Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Efesios 6:1-24

6  Taʼyrakuéra, peneñeʼẽrendúkena pende tuvakuérape ñande Ruvicha oipotaháicha, upéva ningo oĩ porã Ñandejára renondépe:  “Emombaʼe nde ru ha nde sýpe”; péva hína pe primer mandamiénto oñemeʼẽ vaʼekue peteĩ promésa reheve:  “Oho porã hag̃ua ndéve ha reikove puku hag̃ua ko yvy ape ári”.  Ha peẽ tuvakuéra, ani pejahéi pende raʼykuérare pembopochy hag̃uáicha chupekuéra, síno pesegi vaʼerã pemongakuaa ha pekorrehi pene famíliape Jehová* oipotaháicha.  Peẽ tembiguái, peneñeʼẽrendúkena pene patronkuérape, Crístope* peneñeʼẽrenduháicha. Perrespeta chupekuéra pende pyʼaite guive ha ani penderovamokõi.  Ani pejapo upéva oĩ jave penekontrolávante, pejechauka hag̃ua kuimbaʼekuérapente, peiko guei Cristo rembiguáicha pejapóvo Ñandejára rembipota pende pyʼaite* guive.  Peporoservi vaʼerã kyreʼỹme peserviramoguáicha Jehovápe, ndahaʼéi kuimbaʼekuérape.  Peẽ peikuaa Jehová omyengoviataha káda únope hembiapo porãre, tahaʼe tembiguái térã peteĩ orekóva liverta.  Peẽ patronkuéra, péicha avei petrata porã vaʼerã pene rembiguáipe, ha ani peiko peamenasa chupekuéra, peikuaágui mokõivéva Jára oĩha yvágape; ha enterovépe haʼe otrataha peteĩchante. 10  Ipahaitépe, pesegíkena peñemoag̃ui ñande Ruvicháre ha ipodér tuichaitéva tapenemombarete. 11  Pemoĩkena pe armadúra kompletoite oúva Ñandejáragui, ikatu hag̃uáicha peñemoĩ mbarete umi ñuhã oiporúvare pe Aña*. 12  Ñande ningo nañañorairõi yvypórandi, ñañorairõ guei umi espíritu aña yvagapeguándi; koʼãva haʼe hína umi governánte, autorida ha mburuvicha orekóva ipoguýpe ko múndo* oĩva pytũmbýpe. 13  Upévare pemoĩkena pe armadúra kompletoite oúva Ñandejáragui, peñemoĩ mbarete hag̃ua koʼã enemígore* haʼekuéra opuʼã vove penderehe, ikatu hag̃uáicha pejepytaso mbarete pekumpli rire opaite mbaʼe. 14  Upéicharõ, pejepytaso mbaretékena, ha pelia pende kuʼáre pe añetegua haʼeramoguáicha peteĩ sínto, ha pemoʼã pende pytiʼa hustísiape. 15  Pemoĩ pende pýre pe sandália peho hag̃uáicha pyaʼe pepredika umi marandu porã* oñeʼẽva pyʼaguapýre. 16  Opa árape peñakarama hatã pende jeroviáre, penemoʼã hag̃ua peteĩ eskúdoicha, péicha ikatúta pembogue opa umi flécha hendýva opoíva penderehe pe aña. 17  Avei pepensa meme pe salvasiónre, ha upéva omoʼãta pene akã peteĩ káskoicha; ha pejagarra pe espáda omeʼẽva pe espíritu sánto*, upéva hína Ñandejára Ñeʼẽ. 18  Ha espíritu sánto poguýpe peñemboʼe* meméke Ñandejárape opa árape ha pejerure asy chupe tapenepytyvõ. Upearã pepáyke ha akóinte pejerure asy avei entéro ermanokuéra* rehehápe. 19  Pejerure avei cherehe, ikatu hag̃uáicha añeʼẽ kyhyjeʼỹre aikuaaukávo umi marandu porã haʼéva hína peteĩ sekréto marangatu*. 20  Umi marandu porã rehehápe Ñandejára chemondo irrepresentánteramo ha koʼág̃a aime préso. Peñemboʼékena cherehe aikuaauka hag̃ua umíva pyʼaguasúpe ha hekoitépe. 21  Tíquico, ñane ermáno jahayhuetéva ha oservíva ipyʼaite guive ñande Ruvichápe, omombeʼúta peẽme mbaʼépa ajapo ha mbaʼetekópa oho chéve. 22  Upearã amondo chupe pene rendápe pereko hag̃ua notísia orehegui, haʼe penekonsoláta. 23  Ñande Ru Ñandejára, ha ñande Ruvicha Jesucristo tomeʼẽ umi ermánope pyʼaguapy, mborayhu ha jerovia. 24  Ñandejára taimbaʼeporãite* entéro umi ohayhúvandi ñande Ruvicha Jesucrístope tovamokõiʼỹre.

Nóta

Ehecha Informasión Oĩvéva 1.
Ehecha “Cristo”, diksionário oĩva ko Bíbliape.
Griégope heʼi: “pene álma mbytete”. Ehecha “Álma”, Informasión Oĩvéva 7A-pe.
Térã: “Diablo”, ehecha diksionário oĩva ko Bíbliape.
Ehecha “Múndo”, diksionário oĩva ko Bíbliape.
Griégope heʼi: “pe ára aña vove”.
Ehecha “Marandu Porã”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Griégope heʼi: “pejapo opaichagua ñemboʼe”.
Griégope heʼi: “umi imarangatúva”.
Ehecha “Sekréto Marangatu”, diksionário oĩva ko Bíbliape.
Térã: “tohechauka mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.