Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 10:1-11

10  Ha ahecha ótro ánhel imbaretéva oguejýva yvágagui, haʼe oñemonde araípe, oreko peteĩ árko íris iñakã ári, hova ojogua kuarahýpe ha hetyma katu haʼete mokõi kolúmna imbaretéva ha ojoguáva tatarendýpe.  Ipópe oguereko peteĩ kuatiañeʼẽʼi ojavríva. Ha omoĩ ipy derechapegua márpe ha ipy iskiérdo katu yvy ári.  Haʼe osapukái hatã, haʼete voi peteĩ león okororõva. Ha haʼe osapukáivo oñehendu oñeʼẽha umi siete arasunu.  Umi siete arasunu oñeʼẽvo, che ajepreparáma ahai hag̃ua, péro ahendu peteĩ oñeʼẽva yvágagui ha heʼíva: “Eñongatu umi siete arasunu heʼi vaʼekue, ha ani rehai”.  Pe ánhel ahecha vaʼekue oñemboʼyha pe mar ha yvy ári, ohupi ipo derécha yvága gotyo.  Ha haʼe ohura pe Oikovévare opa ára g̃uarã, ojapo vaʼekue yvága, yvy, pe mar ha opa mbaʼe oĩva ipypekuéra, heʼívo: “Ñandejára nohaʼarõmoʼãvéima.  Péro og̃uahẽvo umi día pe séptimo ánhel omboputaha itrompéta, upérõ oñekumplipáta Ñandejára sekréto marangatu*, upéva hína pe marandu porã* haʼe oikuaaukáva umi profétape* oservíva chupe tembiguáiramo”.  Ha ahendu pe ñeʼẽ oúva yvágagui oñeʼẽ jeyha chéve ha heʼi: “Tereho ejagarra pe kuatiañeʼẽ ojavríva, orekóva ipópe pe ánhel oñemboʼýva pe mar ha yvy ári”.  Upévo aha pe ánhel rendápe ha ajerure chupe pe kuatiañeʼẽʼi. Ha haʼe heʼi chéve: “Ejagarra heʼu, nde jurúpe eiretéicha heʼẽta, nde pyʼápe katu iróta”. 10  Ajagarra pe kuatiañeʼẽʼi pe ánhel pógui ha haʼu, ha che jurúpe eiretéicha heʼẽ, péro amokõ rire iro che pyʼápe. 11  Haʼekuéra heʼi chéve: “Reprofetisa jey vaʼerã mbaʼépa oikóta umi puévlore, tetãnguérare, umi hénte oñeʼẽvare opaichagua idióma, ha avei mbaʼépa oikóta heta rréire”.

Nóta

Ehecha “Sekréto Marangatu”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Profesía”, diksionário oĩva ko Bíbliape.