Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 12:1-17

12  Upéi ojehecha yvágape peteĩ techapyrã tuicháva, peteĩ kuña oñemondéva kuarahýpe, pe jasy oĩ ipy guýpe ha iñakãre oreko peteĩ koróna ojejapóva doce estréllagui.  Ha haʼe hyeguasu, ha osapukái asy hasyetémagui imemby hag̃ua.  Ha ojehecha yvágape ótro techapyrã. ¡Péina!, peteĩ dragón* guasu pytã asýva, siete iñakã ha diez hatĩva, ha oreko siete koróna.  Ha huguáipe ombotyryry peteĩ párte* umi estrélla yvagapegua, ha omombo yvy ári. Ha pe dragón oñemboʼy pe kuña imembypotaitéva renondépe, ikatu hag̃uáicha omokõ pe mitãme onase vove.  Pe kuña imemby peteĩ mitãkuimbaʼe; haʼe ogovernáta opa tetãnguéra peteĩ vastón de iérro reheve. Ha onasemírente pe mitã, Ñandejára pyaʼe ogueraha chupe itróno gotyo.  Pe kuña katu odipara oho desiértore, upépe oreko peteĩ lugár Ñandejára oprepara vaʼekue chupe, ha haʼe okaru vaʼerã upépe mil doscientos sesenta díare.  Ha oiko peteĩ gérra yvágape: Miguel ha hiʼanhelkuéra oñorairõ pe dragón kóntrape, ha pe dragón ha hiʼanhelkuéra oñorairõ ikontrapekuéra.  Péro haʼekuéra* noganái, ha ndaiporivéima hendag̃uakuéra yvágape.  Upévare, oñemombo yvy gotyo pe dragón guasúpe, haʼéva pe mbói ypykue oñehenóiva Diablo* ha Satanás*, ombotavýva hína ko múndo* kompletoitépe. Chupe oñemombo yvy gotyo ha hiʼanhelkuérape oñemombo hendive. 10  Ha ahendu peteĩ oñeʼẽ hatãva yvágape ha heʼíva: “¡Péina! Ñandejára oguerúma salvasión yvyporakuérape, ipodér ojehechaukáma, Irréino oñemoĩma hendag̃uáme, ha Cristo* oñepyrũma oiporu ijautorida. Haʼekuéra omombóma yvy gotyo pe oho vaʼekuépe ára ha pyhare Ñandejára renondépe okopi hag̃ua ñane ermanokuérare. 11  Haʼekuéra ipuʼaka hese pe Ovecharaʼy ruguy rupive, ha pe marandu haʼekuéra oikuaaukáva rupive. Ha ojejukátaramo jepe chupekuéra, nahakateʼỹi hikuái hekovére*. 12  Upévare, ¡tovyʼákena umi yvága ha umi oikóva upépe! Aichejáranga pe yvy ha pe mar, oguejy rupi peẽme pe Aña*, haʼe orrenegaiterei hína oikuaágui mbykypaitemaha itiémpo”. 13  Upéi, pe dragón ohechakuaávo oñemombo hague chupe yvýpe, opersegi pe kuña oreko vaʼekuépe pe mitãkuimbaʼe. 14  Péro pe kuñáme oñemeʼẽ mokõi ágila pepo guasu, ikatu hag̃uáicha oveve desiértope, pe lugár ojeprepara haguépe chupe. Upépe haʼe okaru vaʼerã peteĩ tiémpo, mokõi tiémpo ha médio tiémpore, mombyry pe mbóigui. 15  Pe mbói katu opoi ijurúgui y peteĩ rríoicha pe kuña rapykuéri, ikatu hag̃uáicha haʼe ojahoga pe rríope. 16  Péro pe yvy ou oipytyvõ pe kuñáme, ha pe yvy ojurupeʼa ha omokõ pe rrío pe dragón oity vaʼekue ijurúgui. 17  Ha pe dragón ipochyeterei pe kuña ndive, ha oho oñorairõ pe kuña ñemoñare hembývandi; umíva okumpli Ñandejára mandamientokuéra ha oñenkarga chupekuéra oñeʼẽ vaʼerãha Jesús rehe.

Nóta

Térã: “peteĩ mbói ndetuichapa jepéva”.
Griégope heʼi: “1/3 (peteĩ káda tres pártegui)”.
Griégope heʼi: “haʼe”. Kóva hína pe dragón.
Ehecha “Diablo”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Griégope heʼi: “pe Cristo imbaʼéva”. Ehecha “Cristo”, diksionário oĩva ko Bíbliape.
Griégope heʼi: “hiʼálmare”. Ehecha “Álma”, Informasión Oĩvéva 7A-pe.
Térã: “Diablo”.