Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 18:1-24

18  Koʼã mbaʼe rire ahecha ótro ánhel oguejýva yvágagui. Haʼe oreko tuicha autorida ha hekomimbipa ohesapepaite pe yvy.  Haʼe osapukái hatã ha heʼi: “¡Hoʼáma! ¡Babilonia Guasu* hoʼáma, ha oiko chugui peteĩ lugár oiko hag̃ua umi demónio* ha okañy hag̃ua opaichagua espíritu kyʼa ha umi guyra ikyʼa ha ombojeguarúva opavavépe!  Haʼe hoʼuka entéro tetãnguérape ivíno, upéva hína pe víno omoakãrakúva chupekuéra hekovai* hag̃ua hendive. Ha okaʼupa hikuái, ha umi rréi yvy arigua hekovai meme hendive, ha umi komersiánte yvy arigua oñembopláta heta, umi mbaʼerepy haʼe ombyaty vaʼekue rupive; ha haʼe notĩri ombyaty haguére umíva”.  Ha ahendu ótro ñeʼẽ osẽva yvágagui ha heʼíva: “Peẽ che puévlo, pesẽke chugui napemoirũséiramo chupe ipekadokuérape ha ndapeipotáiramo penderupyty umi mbaʼe vai oikótava hese.  Ipekadokuéra ningo hetaiterei ha ohupytýma voi yvága, ha Ñandejára imanduʼa umi mbaʼe vai haʼe ojapo vaʼekuére.  Haʼe otrata haguéicha umi ótrope, upéicha avei ojetrata vaʼerã chupe, si, joʼa joʼa oñemyengovia vaʼerã chupe umi mbaʼe ojapo vaʼekuére. Pe kópape haʼe ombojeheʼa kuri peteĩ vevída, upéicharõ oñembojeheʼa vaʼerã avei peteĩ vevída añetehápe imbaretéva chupe g̃uarã.  Haʼe ningo oñembotuicha ha oreko hetaiterei mbaʼerepy, ha notĩri peichaite peve ombyaty haguére. Upévare añetehápe ohasa asy ha ojaheʼo vaʼerã. Ipyʼapýpe haʼe osegi heʼi meme: ‘Che ningo peteĩ rréina ha amanda guasu, che ndahaʼéi viúda ha arakaʼeve ndajaheʼomoʼãi’.  Upévare peteĩ díape oúta hiʼári umi mbaʼe vai: ñemano, jaheʼo ha ñembyahýi, ha ojehapypaitéta chupe tatápe. Upéicha oikóta hese, pe ohusgáva chupe imbarete rupi, ha upéva hína Ñandejára Jehová*.  ”Ha umi rréi yvy arigua hekovai meme ha okomparti vaʼekue hendive umi lúho haʼe ombyatýva otĩʼỹre, umíva hasẽ soróta hese ha ojepytiʼanupãta ñembyasýgui ohechávo pe tatatĩ ojupíva ojehapývo chupe. 10  Haʼekuéra oñemboʼýta mombyrymi guive okyhyjégui umi mbaʼe vai oikóvagui hese, ha heʼíta: ‘Aichejáranga, aichejáranga nde, Babilonia, pe siuda tuichaitéva ha imbaretéva. Una órape Ñandejára ndehusgáma’. 11  ”Umi komersiánte yvy arigua hasẽ soro ha ombyasy avei chupe, ndaiporivéimagui avave ojoguáva chuguikuéra umi mbaʼe oguerúva guive. 12  Haʼekuéra ogueru henyhẽte óro, pláta, ita iporãitereíva, pérla, líno iporãva, ao pytãhũ, séda, ao pytã asýva, opa mbaʼe ojejapóva madéra hyakuã porãvagui, opa mbaʼe ojejapóva marfílgui*, madéra iporãitereíva, kóvre, iérro ha mármol. 13  Ogueru avei hikuái kanéla, mbaʼe ryakuã porã oúva Índiagui, insiénso*, aséite hyakuã asýva, olívano*, víno, aséite de olíva, arína iporãva, trígo, vakakuéra, ovecha, kavaju, kárro, tembiguái ha yvyporakuéra*. 14  Si, opa mbaʼerepy reipota* vaʼekue nderejáma, ha opa mbaʼe hetereíva ha umi mbaʼe porãita reguereko vaʼekue opáma ndehegui ha arakaʼeve ndojetopamoʼãvéima. 15  ”Umi komersiánte ovende vaʼekue koʼã mbaʼe ha oñembopláta vaʼekue haʼe rupive, oñemboʼýta mombyrymi guive okyhyjégui umi mbaʼe vai oikóvagui hese, hasẽ soro ha oñembyasýta hikuái. 16  Haʼekuéra heʼíta: ‘Aichejáranga, aichejáranga nde..., pe siuda tuichaitéva, remonde vaʼekue líno iporãva, ao pytãhũ ha pytã asýva, ha remyenyhẽ vaʼekue ndejehe óro, ita iporãitereíva ha pérla. 17  ¡Una órape oñehundipaite hetaite mbaʼerepy!’. ”Ha entéro kapitán varkopegua, entéro oviaha meméva mar rehe, umi marinéro ha entéro ombaʼapóva márpe ohupyty hag̃ua hemikotevẽ, oñemboʼy mombyrymi guive, 18  osapukái ohechávo pe tatatĩ ojupíva ojehapývo chupe ha heʼi: ‘¿Oĩne piko ótra siuda ikatútava opyta ko siuda rendaguépe?’. 19  Haʼekuéra omoĩta yvytimbo iñakã arikuéra, osapukáita, hasẽ soróta, oñembyasy ha heʼíta hikuái: ‘Aichejáranga, aichejáranga..., pe siuda tuichaitéva, upépe ningo entéro umi várko jára oñembopláta vaʼekue umi mbaʼerepy orekóva rupive. Ha koʼág̃a una órape haʼe oñehundi’. 20  ”¡Evyʼákena yvága, ha pevyʼáke peẽ penemarangatúva, peẽ apóstol* ha profetakuéra*, Ñandejára ohusgáma rupi chupe penderehehápe!”. 21  Ha peteĩ ánhel imbaretéva ohupi peteĩ ita guasu*, opoi márpe ha heʼi: “Péicha pyaʼe ojepoíta Babilóniape, pe siuda tuichaitéva ha ndojetopamoʼãvéima chupe arakaʼeve. 22  Nde pype arakaʼeve noñehendumoʼãvéima umi ombopúva árpa ha opurahéiva, umi músiko, umi ombopúva fláuta, ni umi ombopúva trompéta. Ndojetopamoʼãvéima nde pype mbaʼeveichagua artesáno ha arakaʼeve noñehendumoʼãvéima molíno ryapu. 23  Nde pype ndohesapemoʼãvéima arakaʼeve ni peteĩ lámpara rendy, ha noñehendumoʼãvéima arakaʼeve pe nóvio ha pe nóvia oñeʼẽramo. Umi ne komersiantekuéra ningo haʼe vaʼekue umi poguasu yvy arigua, ha umi paje* rejapóva rupive rembotavy kuri opa tetãnguérape. 24  Si, ko siudápe ojetopa kuri umi proféta, umi imarangatúva ha entéro umi oñeñemboharái ha ojejuka vaʼekue ko yvy ape ári ruguykue”.

Nóta

Ehecha “Babilonia Guasu”, diksionário oĩva ko Bíbliape.
Ehecha “Demónio”, diksionário oĩva ko Bíbliape.
Ehecha “Tekovai”, Informasión Oĩvéva 4-pe.
Ehecha Informasión Oĩvéva 1.
Marfíl haʼe hína peteĩ mbaʼe hepyetereíva, oñeguenohẽva umi elefánte ha ótro mymba kolmíllogui.
Ehecha “Insiénso”, diksionário oĩva ko Bíbliape.
Peteĩ mbaʼe hyakuã asýva ojehapy jave.
Griégope heʼi: “yvyporakuéra álma”. Ehecha “Álma”, Informasión Oĩvéva 7A-pe.
Griégope heʼi: “ne álma oipota vaʼekue”.
Ehecha “Apóstol”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Yma ojeporu ita guasu oñemolina hag̃ua trígo, ha peteĩ vúrro ombojere umichagua molíno.
Pévape oike opaichagua espiritísmo ha okultísmo. Ehecha “Espiritísmo”, diksionário oĩva ko Bíbliape.