Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Colosenses 1:1-29

1  Che, Pablo, aservíva Cristo* Jesús apóstolramo* Ñandejára oipota rupi, ha ñane ermáno Timoteo,  romondo ko kárta entéro umi ermáno imarangatu ha ijeroviapýva oĩva Colósaspe, haʼéva hína Cristo Jesús disípulo*: Aipotaite ñande Ru Ñandejára, ha ñande Ruvicha Jesucristo, taimbaʼeporã* penendive ha tomeʼẽ peẽme pyʼaguapy.  Roñemboʼe jave penderehe akóinte roagradese Ñandejárape, haʼéva hína ñande Ruvicha Jesucristo Túva,  rohendúgui pejeroviaha Cristo Jesús rehe ha pehayhuha entéro ermanokuérape*.  Pejapo upéva perekógui esperánsa oñeñongatúva hína yvágape peẽme g̃uarã. Peẽ peikuaa ko esperánsa pehendúrõ guare pe añetegua, haʼéva hína umi marandu porã*  ojekuaauka vaʼekue peẽme. Umi marandu porã heñói ha okakuaa oparupiete ko múndope*. Upéicha avei oiko pende apytépe pehendu ypy guive umi marandu. Peẽ pehendu ha peikuaa porã mbaʼépa heʼise añetehápe Ñandejára imbaʼeporãitereiha.  Peẽ peaprende vaʼekue umi marandu porã Epáfrasgui, haʼe hína ñane ermáno jahayhuetéva ha ijeroviapýva, oservíva avei Cristo rembiguáiramo ñanderehehápe.  Haʼe omombeʼu avei oréve mbaʼéichapa peẽ peporohayhu Ñandejára espíritu rupive.  Upévare, rohendu guive koʼã mbaʼe, akóinte roñemboʼe penderehehápe ha rojerure Ñandejárape peikuaa porã hag̃ua hembipota, pereko hag̃ua pe arandu teete ha pentende hag̃ua opa mbaʼe pe espíritu rupive. 10  Péicha ikatúta peiko Jehová* oipotaháicha, haʼe pendeguerohory hag̃ua opa mbaʼépe. Ha pesegíta pejapo opaichagua tembiapo porã ha peikuaa porãve Ñandejárape. 11  Hiʼãite Ñandejára omeʼẽ peẽme ipodér tuichaitéva, ikatu hag̃uáicha penembarete ipodér ijojahaʼỹva rupive. Péicha penepasiénsiata peaguanta hag̃ua opa mbaʼe ha pevyʼáta. 12  Avei peagradese pe Túvape penembokatupyry haguére pehupyty hag̃ua pe erénsia oñemeʼẽva umi imarangatúvape oĩva hesakãháme. 13  Haʼe ñaneguenohẽ pytũmby poguýgui ha ñanemoĩ Itaʼýra ohayhuetéva rréinope. 14  Haʼe opaga* ñanesãso hag̃ua ha oñeperdona hag̃ua ñande pekádo. 15  Haʼe hína Ñandejára jahechaʼỹva joguahaite, pe taʼýra ypykue ojejapo vaʼekue opaite mbaʼe mboyve. 16  Ñandejára ojevale hese ojapo hag̃ua opa mbaʼe oĩva yvágape ha yvy ape ári, umi mbaʼe ojehecháva ha umi ojehechaʼỹva, tahaʼe tróno, mburuvicha, goviérno térã autorida. Opa mbaʼe ojejapo haʼe rupive ha imbaʼerã. 17  Haʼe oĩ opa mbaʼe mboyve ha haʼe rupive ojejapo opaite mbaʼe. 18  Haʼe omoakã pe kongregasión* haʼéva hete. Haʼe omoñepyrũ opa mbaʼe, ha haʼe raẽve opuʼã omanóva apytégui ikatu hag̃uáicha oĩ tenondete opa mbaʼépe. 19  Ñandejára oipota vaʼekue Cristo henyhẽte opa mbaʼégui, 20  ikatu hag̃uáicha haʼe rupive omoingo porã jey hendive opa mbaʼe, tahaʼe umi mbaʼe oĩva yvy ape ári térã yvágape; ha Itaʼýra oñohẽ rupi huguy pe yvyra pohýire*, entéro mbaʼe ikatu oiko pyʼaguapýpe hendive. 21  Añetehápe yma peẽ haʼe vaʼekue Ñandejára enemígo ha peime mombyry chugui, pepensa memégui tembiapo vaíre. 22  Koʼág̃a Ñandejára penemoingo porã jey hendive Itaʼýra osakrifika rupi hekove*, ha péicha penemarangatúta, penepotĩta, ha ndojeʼemoʼãi penderehe mbaʼeve ivaíva Ñandejára renondépe. 23  Péro upearã pesegi vaʼerã pejerovia, peime hatã pe simiénto ári, pejepytaso mbarete ha ani peheja mbaʼeve penemomombyry pene esperánsagui. Ko esperánsa peẽ pehupyty vaʼekue pehendúvo umi marandu porã ojepredikámava oparupiete ko múndope. Che, Pablo, ajeporavo vaʼekue apredika hag̃ua koʼã marandu porã. 24  Koʼág̃a avyʼa ahasa asýramo jepe penderehehápe. Ahechakuaa oĩha gueteri heta mbaʼe vai ahasa vaʼerã Cristo rehehápe. Koʼã mbaʼe vai ahasáva, koʼág̃a ideprovéchota pe kongregasiónpe, haʼéva hína Cristo rete. 25  Che aservi ko kongregasiónpe Ñandejára omeʼẽgui chéve ko rresponsavilida, apredika hag̃ua hekoitépe Iñeʼẽ, ideprovécho hag̃ua peẽme. 26  Che apredika pe sekréto marangatu* oñemokañy vaʼekue umi hénte yma guarégui, péro koʼág̃a upéva ojekuaauka isiervokuéra imarangatúvape. 27  Ñandejára oikuaauka pe sekréto umi imarangatúvape ha umi tetã ambueguápe avei. Ko sekréto henyhẽva mbaʼe porã omimbipávagui haʼe hína Cristo, haʼe ojoaju penendive ha peẽ pereko esperánsa peñembotuichataha hendive. 28  Ñande jaikuaauka, ñañemoñeʼẽ ha tuicha arandu reheve ñamboʼe umi héntepe oikuaa hag̃ua Crístope. Péicha entéro kuimbaʼe ñapresentáva Ñandejárape, haʼéta Cristo segidór ha ijerovia mbaretéta. 29  Upearã ambaʼapo jejopy ha añehaʼãmbaite, ha Ñandejára oiporu ipodér chemombarete hag̃ua.

Nóta

Ehecha “Cristo”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “tohechauka peẽme mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Griégope heʼi: “umi imarangatúvape”.
Ehecha “Marandu Porã”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Ehecha Informasión Oĩvéva 1.
Térã: “ñanderreskata”. Ehecha “Rreskáte”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Ehecha “Yvyra Pohýi”, Informasión Oĩvéva 6-pe.
Térã: “hete”.
Ehecha “Sekréto Marangatu”, diksionário oĩva ko Bíbliape.