Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 14:1-20

14  Ha ¡péina!, ahecha pe Ovecharaʼy oñemboʼyha pe Sérro Sión ári, ha hendive ciento cuarenta y cuatro mil orekóva isyváre héra ha avei Itúva réra.  Ahendu oñeʼẽva yvágagui ha iñeʼẽ ryapu haʼete y osyry hatãva, ha arasunu guasúicha; ha pe tyapu ahendúva ojogua umi ombopúva árpa ha opurahéivape.  Haʼekuéra opurahéi peteĩ músika haʼetéva peteĩ purahéi pyahu pe tróno, umi cuatro keruvín* ha umi ansiáno* renondépe. Ha avave ndaikatúi opurahéi upe músika, síno umi ciento cuarenta y cuatro mil Ñandejára ojogua vaʼekue ko yvýgui añoite.  Koʼãva hína umi noñemongyʼái vaʼekue kuñándi, añetehápe haʼekuéra hekopotĩ*, ha osegi hikuái pe Ovecharaʼýpe toho ohohápe. Chupekuéra ojejogua vaʼekue yvyporakuéra apytégui, ha haʼekuéra hína pe kosécha tenondegua Ñandejára ha pe Ovecharaʼýpe g̃uarã.  Haʼekuéra nombotavýi avavépe heʼíva rupive, ha ndorekói mbaʼevete ivaíva.  Ha ahecha ótro ánhel ovevéva yvága mbytére, orekóva marandu porã* opytátava opa ára g̃uarã. Haʼe oikuaauka ko marandu umi oikóvape ko yvy ári, entéro tetã, trívu, puévlo ha umi oñeʼẽvape opaichagua idiómape.  Ha hatã heʼi: “Pekyhyje Ñandejáragui ha pembotuicha chupe, cháke og̃uahẽma pe óra haʼe oporohusga hag̃ua. Upévare, pemombaʼeguasúke Ñandejárape, upe ojapo vaʼekue yvága, yvy, mar ha yvukuéra”.  Ha pe segundo ánhel ou upe rire ha heʼi: “¡Hoʼáma! ¡Babilonia Guasu* hoʼáma, haʼe hoʼuka vaʼekue entéro tetãnguérape ivíno, upéva hína pe víno omoakãrakúva chupekuéra hekovai* hag̃ua hendive!”.  Pe tercer ánhel osegi chupekuéra ha hatã heʼi: “Oĩramo omombaʼeguasúva pe mymba ñarõme ha haʼangápe, ha orresivíva peteĩ márka isyváre térã ipóre, 10  hoʼúta avei Ñandejára víno, upéva hína ipochy rendy. Péva peteĩ víno ipuroitéva, Ñandejára oñohẽtava ikópape omoĩháme ipochy rendy. Ha oñembohasa asýta upe tapichápe tata ha asúfre reheve, umi ánhel imarangatúva ha pe Ovecharaʼy renondépe. 11  Umíva ohasa asýta tatápe ha pe hatatĩ osegíta opa ára g̃uarã. Chupekuéra akóinte oñembohasa asýta: ára ha pyhare, umi omombaʼeguasúva pe mymba ñarõme ha haʼangápe, ha oimeraẽ ohejáva oñemoĩ hese pe mymba ñarõ réra peteĩ márkaicha. 12  Upearã tekotevẽ umi imarangatúva oaguantakuaa, umi okumplíva Ñandejára mandamiénto ha ojerovia mbaretéva Jesús rehe”. 13  Ha ahendu peteĩ oñeʼẽva yvágagui ha heʼíva: “Ehai koʼã mbaʼe: Koʼág̃a guive ovyʼáta ñande Ruvicha disipulokuéra* omanóva. Si, pe espíritu heʼi: topytuʼu hikuái hembiapokuéragui, umi mbaʼe ojapo vaʼekue omoirũ rupi chupekuéra”. 14  Ha ¡péina!, ahecha peteĩ arai morotĩ ha hiʼári peteĩ ojoguáva yvypórape* ha orekóva peteĩ koróna de óro iñakãre ha ipópe peteĩ machéte haimbéva. 15  Ha ótro ánhel osẽ pe témplogui* ha osapukái hatã pe oguapývape pe arai ári: “Ejagarra ne machéte ha ekosecha, og̃uahẽmagui pe óra ojekosecha hag̃ua. Pe kóga ko yvy arigua otyarõmbaitéma”. 16  Upémarõ pe oguapýva pe arai ári, ojagarra imachéte ha okosecha pe kóga ko yvy arigua. 17  Ha ótro ánhel osẽ pe témplo oĩvagui yvágape ha haʼe oreko avei peteĩ machéte haimbéva. 18  Ha ótro ánhel osẽ pe altárgui* ha haʼe oreko ipoguýpe pe tata. Ha osapukái hatã pe orekóvape machéte haimbéva, heʼívo: “Ejagarra ne machéte haimbéva ha eikytĩ pe parrál apesã yvy arigua, hiʼajupáma rupi hiʼa”. 19  Upévo pe ánhel ojagarra imachéte, oikytĩ pe parrál yvy arigua ha omombo pe yvykua oñeñamiháme parrál rykue; upéva orrepresenta Ñandejára pochy rendy. 20  Umi kavaju opyrũ umi parrál rehe pe siuda okárape, ha pe tuguy osẽva upe lugárgui ojupi ohupyty peve umi kavaju akã, ha osyry trescientos kilómetrorupi.

Nóta

Ehecha “Keruvín”, diksionário oĩva ko Bíbliape.
Ehecha “Ansiáno”, diksionário oĩva ko Bíbliape.
Griégope heʼi: “vírhen”.
Ehecha “Marandu Porã”, diksionário oĩva ko Bíbliape.
Ehecha “Babilonia Guasu”, diksionário oĩva ko Bíbliape.
Ehecha “Tekovai”, Informasión Oĩvéva 4-pe.
Térã: “umi omoirũva ñande Ruvichápe”.
Griégope heʼi: “yvypóra raʼy”, ehecha diksionário oĩva ko Bíbliape.
Péva hína pe Lugár Imarangatuvéva. Ehecha “Lugár Imarangatuvéva”, diksionário oĩva ko Bíbliape.
Ehecha “Altár”, diksionário oĩva ko Bíbliape.