Ehecha oĩva pype

Ehecha oĩva pype

Hebreos 5:1-14

5  Entéro saserdóte guasu* ojeporavóva kuimbaʼekuéra apytégui, oñenombra ikatu hag̃uáicha oipytyvõ chupekuéra omombaʼeguasu hag̃ua Ñandejárape, ha avei oikuaveʼẽ hag̃ua jopói ha sakrifísio umi kuimbaʼekuéra pekádore.  Haʼe ikatu oiporiahuvereko umi nontendéivape mbaʼeve ha ojavývape, haʼe voi ohechakuaágui pekadorha.  Upévare haʼe ojapo vaʼerã sakrifísio ipekádore, ojapoháicha pe puévlo rehehápe.  Avei pe kuimbaʼe ndojeporavói ijupe voi ojapo hag̃ua ko tembiapo guasuete, síno haʼe ojapo upéva Ñandejára oiporavo rupínte chupe, ojapo haguéicha Aarón rehe.  Péicha avei Cristo* noñembotuichái ijehegui rei oservívo saserdóte guasúramo, síno ombotuicha chupe upe heʼi vaʼekue: “Nde hína che raʼy, koestedía che aiko nde túvaramo”.  Ha ótro hendápe haʼe heʼi jey: “Nde hína peteĩ saserdóte* haʼe haguéicha avei Melquisedec, ha reservíta saserdóteramo opa ára g̃uarã”.  Cristo oikórõ guare ko yvy ape ári oñemboʼe ipyʼaite guive ha ojerure asy Ñandejárape, upe ikatu vaʼekue osalva chupe ñemanógui. Haʼe hatã osapukái ha hasẽ, ha okyhyje rupi Ñandejáragui oñembohovái chupe iñemboʼe.  Haʼéramo jepe Ñandejára Raʼy, haʼe oaprende mbaʼépa heʼise ñeʼẽrendu umi mbaʼe vai ohasa vaʼekuére.  Ha hekoitépe oikuaa porã rire upéva, haʼe rupive entéro umi iñeʼẽrendúva chupe ikatu ojesalva opa ára g̃uarã, 10  Ñandejára omoĩ rupi chupe oservi hag̃ua saserdóte guasúramo, haʼe haguéicha avei Melquisedec. 11  Heta mbaʼe jareko jaʼe vaʼerã pe Crístore, péro ijetuʼu ñamyesakã hag̃ua, peẽ penembeguetereígui pentende hag̃ua. 12  Ko tiémpope g̃uarã peẽ haʼéma vaʼerãmoʼã mboʼehára, péro upéva rangue peikotevẽ jey peteĩ penemboʼéva iñepyrũ guive umi mbaʼe tenondegua oĩva Ñandejára marandu apytépe. Ha peikotevẽ jey kambýre, peʼu rangue tembiʼu hypyʼũva. 13  Entéro umi hoʼúva kamby ningo mitã ha ndoikuaái Ñandejára Ñeʼẽ hekopeguáva. 14  Péro umi okakuaapámava hoʼu tembiʼu hypyʼũva, haʼekuéra oiporu meme iñakã ha upévare ikatupyry oikuaa hag̃ua mbaʼépa iporã ha mbaʼépa ivai.

Nóta

Ehecha “Saserdóte Guasu”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Saserdóte”, diksionário oĩva ko Bíbliape.