Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 2:1-29

2  ”Ehai pe ánhel oĩvape kongregasión* de Éfesope: Koʼã mbaʼe heʼi pe oguerekóva umi siete estrélla ipo deréchape, ha oguatáva umi siete lámpara renda* de óro mbytérupi:  ‘Che aikuaa opa mbaʼe rejapóva. Aikuaa ne rembiapo ha mbaʼéichapa regueropuʼaka heta mbaʼe, ha ndaikatuiha reaguanta umi kuimbaʼe añáme. Aikuaa avei retantea hague umi heʼívape ijehe haʼeha apóstol, péro ndahaʼéi, ha retopa haʼekuéra ijapuha.  Heta mbaʼe regueropuʼaka che réra káusare ha rehechauka neaguanteha, ha nanekaneʼõiha.  Upéicharamo jepe, areko peteĩ mbaʼe haʼe vaʼerã ne kóntrape: Nderehayhuvéima Ñandejárape, rehayhu haguéicha chupe iñepyrũme.  ”’Upévare, nemanduʼákena moõpa reime raʼe reʼa mboyve, eñarrepenti* ha ejapo jey umi mbaʼe rejapo vaʼekue iñepyrũme. Cháke nderejapóiramo, aháta ndéve ha aipeʼáta ne lámpara renda ilugárgui. Reñarrepentíramo katu ndajapomoʼãi upéva.  Péro ko mbaʼe oĩ nde favórpe: nderechaʼéi umi mbaʼe ojapóvare umi osegíva Nicolás omboʼéva*. Che ndachaʼéi avei umi mbaʼére.  Pe ijapysáva tohendu pe espíritu sánto* heʼíva umi kongregasiónpe: Pe oganávape ameʼẽta permíso hoʼu hag̃ua pe yvyramáta oporomoingovévagui, oĩva Ñandejára hardín neporãvape*’.  ”Ehai pe ánhel oĩvape kongregasión de Esmírnape: Koʼã mbaʼe heʼi pe ‘Primero ha Último’, omano vaʼekue ha upéi oikove jey:  ‘Che aikuaa rehasa asy ha nemboriahuha (péro nde ndepláta hína), aikuaa avei mbaʼéichapa otaky* nderehe umi heʼíva ijehe haʼeha hudío, péro añetehápe ndahaʼéi. Haʼekuéra hína peteĩ grúpo* oĩva Satanás* poguýpe. 10  Ani rekyhyje umi mbaʼe vai rehasátavagui. ¡Péina! Pende apytépe oĩta ohóva préso pe Aña* káusare. Péicha haʼe ojapóta opa ikatúva penetantea hag̃ua ha pehasa asýta diez día. Ejepytasókena che ykére remano meve ha che ameʼẽta ndéve pe jeikove peteĩ prémioicha*. 11  Pe ijapysáva tohendu pe espíritu sánto heʼíva umi kongregasiónpe: Pe oganávape ni mbaʼevéicharõ ndohupytymoʼãi pe ñemano mokõiha*’. 12  ”Ehai pe ánhel oĩvape kongregasión de Pérgamope: Koʼã mbaʼe heʼi pe orekóva pe espáda puku, hakuáva, ha haimbe jováiva: 13  ‘Che aikuaa moõpa reiko, oĩháme Satanás tróno. Upéicharamo jepe resegi reñakarama hatã che rérare ha nerenegái rejeroviaha cherehe. Nderejapói upéva ni ojejukárõ guare Antípaspe, che testígo jeroviaha. Chupe ojejuka nde siudápe, oikohápe Satanás. 14  ”’Upéicharamo jepe, arekoʼimi haʼe vaʼerã ne kóntrape: Oĩha nendive umi osegíva Balaam omboʼe vaʼekue. Haʼe ningo omboʼe Balácpe mbaʼéichapa ombotavýta umi Israelguápe, hoʼu hag̃ua hikuái umi mbaʼe oñekuaveʼẽva umi ñandejára guaʼúpe* ha hekovai* hag̃ua. 15  Avei oĩ nendive umi ifanátikova ha osegíva Nicolás omboʼéva*. 16  Upévare eñarrepentíke. Cháke nderejapóiramo upéva, aháta ndéve koʼẽrõite ha añorairõta hendivekuéra. Upearã aiporúta pe espáda puku osẽva che jurúgui. 17  ”’Pe ijapysáva tohendu pe espíritu sánto heʼíva umi kongregasiónpe: Pe oganávape ameʼẽta michĩmi pe mana* oñemokañýva ha ameʼẽta chupe peteĩ itaʼi morotĩ. Pe itaʼi ári ojehaíta peteĩ téra pyahu avave oikuaaʼỹva. Pe orresivíva pe itaʼi añoite oikuaa’. 18  ”Ehai pe ánhel oĩvape kongregasión de Tiatírape: Koʼã mbaʼe heʼi Ñandejára Raʼy, hesa haʼete tatarendy ha ipy katu ojogua kóvre porãme: 19  ‘Che aikuaa opa mbaʼe rejapóva, mbaʼéichapa reporohayhu, rejerovia, reservi Ñandejárape ha reaguanta heta mbaʼe. Aikuaa avei umi mbaʼe rejapóva koʼág̃a tuichaveha yma rejapo vaʼekuégui. 20  ”’Upéicharamo jepe, areko haʼe vaʼerã ne kóntrape: Reheja oĩ pende apytépe pe kuña Jezabel, heʼíva ijehe haʼeha profetísa*. Haʼe omboʼe ha ombotavy che rembiguaikuérape hekovai ha hoʼu hag̃ua hikuái umi mbaʼe oñekuaveʼẽva ñandejára guaʼúpe. 21  Ha che ameʼẽ chupe tiémpo oñarrepenti hag̃ua, péro haʼe noñarrepentiséi hekovai haguére. 22  ¡Péina! Amondóta chupe peteĩ mbaʼasy ivaietereíva, ha umi hekovai vaʼekue hendive tuicha ohasa asýta. Péicha oikóta hesekuéra noñarrepentíriramo umi mbaʼe haʼe ojapouka vaʼekuégui chupekuéra. 23  Pe kuña membykuérape katu amondóta peteĩ mbaʼasy oporojukáva omanomba hag̃ua hikuái. Péicha entéro kongregasión oikuaáta che haʼeha pe oipyguaráva umi mbaʼe umi hénte orekóva ipyʼa ruguaitépe, ha avei ikorasõme. Ha peẽme, káda únope amyengoviáta pene rembiapokuére. 24  ”’Upéicharõ jepe, peẽ peiméva avei Tiatírape, ndapesegíriva Jezabel omboʼéva ha ndapeikuaáiva pe oñembohérava Satanás “sekréto ipypukúva”; peẽme haʼe: Namoĩri hína pende ári ótra kárga. 25  Upéicharõ, peñakarama hatãkena umi mbaʼe porã perekóvare che aju peve. 26  Pe oganáva ha ojapóvape che haʼéva ipahaite peve, ameʼẽta autorida ogoverna hag̃ua umi tetãnguérare. 27  Haʼe oiporúta peteĩ vastón de iérro ogoverna hag̃ua umi héntepe, ha ohundíta chupekuéra. Haʼekuéra ojekapaitéta haʼeramoguáicha peteĩ kambuchi ojejapóva ñaiʼũgui. Peichagua autorida arresivi che Túvagui. 28  Ha che ameʼẽta chupe pe estrélla koʼẽjumegua. 29  Pe ijapysáva tohendu pe espíritu sánto heʼíva umi kongregasiónpe’.

Nóta

Ehecha “Kongregasión”, diksionário oĩva ko Bíbliape.
Ehecha “Lámpara Renda”, diksionário oĩva ko Bíbliape.
Ehecha “Arrepentimiénto”, diksionário oĩva ko Bíbliape.
Griégope heʼi: “Nicolás sékta”. Ehecha “Sékta”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “paraísope”.
Ehecha “Blasfemia”, diksionário oĩva ko Bíbliape.
Griégope heʼi: “Sinagóga”, ehecha diksionário oĩva ko Bíbliape.
Ehecha “Satanás”, diksionário oĩva ko Bíbliape.
Térã: “Diablo”, ehecha diksionário oĩva ko Bíbliape.
Griégope heʼi: “koróna”.
Upéva heʼise ñemano opa ára g̃uarã.
Ehecha “Idolatría”, diksionário oĩva ko Bíbliape.
Ehecha “Tekovai”, Informasión Oĩvéva 4-pe.
Griégope heʼi: “Nicolás sékta”.
Ehecha “Mana”, diksionário oĩva ko Bíbliape.
Ehecha “Profesía”, diksionário oĩva ko Bíbliape.