Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 9:1-21

9  Upéi pe quinto ánhel ombopu itrompéta. Ha ahecha peteĩ estrélla hoʼa vaʼekue yvágagui ko yvy ape ári, ha oñemeʼẽ chupe pe yvykua pypuku* lláve.  Ha haʼe oavri pe yvykua pypuku, ha pe yvykuágui ojupi tatatĩ, haʼete tatatĩ osẽva peteĩ tatakua guasúgui; ha pe tatatĩ káusare pe kuarahy iñypytũmba ha pe yvytu hatatĩmba.  Ha pe tatatĩgui osẽ umi tuku ha ou ko yvy ape ári; ha oñemeʼẽ chupekuéra podér, orekoháicha avei podér umi alakrán ko yvy arigua.  Ojeʼe chupekuéra ani hag̃ua ojapo mbaʼeve ivaíva pe kapiʼipére, ni umi ótra plánta ha yvyramátare. Síno ikatu ojapo ivaíva umi kuimbaʼe ndoguerekóivare Ñandejára séllo isyváre añoite.  Ha umi tukúpe noñemeʼẽi permíso ojuka hag̃ua umi kuimbaʼépe, síno ombohasa asy hag̃ua chupekuéra cinco mésere. Ha ohasa asy hikuái ohasa asyháicha peteĩ kuimbaʼe ojopi jave chupe alakrán.  Ha umi árape umi kuimbaʼe itarovaitéta oheka mbaʼéichapa omanóta, péro ni mbaʼevéicharõ ndaikatumoʼãi; omanosetereíta ningo hikuái, péro pe ñemano odiparáta chuguikuéra.  Umi tuku ojogua kavajúpe ojepreparáva gerrarã, iñakãre oreko peteĩ mbaʼe ojoguáva koróna de órope, hovakuéra katu haʼete kuimbaʼe rova.  Iñakãrague katu haʼete kuñanguéra akãrague, ha hãinguéra haʼete león rãi.  Ipytiʼáre haʼetévaicha orekóva pytiʼa moʼãha de iérro. Ipepo ryapu katu haʼete heta kárro* kavaju reheve, odiparáva hína ohóvo gerrahápe. 10  Ha umi alakrán orekoháicha, haʼekuéra avei huguái ha ipopĩa, ha huguáipe oreko podér oikutu hag̃ua yvyporakuérape cinco mésere. 11  Haʼekuéra oreko peteĩ rréi, haʼéva pe ánhel orekóva ikárgope pe yvykua pypuku. Evréope héra Abadón* ha griégope katu héra Apolión*. 12  Pe primer provléma ohasáma. ¡Péina!, oĩve mokõi provléma oútava upe rire. 13  Ha pe sexto ánhel ombopu itrompéta. Upévo ahendu peteĩ ñeʼẽ osẽva pe altár* de óro ratĩgui, oĩva Ñandejára renondépe, 14  ha heʼíva pe sexto ánhelpe, upe orekóva pe trompéta: “Epoi umi cuatro ánhel oñeñapytĩvagui pe rrío guasu Éufrates rembeʼýpe”. 15  Ha ojepoi umi cuatro ánhelgui ojuka hag̃ua peteĩ párte* umi yvyporakuéra; haʼekuéra ojepreparapáma kuri, pe óra, día, mes ha áñope g̃uarã. 16  Ha oĩ doscientos millón soldádo kavaju arigua: Che ahendu mboýpa hikuái. 17  Péicha ahecha pe visiónpe* umi kavaju, ha umi ohóva hiʼári: haʼekuéra oreko pytiʼa moʼãha pytã asy, hovy ha saʼyjúva asúfreicha. Umi kavaju akã katu haʼete león akã, ha ijurúgui osẽ tata, tatatĩ ha asúfre. 18  Koʼã mbohapy mbaʼe vai rupive omano peteĩ párte umi yvyporakuéra: pe tata, tatatĩ ha asúfre osẽva umi kavaju jurúgui. 19  Umi kavaju podér oĩ ijuru ha huguáipe; umi huguái ningo ojogua mbói oporosuʼúvape. 20  Umi ótro kuimbaʼe nomanói vaʼekue koʼã mbaʼe vai rupive, noñarrepentíri* hembiapo vaikuégui. Haʼekuéra osegi omombaʼeguasu umi demóniope* ha umi ñandejára guaʼúpe*, ojejapóva de óro, pláta, kóvre, ita ha madéragui; umíva ndaikatúi ohecha, ohendu ni oguata. 21  Haʼekuéra noñarrepentíri hembiapo vaikuégui, síno osegi oporojuka, ojapo paje*, hekovai* ha omonda.

Nóta

Ehecha “Yvykua Pypuku”, diksionário oĩva ko Bíbliape.
Koʼãichagua kárro mokõi irruéda, ha oitira kavajukuéra.
Ko téra heʼise: “ñehundi”.
Ko téra heʼise: “oporohundíva”.
Ehecha “Altár”, diksionário oĩva ko Bíbliape.
Griégope heʼi: “1/3 (peteĩ káda tres persónagui)”.
Ehecha “Visión”, diksionário oĩva ko Bíbliape.
Ehecha “Arrepentimiénto”, diksionário oĩva ko Bíbliape.
Ehecha “Demónio”, diksionário oĩva ko Bíbliape.
Griégope heʼi: “taʼangakuérape”. Ehecha “Idolatría”, diksionário oĩva ko Bíbliape.
Pévape oike opaichagua espiritísmo ha okultísmo. Ehecha “Espiritísmo”, diksionário oĩva ko Bíbliape.
Ehecha “Tekovai”, Informasión Oĩvéva 4-pe.