ohóvo ha hetave oĩ ojeroviáva. 25  Bernabé ha Saulo katu oipytyvõ rire umi oikotevẽvape Jerusalénpe, ou jey Antioquíape ha ogueraha hendivekuéra Juánpe, oñehenóiva avei Marcos.

Nóta

Ehecha “Pan Ilevaduraʼỹva Arete”, diksionário oĩva ko Bíbliape.
Ehecha “Páskua”, diksionário oĩva ko Bíbliape.
Ehecha “Visión”, diksionário oĩva ko Bíbliape.