Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hebreos 2:1-18

2  Upévare tekotevẽ ñañatende porãve umi mbaʼe ñahendúvare, ani hag̃ua arakaʼeve jajei tape porãgui.  Ojehechauka kuri añeteha pe marandu* oñemombeʼu vaʼekue umi ánhel rupive, ha hekoitépe ojekastiga entéro mbaʼe vai apoha ha umi naiñeʼẽrendúivape.  Upéicharõ, ¿mbaʼéicha piko jajesalváta pe kastígogui nañamombaʼéiramo ko mbaʼeguasuete, Ñandejára ojapo vaʼekue ñandesalva hag̃ua? Ñande Ruvicha oñepyrũ vaʼekue oñeʼẽ ko mbaʼeguasuetére, ha umi kuimbaʼe ohendu vaʼekue upéva, omombeʼu ñandéve.  Ñandejára omoirũ avei chupekuéra oikuaauka hag̃ua añeteha upéva ha upearã ojapo heta milágro, techapyrã ha mbaʼeguasu; ha avei omeʼẽ pe espíritu sánto* haʼe oipotaháicha.  Haʼe nomoĩri umi anhelkuéra poguýpe pe yvy oútava amo gotyove; ko mbaʼére ore roñeʼẽ hína.  Péro peteĩ kuimbaʼe ohai vaʼekue: “¿Mbaʼe piko pe kuimbaʼe, nde nemanduʼa hag̃ua hese; térã pe yvypóra raʼy* reñangareko hag̃ua hese?  Peteĩ tiémpo mbykymíre remomichĩve chupe umi ánhelgui. Rembotuicha ha remeʼẽ chupe tekomimbipa, ha remoĩ chupe oñangareko hag̃ua opa umi ne rembiapokuére.  Opa mbaʼe remoĩ ipy guýpe”. Omoĩvo opa mbaʼe ipy guýpe, Ñandejára ndohejái mbaʼevete haʼe okontrolaʼỹre. Upéicharõ jepe koʼág̃a ñande ndajahechái gueteri haʼe okontrolaha opa mbaʼe.  Peteĩ tiémpo mbykymíre Jesús michĩve kuri umi ánhelgui, péro koʼág̃a jahecha oñembotuicha ha oñemeʼẽ hague chupe tekomimbipa haʼe omano haguére. Ñandejára imbaʼeporãiterei* rupi, haʼe omano opavave rehehápe. 10  Opa mbaʼe oĩ oñembotuicha hag̃ua Ñandejárape ha umíva oĩ haʼe rupive. Ikatu hag̃uáicha omeʼẽ tekomimbipa itaʼyrakuérape, haʼe ohecha iporãtaha ohejáramo ohasa asy pe Mburuvicha Oporomoingovéva* ha Salvadór. Ha péicha haʼe ombokatupyry chupe oporosalva hag̃ua. 11  Jesús ha umi haʼe omomarangatu vaʼekue, peteĩnte itúva, upévare haʼe notĩri heʼi hag̃ua hesekuéra haʼeha “iñermáno”. 12  Haʼe heʼi: “Aikuaaukáta nde réra che ermanokuérape, pe kongregasión* apytépe apurahéita rombotuicha hag̃ua”. 13  Heʼi avei: “Ajeroviáta hese”. Ha heʼi jey: “¡Péina! Che ha umi mitã Jehová* omeʼẽ vaʼekue chéve”. 14  Umi “mitã” ningo haʼe vaʼekue yvypóra, upéicha rupi haʼe yvypóra vaʼekue avei, ikatu hag̃uáicha haʼe omanóvo, ohundi pe ikatúvape oporojuka, upéva hína pe Aña*. 15  Ha haʼe ou yvypóraicha omeʼẽ hag̃ua liverta, enterove umi oĩ vaʼekuépe tembiguáiramo oikove aja pukukue okyhyjégui ñemanógui. 16  Añetehápe haʼe noipytyvõi umi ánhelpe, síno oipytyvõ hína Abrahán ñemoñarépe. 17  Upévare haʼe oiko vaʼerã kuri “iñermanokuéraicha” opa mbaʼépe. Haʼe ojapo upéva oiko hag̃ua chugui peteĩ saserdóte guasu* ojapóva Ñandejára rembiapo, oporoporiahuvereko ha iñeʼẽrendúva. Ha avei omeʼẽ hag̃ua peteĩ sakrifísio ikatu hag̃uáicha ojeheja rei umi héntepe ipekádo ha oiko porã hag̃ua hikuái Ñandejárandi. 18  Upévare haʼe ikatu ontende mbaʼéichapa oñeñandu umi ohasa asýva ha ikatu oipytyvõ chupekuéra.

Nóta

Péva hína Moisés Léi.
Ehecha “Espíritu Sánto”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Térã: “ohechauka rupi mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Térã: “Agente Principal”, ehecha diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Ehecha Informasión Oĩvéva 1.
Térã: “Diablo”, ehecha diksionário oĩva ko Bíbliape.
Ehecha “Saserdóte Guasu”, diksionário oĩva ko Bíbliape.