Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 11:1-19

11  Oñemeʼẽ chéve peteĩ takuára amedi hag̃ua, ha haʼe heʼi chéve: “Epuʼã emedi Ñandejára témplo, pe altár* ha umi omombaʼeguasúva Ñandejárape upépe.  Péro ani remedi pe korapy oĩva oñesẽvo pe témplogui, emombo guei okápe, upéva oñemeʼẽgui umi tetãnguérape, ha haʼekuéra opyrũmbáta pe siuda marangatúre cuarenta y dos mésere.  Che katu amondóta mokõi che testígope oprofetisa* hag̃ua mil doscientos sesenta díare ha omondéta hikuái ao chalái*”.  Umi mokõi olívo máta ha umi mokõi lámpara renda* orrepresenta koʼãvape, ha haʼekuéra oñemboʼy hína ko yvy Ruvicha renondépe.  Oĩramo ojaposéva ivaíva hesekuéra, umi testígo jurúgui osẽ tata ha ohundi iñenemigokuérape, ha oĩramo sapyʼa ojaposéva ivaíva hesekuéra péicha avei ojejuka vaʼerã chupe.  Koʼã testígo oreko autorida omboty hag̃ua pe yvága ani hag̃ua oky haʼekuéra oprofetisa aja. Oreko avei autorida ojapo hag̃ua tuguy umi ýgui ha ojapo hag̃ua opa mbaʼe vai, ikatu hag̃uáicha oporombohasa asy ko yvy ape ári haʼekuéra oipotaha óra.  Haʼekuéra omohuʼã vove ipredikasión, pe mymba ñarõ ojupíva pe yvykua pypukúgui* oñorairõta hendivekuéra, ipuʼakáta hesekuéra ha ojukáta chupekuéra.  Umi hetekue oĩta pe tape iñimportantevévape oĩva pe siuda guasúpe (ko siudápe orrepresenta vaʼekue Sodoma ha Egipto). Upépe avei oñemosaingo vaʼekue yvyráre Huvichápe.  Ha umi puévlo, trívu, umi oñeʼẽva opaichagua idióma ha umi tetãnguéra, omañáta umi teʼonguére tres día imédiore, ha ndohejamoʼãi oñeñotỹ umi profétape. 10  Ha umi oikóva ko yvy ape ári ovyʼáta, ha ofesteháta omano haguére hikuái, ha omondóta ojupe rregálo, umi mokõi proféta ombohasa asýgui chupekuéra. 11  Ha tres día imédio rire, Ñandejára espíritu oporomoingovéva oike ipypekuéra ha umi proféta oñemboʼy jey. Upévo opyta okyhyjeterei entéro ohecha vaʼekue chupekuéra. 12  Ha umi proféta ohendu peteĩ oñeʼẽ hatãva yvága guive ha heʼíva chupekuéra: “Pejupi koʼápe”. Ha haʼekuéra ojupi yvágape pe araípe, ha iñenemigokuéra ohecha chupekuéra. 13  Upe órape oiko peteĩ yvyryrýi tuicháva ha hoʼa peteĩ párte* pe siudágui; ha pe yvyryrýi ojuka siete mil persónape. Umi opytáva katu tuichaiterei oñemondýi ha ombotuicha Ñandejára yvagapeguápe. 14  Pe segundo provléma ohasáma. ¡Péina!, pe tercer provléma ou hína pyaʼeterei. 15  Upéi pe séptimo ánhel ombopu itrompéta. Upévo oñehendu umi oñeʼẽ hatãva yvágape ha heʼíva: “Ñandejára ha Cristo* Rréino ogoverna hína yvyporakuérape, ha haʼe ogovernáta opa ára g̃uarã”. 16  Upévo umi veinticuatro ansiáno* oguapýva itrónope Ñandejára renondépe, oñesũ omombaʼeguasu Ñandejárape, 17  ha heʼi: “Jehová*, nde ningo Ñandejára Ipuʼakapáva, reiméva koʼág̃a ha reime vaʼekue yma, roagradese ndéve rejagarra haguére nde puʼaka tuichaitéva ha reñepyrũ regoverna. 18  Péro umi tetãnguéra ipochy, ha nde rehechauka ndepochyha hendivekuéra. Ha og̃uahẽ pe tiémpo remoĩ vaʼekue rehusga hag̃ua umi omano vaʼekuépe, ha remyengovia porã hag̃ua umi profétape haʼéva ne rembiguái, umi imarangatúvape ha umi okyhyjévape nde réragui, tahaʼe michĩva térã tuicháva. Og̃uahẽ avei pe tiémpo rehundi hag̃ua umi ohundívape ko yvy”. 19  Ha ojavri Ñandejára témplo oĩva yvágape ha ahecha pe árka del pákto*. Avei ahendu oĩha oñeʼẽva ha arasunu; ahecha aratiri, oiko peteĩ yvyryrýi ha hoʼa amandáu tuichaicháva.

Nóta

Ehecha “Altár”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ao ohechaukáva ñembyasy ha vyʼaʼỹ.
Ehecha “Lámpara Renda”, diksionário oĩva ko Bíbliape.
Ehecha “Yvykua Pypuku”, diksionário oĩva ko Bíbliape.
Griégope heʼi: “1/10 (peteĩ káda diez pártegui)”.
Griégope heʼi: “pe Cristo imbaʼéva”. Ehecha “Cristo”, diksionário oĩva ko Bíbliape.
Ehecha “Ansiáno”, diksionário oĩva ko Bíbliape.
Ehecha Informasión Oĩvéva 1.
Ehecha “Árka del Pákto”, diksionário oĩva ko Bíbliape.