Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hebreos 11:1-40

11  Jerovia heʼise jagueroviaha pyʼamokõiʼỹre oikotaha katuete umi mbaʼe ñahaʼarõva. Heʼise avei jaikuaa porãha añeteha umi mbaʼe jagueroviáva, ndajahecháiramo jepe umíva.  Oreko rupi peichagua jerovia, Ñandejára ohechauka vaʼekue umi kuimbaʼe yma guarépe haʼe oguerohoryha chupekuéra.  Jajeroviágui jahechakuaa opa mbaʼe oĩva yvágape ha yvýpe* ojeprepara hague Ñandejára heʼi rupi. Upéicharõ Ñandejára oiporu umi mbaʼe jahechaʼỹva ojapo hag̃ua umi mbaʼe ikatúva jahecha.  Ojerovia rupi Abel, oikuaveʼẽ vaʼekue Ñandejárape peteĩ sakrifísio ovalevéva Caín sakrifísiogui, ha ijerovia rupive Ñandejára heʼi hese hekojojaha oguerohorývo isakrifísio. Abel omanóramo jepe, osegi oñeʼẽ ijerovia rupive.  Enoc ojerovia rupi, Ñandejára ogueraha vaʼekue chupe ani hag̃ua ohasa asy omanóvo, ha ndojetopái vaʼekue mamove hendápe, Ñandejára ogueraha rupi chupe. Péro upe mboyve Ñandejára ohechauka vaʼekue Enócpe oguerohoryha chupe.  Avei ndajajeroviáirõ, Ñandejára ni mbaʼevéicharõ nañandeguerohorymoʼãi; pe oñemoag̃uíva hese oguerovia vaʼerã haʼe añetehápe oikoveha ha omyengovia porãha umi oñehaʼãvape ipyʼaite guive ojapo hembipota.  Ñandejára oavisa vaʼekue Noépe oikotaha umi mbaʼe ojehechaʼỹva gueteri, ha Noé ojerovia rupi, okyhyje Ñandejáragui ha ojapo pe árka* osalva hag̃ua hogayguakuérape. Ijerovia rupive Noé okondena ko múndope ha ojeʼe hese hekojojaha, ojerovia rupi.  Ñandejára ohenóirõ guare Abrahánpe, haʼe ojerovia rupi iñeʼẽrendu ha oho pe lugár Ñandejára opromete vaʼekuépe omeʼẽtaha chupe. Haʼe osẽ oho ndoikuaáiramo jepe moõpa oho hína.  Ojerovia rupi, haʼe oiko arrivéñoicha pe yvy oñepromete vaʼekuépe, oikoramoguáicha tetã ambuépe; ha oiko óga kárpape* Isaac ha Jacob ndive, chupekuéra Ñandejára opromete vaʼekue avei omeʼẽtaha upe yvy. 10  Abrahán ojapo upéva ohaʼarõgui pe siuda oguerekóva simiénto teete; upe siuda ningo Ñandejára odesidi vaʼekue mbaʼéichapa ojejapóta ha haʼe voi omopuʼã. 11  Avei Sara ojerovia rupi, oñemeʼẽ vaʼekue chupe podér hyeguasu hag̃ua, jepe haʼe ig̃uaig̃uíma upearã. Upéva oiko Sara oikuaágui ikatuha ojerovia upe opromete vaʼekuére chupe. 12  Upéicharõ, peteĩ kuimbaʼénte hetaiterei ifamília umi estrélla yvagapeguáicha, ha ndaikatúi ojeipapa, haʼete voi pe yvykuʼi oĩva mar rembeʼýpe; hiʼarive upe kuimbaʼe itujáma*. 13  Enterove haʼekuéra ojerovia omano meve, noñemeʼẽiramo jepe chupekuéra umi mbaʼe oñepromete vaʼekue. Péro haʼekuéra ohecha umíva mombyry guive, ha orresivi vyʼápe. Omombeʼu hikuái opavave renondépe oiko hague tetã ambuegua ha arrivéñoicha upe yvýpe. 14  Entéro umi heʼíva upéicha, ohechauka oñehaʼãmbaiteha oheka peteĩ lugár imbaʼe teéva. 15  Péro añetehápe haʼekuéra osegírire imanduʼa pe lugár oheja vaʼekuére, oreko vaʼerãmoʼã oportunida oho jeývo. 16  Añetehápe, haʼekuéra oñehaʼã ohupyty peteĩ lugár iporãvéva yvagapegua. Upévare Ñandejára notĩri heʼi hag̃ua haʼeha Ijarakuéra, ha oprepara voi peteĩ siuda chupekuéra g̃uarã. 17  Ñandejára otanteárõ guare Abrahánpe, haʼe ojerovia rupi haimete oikuaveʼẽ Isaácpe sakrifísioramo. Pe kuimbaʼe vyʼápe orresivi vaʼekue umi promésa, osakrifikamoʼãite itaʼýra peteĩete. 18  Haʼe ojapo upéva, jepe ojeʼe kuri chupe: “Ne ñemoñare oúta Isaac rupive”. 19  Abrahán opensa vaʼekue Ñandejára ikatuha omoingove jey itaʼýrape; ha Ñandejára omeʼẽ jey chupe itaʼýra, osalva chupe ani hag̃ua omano. Upéva orrepresenta peteĩ mbaʼe oikótava tenonderãme. 20  Avei ojerovia rupi Isaac, ojerure vaʼekue Ñandejárape ohovasa* hag̃ua Jacob ha Esaúpe, ha péicha omombeʼu mbaʼépa oikóta hesekuéra tenonderãme. 21  Ojerovia rupi Jacob, omano mboyvemi, ojerure vaʼekue Ñandejárape ohovasa hag̃ua José raʼykuérape, ha omombaʼeguasu Ñandejárape ojejoko aja ivastón rehe. 22  Ojerovia rupi José, omano mboyvemi, omombeʼu umi Israelgua osẽ vaʼerãha Egíptogui; ha heʼi chupekuéra mbaʼéichapa oipota oñeñotỹ chupe. 23  Moisés tuvakuéra ojerovia vaʼekue, upévare haʼe onase rire omokañy chupe hikuái tres mése aja. Haʼekuéra ohecha pe mitã iporãitereiha, ha ndokyhyjéi omboyke hag̃ua pe rréi omanda vaʼekue. 24  Ojerovia rupi Moisés, tuicha rire ndoipotái vaʼekue ojeʼe hese haʼeha Faraón* niéto*. 25  Odesidi ikuentaveha ojetrata vai chupe Ñandejára puévlondi, oiko rangue ovyʼa sapyʼami opeka aja. 26  Moiséspe g̃uarã iporãiteve vaʼekue ojeapoʼi chupe haʼégui Ñandejára Rembiporavo oreko rangue opa mbaʼerepy oĩva Egíptope; haʼe ningo ojesareko meme pe prémio oñemeʼẽtavare chupe. 27  Moisés ojerovia rupi osẽ Egíptogui, péro pe rréi ipochýramo jepe, ndokyhyjéi chugui. Haʼe osegi vaʼekue ojerovia mbarete ohecharamoguáicha Upe ikatuʼỹvape jahecha. 28  Ojerovia rupi, haʼe omboarete pe Páskua*, ha ohypýi tuguýpe umi okẽ márko ani hag̃ua Ñandejára ánhel ojuka umi taʼýra ypykuépe. 29  Ojerovia rupi haʼekuéra ohasa pe mar Rojo yvy isekohárupi, péro umi ehípsio ojaposérõ guare upéva, ojahogapa hikuái. 30  Pe puévlo ojerovia rupi, Jericó murallakuéra hoʼapa, haʼekuéra ojere rire hese siete día. 31  Ojerovia rupi, pe kuña rekovai Rahab, nomanói umi naiñeʼẽrendúiva ndive, haʼe orresivi porã rupi umi oho vaʼekuépe ovichea* pe yvy. 32  ¿Ha mbaʼéiko haʼevéta? Ofaltapáta chéve tiémpo añeʼẽtaramo Gedeón, Barac, Sansón, Jefté, David, ha avei Samuel ha umi ótro proféta* rehe. 33  Ijerovia rupive haʼekuéra oñorairõ umi rréi ndive ha ipuʼaka hesekuéra, ojapo iporãva, orresivi Ñandejára promésa ha omboty leonkuéra juru, 34  pe tatarendy ndohapýi chupekuéra, ojehekýi hikuái umi espádagui, ikangýramo jepe upéi imbarete jey, gerrahápe oñorairõ tuicha puʼaka reheve, ha ombodiparapa umi ehérsito oúva chupekuéra. 35  Oĩ kuña orekóva ihénte omano vaʼekue, ha umívape oñemoingove jey; umi ótro kuimbaʼe katu nomboykéi vaʼekue ijerovia ojesalva hag̃uánte, oĩrõ guare oñemboharái vaipáva hesekuéra; ojapo hikuái upéva ohupytységui peteĩ ñemoingove jey iporãvéva. 36  Umi ótro katu ohasa asy oĩgui oñembohorýva hesekuéra ha oinupãva chupekuéra harreadórpe; ha ndahaʼéi voi upévante, oĩ voi oñenkadenáva ha oñemoingéva kárselpe. 37  Ojejapi chupekuéra itápe, oĩ vaʼekue omoñuhãséva chupekuéra, oñembojaʼo chupekuéra serrúchope, ojetrosa espádape, oñemonde hikuái ovecha ha kavara pirépe, haʼekuéra ojejopy vai, ohasa asy ha oñemaltrata. 38  Pe múndo nomereséi koʼãichagua hénte imbaʼeporãva oiko pype. Haʼekuéra oiko vaʼekue okañy kañy desiértore, serrohárupi, itakuárupi ha yvykuápe. 39  Péro Ñandejára oñeʼẽ porãramo jepe hesekuéra ojerovia rupi hikuái, ndorresivíri umi mbaʼe oñepromete vaʼekue chupekuéra. 40  Upéva oiko Ñandejára opensáma rupi omeʼẽtaha ñandéve peteĩ mbaʼe iporãvéva, ani hag̃ua oiko chuguikuéra perfékto ñandereheʼỹ.

Nóta

Térã: “múndope”. Ehecha “Múndo”, diksionário oĩva ko Bíbliape.
Térã: “káha”. Kóva haʼe vaʼekue peteĩ várko guasu ojoguáva káhape.
Oiméne ojejapo mymba pirégui.
Griégope heʼi: “omanóma”. Péva heʼise ndaikatuveimaha ifamília.
Térã: “ovendesi”. Ehecha “Vendisión”, diksionário oĩva ko Bíbliape.
Péicha oñehenói vaʼekue umi mburuvicha guasu Egiptoguápe.
Térã: “Faraón rajy memby”.
Ehecha “Páskua”, diksionário oĩva ko Bíbliape.
Térã: “espía”.
Ehecha “Profesía”, diksionário oĩva ko Bíbliape.