Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hechos 11:1-30

11  Upéi, umi apóstol* ha ermanokuéra oĩva Judéape, ohendu umi tetã ambuegua oguerovia hague avei Ñandejára Ñeʼẽ.  Upévare Pedro ojupívo Jerusalénpe, umi oipotáva ojejapo sirkunsisión, oñepyrũ ojodiskuti hendive.  Heʼi chupe hikuái haʼe oike hague umi kuimbaʼe noñesirkunsidáiva rógape ha okaru hague hendivekuéra.  Upévo Pedro omombeʼu porã chupekuéra mbaʼépa la oiko vaʼekue, heʼívo:  “Che aĩ kuri Jópepe ha añemboʼe jave hína, ahecha peteĩ visiónpe* oguejyha oúvo yvágagui peteĩ mbaʼyru ojoguáva peteĩ savana guasúpe, oñemboguejýva umi cuatro púntagui ha ou che renondetépe.  Amaña porã ha ahecha pype oĩha mymba ko yvy arigua cuatro ipýva, umi mymba saite, umi otyryrýva ha guyra yvagapegua.  Avei ahendu peteĩ heʼíva: ‘¡Pedro, epuʼã, ekarnea ha heʼu!’.  Che katu haʼe: ‘Ni mbaʼevéicharõ Karai, arakaʼeve ndaʼúiva mbaʼeve ikyʼa ha ñanembojeguarúva’.  Upéi, oñeʼẽ jey chéve yvága guive dos veseha ha heʼi: ‘Anive ere ikyʼaha umi mbaʼe Ñandejára omopotĩ vaʼekue’. 10  Upéva oiko jey tres veseha, ha upéi umi mbaʼe ojehupipaite jey yvágape. 11  Upe jave, ¡péina!, oñemboʼy pe óga renondépe mbohapy kuimbaʼe oñemboúva che rendápe Cesarea guive. 12  Upévo pe espíritu heʼi chéve aha hag̃ua hendivekuéra kyhyjeʼỹme. Péro koʼã seis ermáno oho avei chendive ha roike pe kuimbaʼe rógape. 13  ”Haʼe omombeʼu oréve ohecha hague peteĩ ánhel oñemboʼýva hógape ha heʼíva chupe: ‘Emondóna kuimbaʼe Jópepe ha ehenoika peteĩ kuimbaʼe héravape Simón, oñehenóiva avei Pedro, 14  ha haʼe heʼíta ndéve mbaʼe rupivépa rejesalváta nde ha nde rogaygua’. 15  Péro añepyrũvo añeʼẽ, oguejy hesekuéra espíritu sánto*, oguejy haguéicha avei ñanderehe ñepyrũrã. 16  Upépe chemanduʼa ñande Ruvicha heʼími vaʼekuére: ‘Juan ningo pendevautisa* ýpe, péro peẽ pejevautisáta espíritu sántope’. 17  Upéicharõ, Ñandejára omeʼẽramo chupekuéra pe rregálo, omeʼẽ haguéicha avei ñandéve jajeroviáva ñande Ruvicha Jesucristo rehe, ¿máva piko che astorva hag̃ua Ñandejárape?”. 18  Ohendúvo koʼã mbaʼe haʼekuéra ndojodiskutivéima Pédrondi, ombotuicha guei Ñandejárape ha heʼi: “¡Ñandejára omeʼẽ avei umi tetã ambueguápe oportunida oñarrepenti* hag̃ua, ikatu hag̃uáicha oikove hikuái!”. 19  Umi isarambipa vaʼekue oñembohasa asy rupi chupekuéra Esteban omano rire, oho Fenicia, Chipre ha Antioquíape. Péro haʼekuéra opredika umi hudíopente. 20  Upéicharamo jepe, ijapytepekuéra oĩ kuimbaʼe Chipre ha Cirenegua oúva Antioquíape ha oñemongeta hikuái umi hénte oñeʼẽva griégo ndive, ha omombeʼu chupekuéra pe marandu porã* oñeʼẽva ñande Ruvicha Jesús rehe. 21  Jehová* oĩ hendivekuéra, ha heta hénte oguerovia ha ojevy ñande Ruvicha rendápe. 22  Pe kongregasión* oĩva Jerusalénpe oikuaa ko oiko vaʼekue, ha omondo Bernabépe Antioquíape. 23  Haʼe og̃uahẽ rire, ovyʼaiterei ohechávo mbaʼéichapa Ñandejára ohechauka chupekuéra mbaʼeporã ijojahaʼỹva*, ha omokyreʼỹ enterovépe akóinte ojepytaso hag̃ua ñande Ruvicha ykére ipyʼaite guive. 24  Bernabé ningo peteĩ kuimbaʼe imbaʼeporãva, ijerovia mbaretéva ha henyhẽva espíritu sántogui. Ha hetaiterei hénte oguerovia ñande Ruvichápe. 25  Upéi haʼe oho Társope oheka oparupiete Sáulope, 26  ha ojuhu rire ogueru chupe Antioquíape. Péicha haʼekuéra oñembyaty hendivekuéra un áñore pe kongregasiónpe ha omboʼe hikuái hetaiterei héntepe. Ha Antioquíape, oñehenói ypy vaʼekue kristiáno* umi disípulope*. Ñandejára voi ombohéra chupekuéra péicha. 27  Umíva umi árape, una partída proféta* oguejy Jerusaléngui Antioquíape. 28  Peteĩva hérava Ágabo opuʼã ha pe espíritu rupive omombeʼu tuicha ñembyahýi outaha oparupiete ko yvy ape ári. Upéva oiko Claudio tiémpope. 29  Upémarõ umi disípulo odesidi káda uno omondotaha ikatumíva oipytyvõ hag̃ua umi ermáno oikóva Judéape. 30  Ojapo hikuái upéva ha ojevale Bernabé ha Sáulore ogueraha hag̃ua umi ansiánope*.

Nóta

Ehecha “Apóstol”, diksionário oĩva ko Bíbliape.
Ehecha “Visión”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Arrepentimiénto”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha Informasión Oĩvéva 1.
Ehecha “Kongregasión”, diksionário oĩva ko Bíbliape.
Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Kristiáno”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Profesía”, diksionário oĩva ko Bíbliape.
Ehecha “Ansiáno”, diksionário oĩva ko Bíbliape.