Ehecha oĩva pype

Ehecha oĩva pype

Hebreos 12:1-29

12  Upéicharõ, jaguereko ñande jerére hetaiterei testígo, haʼetéva peteĩ arai guasu ñanemongoráva. Upévare, jaipeʼákena ñandejehegui opa mbaʼe pohýi ha pe pekádo ndahasyietéva ñandereity hag̃ua iñuhãme; ha jadipara meme kaneʼõʼỹre pe karréra oñemoĩva ñane renonderãme.  Upe aja, jajesareko memékena Jesús rehe, haʼe ningo pe Mburuvicha* ñanepytyvõva jajerovia hag̃ua hekoitépe. Oñemoĩgui henondépe peteĩ mbaʼe ombovyʼaitereítava chupe, haʼe oaguanta pe jehasa asy oñemosaingóvo chupe pe yvyra pohýire*, notĩri upe haguére ha koʼág̃a oguapy hína Ñandejára deréchape.  Añetehápe, ani hag̃ua penekaneʼõ ni penekangy, pejepyʼamongeta meme vaʼerã Jesús rehe, haʼe oaguanta hetaite mbaʼe vai heʼíva hese umi pekadór, ha umíva oñekondena ijupekuéra voi ojapóvo upéicha.  Peguereko ningo añete peteĩ gérra pe pekádo ndive, péro peẽ napeñorairõi gueteri oñeñohẽ meve pende ruguy.  Penderesaraiete voi pe konsého oñemeʼẽvagui peẽme, peteĩ túva oñeʼẽramoguáicha itaʼyrakuérape: “Che raʼy, ani reapoʼi pe kastígo oúva Jehovágui*, ni reñeñandu vai haʼe ndekorrehi jave.  Jehová okorrehi umi ohayhúvape; añetehápe haʼe oinupã umi oguerekóvape itaʼýraramo”.  Tekotevẽ peaguanta, péicha peñehekomboʼe hína. Ñandejára pendetrata peẽ haʼeramoguáicha itaʼýra. Ha ndaipóri túva ndokorrehíriva ifamíliape.  Péro enterove peẽ ndapejekorrehíriramo péicha, peẽ ndahaʼéi taʼýra tee, síno taʼýra okára.  Avei yma ñandekorrehími vaʼekue ñande tuvakuéra ko yvy ape ári ha ñande jarrespeta chupekuéra. ¿Ha piko mbaʼéicha koʼýte nañañemoĩmoʼãi ñande Ru yvagapegua* poguýpe, ikatu hag̃uáicha jaikove? 10  Haʼekuéra ñandekorrehi sapyʼamínte iporãháicha chupekuéra, péro Ñandejára ñandekorrehi ñandedeprovechorã, ikatu hag̃uáicha ñanemarangatu haʼéicha. 11  Añetehápe, ndaipóri ovyʼáva ojekorrehi jave, síno hasyeterei enterovépe, péro péicha ñañehekomboʼe rire ñandepyʼaguapy ha ñanderekojoja. 12  Upévare, pemombaretékena pende jyva ikaneʼõva ha pene renypyʼã ikangýva. 13  Pesegíkena peguata derechoite pe tape porãre, pe ikarẽva okuera hag̃ua ha ani oĩ vaive. 14  Peñehaʼã memékena peiko pyʼaguapýpe opavavéndi, ha peñemomarangatu; cháke upevaʼỹre avave ndaikatumoʼãi ohecha ñande Ruvichápe. 15  Peñatende porãke ani pefalla ha ndapehupytyvéi Ñandejára mbaʼeporã ijojahaʼỹva*, ha ani heñói pende apytépe yvyra rapo iponsóñava, oguerúva provléma ha omongyʼáva hetápe. 16  Pende apytépe noĩri vaʼerã ni peteĩ hekovaíva*, ni avave nomombaʼéiva umi mbaʼe oúva Ñandejáragui, ojapo haguéicha Esaú. Haʼe peteĩ pláto tembiʼúre omeʼẽ vaʼekue pe derécho oguerekóva umi taʼýra ypykue. 17  Peẽ peikuaa upe rire haʼe oipota hague oñemeʼẽ chupe umi mbaʼe porã omboyke vaʼekue, ha tasẽme oñehaʼãmbaite okambia itúva odesidi vaʼekue, péro ndaikatuvéima ojapo upéva. 18  Peẽ napeñemoag̃uíri peteĩ mbaʼe ikatúvare pepoko, okáiva tatápe, peteĩ arai hũ, pytũetereíva, peteĩ torménta, 19  peteĩ trompéta ipu hatãitereívare, ha napehendúi peteĩ oñeʼẽva. Umi hénte ojerure asy vaʼekue Moiséspe anivéma hag̃ua ojeʼe chupekuéra mbaʼeve upe oñeʼẽva rupive. 20  Haʼekuéra ndogueropuʼakái ko mandamiénto: “Peteĩ mymba jepe opokóramo pe sérrore, ojejapi vaʼerã itápe”. 21  Avei pe ojehecháva ivaietereirasa vaʼekue, upévare Moisés heʼi: “Aryryipa akyhyjégui”. 22  Upéva rangue peẽ peñemoag̃ui Sérro Sión rehe, ha Ñandejára oikovéva siudáre, haʼéva hína Jerusalén yvagapegua, ha hetaiterei ánhel 23  oñembyatývare oñondivepa, Ñandejára raʼykuéra ypykue kongregasión* rehe, herakuéra ojehai yvágape, ha Ñandejárare, haʼéva Hués opavavépe g̃uarã. Peñemoag̃ui avei umi hekojojávare, haʼéva perfékto onase haguére espíritu sánto* rupive; 24  ha Jesús rehe, haʼe hína mediadór* pe kompromíso* pyahúpe g̃uarã; ha pe tuguy haʼe ohypýivare ñande ári, iporãvéva Abel ruguýgui. 25  Peñatendéke pejapysaka porã hag̃ua upe oñeʼẽvare. Cháke umi nohendúi vaʼekue Ñandejára oavisárõ guare chupekuéra ko yvy ape ári, ndojesalvái vaʼekue. Koʼýte upéicharõ ñande ndajajesalvamoʼãi ñañemomombyrýramo upe oñeʼẽvagui ñandéve yvága guive. 26  Upe tiémpope iñeʼẽ ombokacha vaʼekue ko yvy, péro koʼág̃a haʼe opromete: “Una ves ambokacha jeýta pe yvy, péro ndahaʼemoʼãi upéva añónte, síno pe yvága avei”. 27  Heʼívo: “Ambokacha jeýta”, heʼise Ñandejára oipeʼataha umi mbaʼe oñembokacháva (umíva ndahaʼéi Ñandejára rembiapokue), ikatu hag̃uáicha opyta umi mbaʼe noñembokacháiva. 28  Upéicharõ, jahechágui jarresivitaha peteĩ Rréino ikatuʼỹva oñembokacha, jasegíkena javyʼa Ñandejára mbaʼeporã ijojahaʼỹva poguýpe; upéva rupive ñande jaservi Ñandejárape haʼe oipotaháicha, jakyhyje chugui ha ñamombaʼe chupe. 29  Añetehápe, Ñandejára haʼe hína peteĩ tatarendy oporohundíva.

Nóta

Térã: “Agente Principal”, ehecha diksionário oĩva ko Bíbliape.
Ehecha “Yvyra Pohýi”, Informasión Oĩvéva 6-pe.
Ehecha Informasión Oĩvéva 1.
Térã: “ñande Ru ñandeporavo vaʼekue ijespíritu sánto rupive ñanase hag̃ua espírituicha yvágape”.
Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Tekovai”, Informasión Oĩvéva 4-pe.
Ehecha “Kongregasión”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha “Mediadór”, diksionário oĩva ko Bíbliape.
Térã: “pákto ỹrõ kontráto”.