Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Hebreos 10:1-39

10  Pe Léi* ohechaukánte umi mbaʼe porã oútava, añetehápe, ndahaʼéi hína umi mbaʼe porã, síno ijoguahánte. Upévare umi saserdóte* ojapóramo jepe sakrifísio káda áño, ni mbaʼevéicharõ ndaikatúi oipytyvõ umi oñemoag̃uisévape Ñandejárare, perfékto hag̃ua hikuái.  Upéicharire natekotevẽmoʼãvéima kuri ojejapo umi sakrifísio, ha umi omombaʼeguasúva Ñandejárape ipotĩma vaʼerãmoʼã una ves ha opa ára g̃uarã, ha noñeñanduvaimoʼãvéima ohechakuaágui pekadorha hikuái.  Upéva rangue, káda áño koʼã sakrifísio omomanduʼa chupekuéra pekadorha,  umi tóro ha kavara ruguy ndaikatúigui oipeʼa umi pekádo.  Upévare, haʼe oúrõ guare ko múndope heʼi: “‘Ndereipotái sakrifísio ni jopói, péro reprepara chéve che reterã.  Ndereguerohorýi umi sakrifísio ojehapýva*, ni umi sakrifísio ojejapóva pekádore’.  Upévare haʼe kuri: ‘¡Péina! Ñandejára, aju ajapo hag̃ua ne rembipota (Ñandejára kuatiañeʼẽme oĩ peteĩ párte oñeʼẽva cherehe)’”.  Primero haʼe heʼi: “Ndereipotái ha ndereguerohorýi sakrifísio, jopói, sakrifísio ojehapýva, ni umi sakrifísio ojejapóva pekádore” (koʼã sakrifísio oñekuaveʼẽ pe Léi heʼiháicha).  Upéi heʼi: “¡Péina! Aju ajapo hag̃ua ne rembipota”. Haʼe ohundi pe primero, omoñepyrũ hag̃ua pe segundo. 10  Péicha, Ñandejára ‘oipotágui’, ñande ñañemomarangatu kuri Jesucristo osakrifika rupi hete una ves ha opa ára g̃uarã. 11  Avei entéro saserdóte káda día oĩ ilugárpe oservi ha ojapo hag̃ua umi sakrifísio heta vése, ha umíva arakaʼeve ndaikatúi oipeʼapaite umi pekádo. 12  Péro ko kuimbaʼe oikuaveʼẽ peteĩ sakrifísionte umi pekádore opa ára g̃uarã, ha oguapy Ñandejára deréchape. 13  Upe guive ohaʼarõ Ñandejára omoĩmba peve ipy guýpe iñenemigokuérape. 14  Upéicharõ, oikuaveʼẽvo peteĩ sakrifísio haʼe oipytyvõ entéro umi oñemomarangatúvape, perfékto hag̃ua opa ára g̃uarã. 15  Avei pe espíritu sánto* ohechauka ñandéve añeteha ko mbaʼe, tenondete heʼígui: 16  “‘Kóva hína pe kompromíso* ajapótava hendivekuéra umi ára rire’, heʼi Jehová*. ‘Amoĩta che Léi ikorasõmekuéra ha ahaíta iñakãme’”. 17  Upéi heʼi: “Ha che ni mbaʼevéicharõ nachemanduʼamoʼãvéima ipekádore ni umi mbaʼe vai ojapo vaʼekuére hikuái”. 18  Upéicharõ, Ñandejára operdonáramo entéro koʼã pekádo, natekotevẽvéima ojejapo sakrifísio umi pekádore. 19  Upévare ermanokuéra, Jesús ruguy rupive ndajakyhyjéi jaiporu hag̃ua pe tape ñandegueraháva pe lugár marangatu* ryepýpe. 20  Pe tape haʼe oavríva ñandéve g̃uarã haʼe hína peteĩ tape pyahu ñandegueraháva jeikovépe. Ha haʼe ojapo upéva, ovandeávo pe kortína haʼéva hete. 21  Ha jaguereko rupi peteĩ saserdóte tuichaitéva, orekóva ikárgope Ñandejára róga, 22  ñañemoag̃uíkena Ñandejárare tovamokõiʼỹre ha jajerovia ñande pyʼaite guive. Ñande ñamopotĩma ñane korasõ ha ñane konsiénsia* jahypýivo tuguýpe, ha ñande rete oñemopotĩma avei y potĩme. 23  Jasegíkena ñamombeʼu opavave renondépe ñane esperánsa. Jajapókena upéva pyʼamokõiʼỹre, jaikuaágui ikatuha jajerovia pe opromete vaʼekuére. 24  Jajepyʼapýkena ojuehe ñande pyʼaite guive, ha ñañomokyreʼỹ japorohayhu ha jajapo hag̃ua iporãva. 25  Ani jafalta meme rreunionhápe, oĩramo jepe ojepokuaáva ojapo upéicha. Upéva rangue, ñañomokyreʼỹ vaʼerã, koʼýte koʼág̃a jahechávo pe ára hiʼag̃uimbaitemaha. 26  Jaikuaa porã rire pe añetegua, jasegínteramo japeka jajaposégui rei, ndaiporivéima sakrifísio ikatúva ojejapo ñande pekádore. 27  Upéva rangue, ñaneraʼarõ peteĩ huísio ndevaipa jepéva, ha Ñandejára pochy rendy ohapýta umi oñemoĩvape hese. 28  Oimeraẽ nokumplíriva Moisés Léi, ojejuka vaʼekue ojeporiahuverekoʼỹre chupe, oĩramo ikóntrape mokõi térã mbohapy testígo. 29  Pekalkulamína upéicharõ mbaʼeichaitépa koʼýte ojekastiga vaivéta peteĩ persóna opyrũva Ñandejára Raʼýre, oapoʼíva huguy ha okopi vaipaitéva Ñandejára espíriture, omeʼẽva mbaʼeporã ijojahaʼỹva*. Upe tuguy ningo oñeñohẽ pe kompromísope g̃uarã ha upéva rupive oñemomarangatu vaʼekue upe persónape. 30  Ñande jaikuaa upe heʼi vaʼekuépe: “Che añevengáta ha amyengoviáta chupekuéra hembiapo vaikuére”; ha avei: “Jehová ohusgáta ipuévlope”. 31  Cháke Ñandejára oikovéva ñandekastigáramo, upépe ñañehundietéma. 32  Upéicharamo jepe, pesegíkena penemanduʼa umi mbaʼe pehasa vaʼekuére yma peikuaa rire pe añetegua. Upérõ peẽ peaguanta ha pegueropuʼaka heta mbaʼe ijetuʼuetereíva. 33  Heta vése peẽ pejejaʼo ha pejetrata vai opavave renondépe, ha heta vése pejepytaso umi péicha ohasa asýva ykére. 34  Peẽ pembyasy pene ermanokuérape oĩva préso ha vyʼápe peheja ojeguerahapa pendehegui pende kosakuéra, peikuaágui peguerekotaha peteĩ erénsia iporãvéva ha opa ára g̃uarãva. 35  Upéicharõ, pesegíkena peñeʼẽ kyhyjeʼỹre, peikuaágui tuicha oñemyengoviataha peẽme upévare. 36  Tekotevẽ ningo peaguanta, ikatu hag̃uáicha perresivi Ñandejára opromete vaʼekue. Péro upe mboyve pejapo vaʼerã Ñandejára rembipota. 37  Ofalta rupi “peteĩ tiémpo mbykymíntema”, “pe oúva hína, og̃uahẽta ha ndotardamoʼãi”. 38  “Pe hekojojáva katu oikovéta ijerovia rupive”, péro “oguevíramo, ndaguerohorymoʼãi* chupe”. 39  Ñande nañaiméi hína umi oguevíva apytépe, umíva oñehundíta; ñaime guei umi ojeroviáva apytépe ha upévare nañamanomoʼãi*.

Nóta

Ehecha “Léi”, diksionário oĩva ko Bíbliape.
Ehecha “Saserdóte”, diksionário oĩva ko Bíbliape.
Ehecha “Sakrifísio Ojehapýva”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “pákto ỹrõ kontráto”.
Ehecha Informasión Oĩvéva 1.
Ehecha “Lugár Marangatu”, diksionário oĩva ko Bíbliape.
Ehecha “Konsiénsia”, diksionário oĩva ko Bíbliape.
Ehecha “Mbaʼeporã Ijojahaʼỹva”, diksionário oĩva ko Bíbliape.
Griégope heʼi: “che álma ndoguerohorymoʼãi chupe”. Ehecha “Álma”, Informasión Oĩvéva 7A-pe.
Griégope heʼi: “jasalváta ñane álma”.