Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 22:1-21

22  Ha pe ánhel ohechauka chéve peteĩ rrío orekóva y oporomoingovéva, hesakã asýva peteĩ kristál hesakãháicha, osyrýva Ñandejára ha pe Ovecharaʼy trónogui,  ha oguejýva ohóvo pe tape iñimportantevéva mbytére, oĩva pe siudápe. Ha pe rrío rembeʼýre, mokõive ládo oĩ yvyramáta oporomoingovéva, hiʼáva káda mes, doce vése káda áño. Ha umi yvyramáta rogue omonguera umi tetãnguérape.  Ñandejára nomaldesimoʼãvéima pe siuda, ha Ñandejára ha pe Ovecharaʼy tróno oĩta pe siudápe. Ñandejára rembiguaikuéra oservíta chupe,  ohecháta hikuái Ñandejára rova ha isyvakuérare ojehaíta héra.  Avei ndaiporimoʼãvéima pyhare ha haʼekuéra noikotevẽmoʼãi lámpara ni kuarahy ohesape hag̃ua chupekuéra, Ñandejára Jehová* voi ohesapéta rupi hiʼarikuéra ha ogovernáta hikuái opa ára g̃uarã.  Ha heʼi chéve: “Koʼã ñeʼẽ añetegua ha ikatu pejerovia hese; si, Ñandejára Jehová upe ojevaléva umi profétare* oñeʼẽ hag̃ua, ombou hiʼánhel ohechauka hag̃ua hembiguaikuérape umi mbaʼe oikótava koʼẽrõite.  Ha ¡péina!, ahátama koʼẽrõite. Ovyʼa oimeraẽ okumplíva umi profesía oĩva ko lívrope”.  Che, Juan, ahecha ha ahendu kuri koʼã mbaʼe. Ha ahendu ha ahechávo koʼã mbaʼe, añesũ amombaʼeguasu hag̃ua pe ánhel ohechauka vaʼekuépe chéve umíva.  Péro haʼe heʼi chéve: “¡Aníke rejapo upéva! Che ningo aservínte avei tembiguáiramo, rejapoháicha nde ha ne ermanokuéra haʼéva proféta ha umi okumplíva umi mbaʼe oĩva ko lívrope. Emombaʼeguasu Ñandejárape añoite”. 10  Ha heʼi avei chéve: “Ani reñongatu umi mbaʼe heʼíva ko profesíape, cháke pe tiémpo oñemoĩ vaʼekue hiʼag̃uimbaitéma. 11  Pe ojapóva ivaíva, tosegi tojapo ivaíva; pe hekokyʼáva tosegi tojapo ikyʼáva; péro pe hekojojáva tosegi tojapo iporãva, ha pe imarangatúva tosegi imarangatu. 12  ”‘¡Péina!, ahátama koʼẽrõite, ha amyengoviáta káda únope hembiapokuére. 13  Che hína Alfa ha Omega*, pe primero ha último, iñepyrũ ha ipahaite. 14  Ovyʼa umi ojohéi vaʼekue ijao puku, ikatu hag̃uáicha oreko derécho hoʼúvo umi yvyramáta oporomoingovévagui, ha oike hag̃ua pe siudápe umi okẽrupi. 15  Okápe oĩ umi hénte ikyʼáva*, umi paje* apoha, umi hekovaíva*, oporojukáva, umi omombaʼeguasúva ñandejára guaʼu* ha opavave ohayhúva pe japu ha ijapu meméva.’ 16  ”‘Che, Jesús, amondo che ánhelpe oikuaauka hag̃ua peẽme koʼã mbaʼe ikatu hag̃uáicha ideprovécho umi kongregasiónpe*. Che hína David familiare* ha iñemoñare, pe estrélla koʼẽjumegua omimbipáva’”. 17  Pe espíritu sánto* ha pe nóvia akóinte heʼi: “¡Eju!”. Ha oimeraẽ ohendúva teʼi avei: “¡Eju!”. Ha oimeraẽ ijyʼuhéiva tou, ha oimeraẽ hoyʼuséva toyʼu pe y oporomoingovévagui, opagaʼỹre mbaʼeve. 18  “Aikuaauka hína opavave ohendúvape umi profesía oĩva ko lívrope: Oĩramo omoĩvéva koʼã mbaʼépe peteĩ mbaʼe jepe, Ñandejára omboúta hiʼári umi mbaʼe vai ojehaíva ko lívrope. 19  Ha oĩramo oipeʼáva peteĩ mbaʼe jepe ko profesíagui, Ñandejára ndohejamoʼãi orresivi umi mbaʼe porã heʼíva ko lívrope. Upéva heʼise Ñandejára ndohejamoʼãiha hoʼu pe yvyramáta oporomoingovévagui ni ndohejamoʼãiha chupe oike pe siuda marangatúpe. 20  ”Pe heʼíva añeteha koʼã mbaʼe heʼi avei: ‘Si, ahátama koʼẽrõite’.” “¡Taupéicha*! Eju che Ruvicha Jesús.” 21  Aipotaite ñande Ruvicha Jesucristo taimbaʼeporãiterei* enterove umi imarangatúvandi.

Nóta

Ehecha Informasión Oĩvéva 1.
Ehecha “Profesía”, diksionário oĩva ko Bíbliape.
Ehecha “Alfa ha Omega”, diksionário oĩva ko Bíbliape.
Griégope heʼi: “umi jagua”.
Pévape oike opaichagua espiritísmo ha okultísmo. Ehecha “Espiritísmo”, diksionário oĩva ko Bíbliape.
Ehecha “Tekovai”, Informasión Oĩvéva 4-pe.
Ehecha “Idolatría”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Griégope heʼi: “rapo”.
Ehecha “Espíritu Sánto”, diksionário oĩva ko Bíbliape.
Térã: “Amén”.
Térã: “tohechauka mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.