Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hechos 10:1-48

10  Upérõ Cesaréape oiko peteĩ kuimbaʼe hérava Cornelio, ofisiál ehersitopegua, oĩva peteĩ rrehimiénto Italiaguápe.  Haʼe peteĩ kuimbaʼe okyhyjéva Ñandejáragui ha omombaʼeguasúva chupe hogayguakuérandi, oipytyvõ umi oikotevẽvape, ha oñemboʼe meme Ñandejárape.  Peteĩ árape, kaʼaru las trésrupi* ohecha porãiterei peteĩ visiónpe* Ñandejára ánhel oikeha hendápe ha heʼi chupe: “¡Cornelio!”.  Cornelio katu omañávo hese tuichaiterei oñemondýi, ha oporandu: “¿Mbaʼe piko Karai?”. Pe ánhel heʼi chupe: “Ñandejára ohendu ha oguerohory ne ñemboʼe, ha haʼe ohecha mbaʼéichapa reipytyvõ hína umi oikotevẽvape.  Upévare, emondóna koʼág̃a kuimbaʼe Jópepe ha ehenoika peteĩ kuimbaʼe héravape Simón, oñehenóiva avei Pedro.  Haʼe opyta hína Simón ndive, pe kurtidór orekóva hóga mar rembeʼýpe”.  Oho rire pe ánhel oñeʼẽ vaʼekue chupe, Cornelio ohenói mokõi tembiguái hogapegua, ha ohenói avei peteĩ soldádo okyhyjéva Ñandejáragui, umi oñatende meméva hese apytégui.  Upéi omombeʼupaite chupekuéra upe oiko vaʼekue ha omondo Jópepe.  Pe ótro díape, haʼekuéra oho aja gueteri ha oñemoag̃uívo pe siudáre, las dócerupi*, Pedro ojupi terrásape oñemboʼe hag̃ua. 10  Péro haʼe ivareʼaiterei ha okaruséma. Ojejapo aja tembiʼurã, peteĩ visiónpe 11  ohecha pe yvága ojavri, ha oñemboguejyha peteĩ mbaʼyru ojoguáva peteĩ savana guasúpe, oñemboguejýva umi cuatro púntagui ko yvy ári. 12  Ha oĩ pype opaichagua mymba cuatro ipýva, avei umi mymba otyryrýva yvýre, ha guyra yvagapegua. 13  Ha ohendu peteĩ heʼíva chupe: “¡Pedro, epuʼã, ekarnea ha heʼu!”. 14  Pedro katu heʼi: “Ni mbaʼevéicharõ Karai, arakaʼeve ndaʼúiva mbaʼeve ikyʼa ha ñanembojeguarúva”. 15  Upéi, oñeʼẽ jey chupe dos veseha ha heʼi: “Anive ere ikyʼaha umi mbaʼe Ñandejára omopotĩ vaʼekue”. 16  Upéva oiko jey tres veseha, ha upepete pe mbaʼyru ojehupi yvágape. 17  Pedro katu nontendéi gueteri mbaʼépa heʼise pe visión ohecha vaʼekue, ha ¡péina!, upe jave oñemboʼy pe okẽme umi kuimbaʼe Cornelio omboúva ha oporandu vaʼekue oikóvo Simón rógare. 18  Haʼekuéra oñeʼẽ hatã ha oporandu oĩpa upépe Simón oñehenóiva avei Pedro. 19  Ha Pedro ojepyʼamongeta aja pe visión rehe, pe espíritu heʼi chupe: “¡Péina!, ndereka hína mbohapy kuimbaʼe. 20  Upévare epuʼã, eguejy ha tereho hendivekuéra kyhyjeʼỹme, che voi amboúgui chupekuéra”. 21  Upémarõ Pedro oguejy umi kuimbaʼe oĩháme ha heʼi: “¡Péina! Che hína upe pehekáva. ¿Maʼerãpa peju?”. 22  Haʼekuéra heʼi: “Orembou ne rendápe Cornelio, ofisiál ehersitopegua, haʼe peteĩ kuimbaʼe hekojoja ha okyhyjéva Ñandejáragui, enterovénte umi hudío oñeʼẽ porã hese. Peteĩ ánhel marangatu rupive Ñandejára heʼi chupe tanerenoika hógape, ohendu hag̃ua ne ñeʼẽ”. 23  Upémarõ haʼe oinvita chupekuéra oike hag̃ua opyta upépe. Koʼẽ rire opuʼã oho hendivekuéra ha una partída ermáno Jopegua oho avei hendive. 24  Pe ótro díape haʼe oike Cesaréape. Upépe ohaʼarõma chupekuéra Cornelio, haʼe ombyatýma ihénte ha umi iñamigoitépe. 25  Pedro oikévo, Cornelio ohug̃uaitĩ chupe, oñesũ henondépe ha omombaʼe chupe. 26  Pedro katu heʼi: “Epuʼã, che ningo kuimbaʼénte avei”. 27  Ha oñemongeta aja hendive oike ohóvo, ha otopa oñembyatyha upépe heta hénte, 28  ha heʼi chupekuéra: “Peẽ peikuaa porã ndovaleiha peteĩ hudío oñemoag̃ui ni ojeheʼa peteĩ kuimbaʼe ótro tetãyguáre, upéicharamo jepe Ñandejára ohechauka chéve ndovaleiha haʼe ni peteĩ kuimbaʼére ikyʼa térã chembojeguaruha. 29  Upévare, añehenoikárõ guare aju haʼeʼỹre mbaʼeve, ha koʼág̃a aporandu peẽme maʼerãpa peipota raʼe aju”. 30  Upévo Cornelio heʼi: “Ojapo cuatro día, añemboʼe hague che rógape kaʼaru las trésrupi, ha peichahágui ¡péina!, peteĩ kuimbaʼe ijao mimbipáva oñemboʼy che renondépe, 31  ha heʼi chéve: ‘Cornelio, Ñandejára ohendu ha oguerohory ne ñemboʼe, ha haʼe ohecha mbaʼéichapa reipytyvõ hína umi oikotevẽvape. 32  Jópepe oĩ peteĩ kuimbaʼe hérava Simón, oñehenóiva Pedro, haʼe opyta hína Simón ndive, pe kurtidór orekóva hóga mar rembeʼýpe, ehenoika chupe’. 33  Upévare pyaʼe porã amondo nde piári, ha aagradeseterei ndéve reju haguére. Ha koʼápe enterove ore roimembáma Ñandejára renondépe, rohendu hag̃ua opa mbaʼe Jehová* omandáva ndéve ere hag̃ua”. 34  Upévo Pedro heʼi: “Koʼág̃a añetehápe antende Ñandejára otrataha enterovépe peteĩchante, 35  haʼe oguerohory entéro umi hembiapo porãva ha okyhyjéva chugui, tahaʼe haʼéva tetãygua. 36  Ñandejára omondo iñeʼẽ Israel raʼykuérape oikuaauka hag̃ua chupekuéra marandu porã*. Upe marandu heʼi oĩtaha pyʼaguapy Jesucristo rupive, haʼe hína opavave Ruvicha. 37  Peẽ peikuaa mbaʼérehepa oñeñeʼẽ kuri oparupiete Judéare, oñepyrũ voi Galiléape Juan opredika rire pe vautísmo*. 38  Oñeñeʼẽ Jesús Nazaretguáre. Ñandejára oiporavo* chupe espíritu sánto* rupive ha omeʼẽ chupe podér. Ha haʼe okorre opárupi, ojapo heta mbaʼe porã ha omonguera umi ohasa asývape Aña* poguýpe, Ñandejára oĩ rupi hendive. 39  Koʼág̃a ore roikuaauka opa mbaʼe haʼe ojapo vaʼekue hudiokuéra retãme ha Jerusalénpe. Péro haʼekuéra ojuka chupe omosaingóvo yvyráre. 40  Ñandejára omopuʼã jey Chupe tres día haguépe, ha oheja umi hénte ohecha chupe, 41  péro ndahaʼéi enterove umi héntepe, síno oréve, rokaru ha romboyʼu vaʼekue hendive opuʼã rire omanóva apytégui. Ñandejára oreporavóma vaʼekue roikuaauka hag̃ua upéva. 42  Avei omanda oréve ropredika hag̃ua umi héntepe ha romombeʼu hag̃ua hekoitépe Ñandejára omoĩ hague Chupe ohusga hag̃ua oikovéva ha omanóvape. 43  Entéro umi proféta* oñeʼẽ vaʼekue Jesús rehe. Haʼekuéra heʼi héra rupive Ñandejára operdonataha ipekádo umi ojeroviávape hese”. 44  Pedro oñeʼẽ aja gueteri koʼã mbaʼére, oguejy espíritu sánto opavave umi ohendúvare Ñandejára Ñeʼẽ. 45  Ha umi ermáno hudío* ou vaʼekue Pedro ndive, oponderaiterei pe espíritu sánto oñeñohẽ haguére rregáloramo* umi tetã ambuegua ári. 46  Avei ohendu chupekuéra oñeʼẽha diferénte idiómape ha ombotuichaha Ñandejárape. Upévo Pedro ombohovái: 47  “Koʼã kuimbaʼépe oñemeʼẽ avei espíritu sánto, ñandéve oñemeʼẽ haguéicha, ¿máva piko upéicharõ heʼíta ndaikatuiha ojevautisa chupekuéra ýpe?”. 48  Upévo Pedro heʼi ojevautisa hag̃ua chupekuéra Jesucristo rérape. Ha haʼekuéra ojerure chupe opyta hag̃ua hendivekuéra peteĩ tiémpore.

Nóta

Griégope heʼi: “pe óra novénarupi”.
Ehecha “Visión”, diksionário oĩva ko Bíbliape.
Griégope heʼi: “pe óra séxtarupi”.
Ehecha Informasión Oĩvéva 1.
Ehecha “Marandu Porã”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Griégope heʼi: “ounhi”. Ehecha “Unhído”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “Diablo”, ehecha diksionário oĩva ko Bíbliape.
Ehecha “Profesía”, diksionário oĩva ko Bíbliape.
Griégope heʼi: “umi ermáno oñesirkunsidáva”.
Kóva hína pe katupyry Ñandejára omeʼẽva káda únope.