Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hebreos 9:1-28

9  Pe kompromíso* yma guare katu oreko vaʼekue Léi* heʼíva mbaʼéichapa ñamombaʼeguasu vaʼerã Ñandejárape, ha pe lugár marangatu oĩ vaʼekue ko yvy ape ári.  Pe primer koty oĩva upe ógape* haʼekuéra ohenói “Lugár Marangatu*”, ha upépe oĩ vaʼekue pe lámpara renda*, pe mesa, ha umi pan oñemoĩ vaʼekue Ñandejára renondépe.  Péro pe segunda kortína kupépe oĩ vaʼekue pe koty hérava “Lugár Imarangatuvéva*”.  Upépe oĩ vaʼekue peteĩ insiénso* ojehapyha de óro, ha pe árka del pákto* ijape kompletoitéva de óro, hyepýpe oĩ pe hárra de óro orekóva mana*, Aarón vastón hokypa vaʼekue, ha umi ita ojehai haguépe Ñandejára Léi.  Pe árka ári oĩ vaʼekue umi keruvín* omimbipáva omoʼãva pe árka tápa*. Péro koʼág̃a ndaikatúi ñañeʼẽ pukueterei koʼã mbaʼére.  Ojejapopa rire koʼã mbaʼe, umi saserdóte* pyʼỹi oike pe primer kotýpe omombaʼeguasu hag̃ua Ñandejárape.  Péro pe saserdóte guasu* oike vaʼekue haʼeño pe segundo kotýpe una ves káda áño. Haʼe katuete ogueraha tuguy oikuaveʼẽ hag̃ua ijehe ha umi pekádo ojapo vaʼekuére pe puévlo oikuaaʼỹre.  Péicha pe óga tenondegua oĩrõ guare gueteri ko yvy ape ári, pe espíritu sánto* oikuaauka neʼĩraha ojavri pe tape ñag̃uahẽ hag̃ua pe lugár marangatúpe.  Ko óga ningo peteĩ ehémplo ko tiémpope g̃uarã, ha koʼág̃a peve oñekuaveʼẽ gueteri jopói ha sakrifísio. Upéicharamo jepe, umíva ndaikatúi oipytyvõ yvyporakuérape omombaʼeguasu hag̃ua Ñandejárape konsiénsia* potĩ reheve, 10  síno ojejapónte tembiʼu, vevída ha diferénte vautísmo* rehe. Umi mandamiénto oĩva Moisés Léipe oñemeʼẽ ñande retépe g̃uarãnte ha ojejapo vaʼerã og̃uahẽ meve pe tiémpo oñemoĩ porã hag̃ua opa mbaʼe. 11  Péro Cristo* ou vaʼekue saserdóte guasúramo ojapo hag̃ua umi mbaʼe porã jaguerekóva koʼág̃a, ha upérõ haʼe oike pe óga tuichavéva ha iporãvévape, ndahaʼéiva yvypóra rembiapokue ni koʼapegua. 12  Haʼe oike pe lugár marangatúpe péro ndoguerahái kavara ni tororaʼy ruguy, ogueraha guei huguy tee; haʼe oike una ves ha opa ára g̃uarã, ha ñandesalva opaite ára g̃uarã. 13  Umi saserdóte oiporu kavara ha tóro ruguy, ha omosarambi pe vakílla tanimbukue umi oñemongyʼa vaʼekue ári, ha upéva omopotĩ chupekuéra Ñandejára renondépe. 14  Péro Cristo ruguy ovaleve umívagui. Cristo osegi rupi pe espíritu sánto opaveʼỹva, oñemeʼẽ ijupe voi Ñandejárape, orekoʼỹre mbaʼeve ivaíva. Péicha omopotĩ ñane konsiénsia umi tembiapo ovaleʼỹvagui ikatu hag̃uáicha jaservi Ñandejára oikovévape. 15  Upévare Cristo haʼe hína mediadór* pe kompromíso pyahúpe g̃uarã, ikatu hag̃uáicha umi ojeporavo vaʼekue ohupyty pe promésa oikovetaha opa ára g̃uarã. Upéva oiko haʼe omano rupi opaga* ha oguenohẽ hag̃ua chupekuéra umi tembiapo vai ojapo vaʼekuégui. Umíva haʼekuéra ojapo oĩrõ guare pe kompromíso yma guare poguýpe. 16  Peteĩ kuimbaʼe ojapo jave peteĩ kompromíso Ñandejára ndive, pe kuimbaʼe ojapóva pe kompromíso omano vaʼerã. 17  Oikove aja pe kuimbaʼe ojapóva pe kompromíso, ni mbaʼevéicharõ ndovalemoʼãi pe kompromíso. Upéva ovale hag̃ua oĩ vaʼerã omanóva*. 18  Pe kompromíso yma guare oñemoñepyrũ hag̃ua jepe, oñeñohẽ vaʼekue tuguy. 19  Moisés omombeʼu rire pe puévlope entéro mandamiénto oĩva pe Léipe, haʼe ojagarra tororaʼy ha kavara ruguy, ha ombojeheʼa ýre. Upéi ojagarra lána pytã asýva, oñapytĩ takuárare, omoinge pype ha ohypýi pe lívro ha entéro umi hénte ári, 20  ha heʼi: “Kóva hína pe tuguy pe kompromísope g̃uarã, Ñandejára omanda vaʼekue peẽme pekumpli hag̃ua”. 21  Ha upéicha avei ohypýi tuguýpe pe óga ha opa mbaʼe ojeporúva oñemombaʼeguasu hag̃ua Ñandejárape. 22  Upeichaite, pe Léi heʼi voi haimete opa mbaʼe oñemopotĩha tuguýpe, ha noñeñohẽiramo tuguy Ñandejára ndaikatúi operdona umi héntepe ipekadokuéra. 23  Upéicharõ, oñekotevẽ vaʼekue koʼã sakrifísiore, oñemopotĩ hag̃ua umi mbaʼe orrepresentáva umi mbaʼe yvagapegua. Péro oñekotevẽ sakrifísio iporãitevévare oñemopotĩ hag̃ua umi mbaʼe yvagapegua. 24  Cristo ndoikéi vaʼekue peteĩ lugár marangatu yvypóra ojapo vaʼekuépe, ojoguánteva pe lugár marangatu teetépe. Haʼe oike yvágape voi, oñepresenta hag̃ua Ñandejára renondépe ñanderehehápe. 25  Haʼe ndojapói upéva oñekuaveʼẽ hag̃ua ijupe voi sakrifísioramo heta vése, ojapoháicha pe saserdóte guasu oikéva káda áño pe lugár marangatúpe ha ogueraháva tuguy ndahaʼéiva imbaʼe. 26  Upéicharire haʼe ohasa asy vaʼerãmoʼã heta vése ko múndo* oñepyrũ guive. Péro koʼág̃a, ko múndo ára pahaite oñemoag̃uívo, haʼe ou una ves ha opa ára g̃uarã oipeʼaite hag̃ua pe pekádo. Upearã oñemeʼẽ ijupe voi sakrifísioramo. 27  Entéro kuimbaʼe ningo omanómante vaʼerã una ves ha opa ára g̃uarã, péro upe rire ojehusga vaʼerã chupekuéra. 28  Upéicha avei pe Cristo oñemeʼẽ una ves ha opa ára g̃uarã ogueraha hag̃ua hetágui ipekádo. Péro ág̃a ou jey vove, haʼe ndoumoʼãvéima oipeʼa hag̃ua umi pekádo, nahániri, haʼe oúta osalva hag̃ua umi ohaʼarõvape chupe.

Nóta

Térã: “pákto ỹrõ kontráto”.
Ehecha “Léi”, diksionário oĩva ko Bíbliape.
Térã: “óga kárpape”. Oiméne ojejapo mymba pirégui.
Ehecha “Lugár Marangatu”, diksionário oĩva ko Bíbliape.
Ehecha “Lámpara Renda”, diksionário oĩva ko Bíbliape.
Ehecha “Lugár Imarangatuvéva”, diksionário oĩva ko Bíbliape.
Ehecha “Insiénso”, diksionário oĩva ko Bíbliape.
Ehecha “Árka del Pákto”, diksionário oĩva ko Bíbliape.
Ehecha “Mana”, diksionário oĩva ko Bíbliape.
Ehecha “Keruvín”, diksionário oĩva ko Bíbliape.
Pe ñeʼẽ griégo ojetradusíva “tápa”, heʼise avei peteĩ sakrifísio omeʼẽva peteĩ kuimbaʼe Ñandejára operdona hag̃ua chupe.
Ehecha “Saserdóte”, diksionário oĩva ko Bíbliape.
Ehecha “Saserdóte Guasu”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha “Konsiénsia”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Mediadór”, diksionário oĩva ko Bíbliape.
Térã: “orreskata”. Ehecha “Rreskáte”, diksionário oĩva ko Bíbliape.
Tahaʼe yvypóra térã mymba la omanóva.
Ehecha “Múndo”, diksionário oĩva ko Bíbliape.