Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Apocalipsis 1:1-20

1  Koʼã mbaʼe Jesucristo orresivi Ñandejáragui ha koʼág̃a oikuaauka hína. Haʼe orresivi koʼã mbaʼe ohechauka hag̃ua Ñandejára rembiguaikuérape umi mbaʼe oikótava koʼẽrõite. Jesús omondo hiʼánhel Juan rendápe, haʼéva hína Ñandejára rembiguái*, omombeʼu hag̃ua chupe koʼã mbaʼe peteĩ visión* rupive.  Haʼe oikuaauka Ñandejára Ñeʼẽ ha Jesucristo heʼi vaʼekue, si, omombeʼupaite opa mbaʼe ohecha vaʼekue.  Ovyʼa pe oleéva hatã porã ko profesía*, umi ohendúva umi ñeʼẽ ha umi ojapóva heʼíva pype; cháke pe tiémpo oñemoĩ vaʼekue hiʼag̃uimbaitéma hína.  Juan ohai umi siete kongregasiónpe* oĩva Ásiape*: Aipotaite “Ñandejára oĩva koʼág̃a, oĩ vaʼekue yma ha oúva hína”, ha umi siete espíritu oĩva itróno renondépe omeʼẽ peẽme mbaʼeporã ijojahaʼỹva* ha pyʼaguapy.  Aipota avei Jesucristo taimbaʼeporãiterei penendive ha tomeʼẽ peẽme pyʼaguapy, haʼe hína “pe Testígo Jeroviaha”, “Pe tenondete opuʼã vaʼekue omanóva apytégui” ha “Pe Ogovernáva umi rréi ko yvy ariguápe”. Haʼe ñanderayhu ha ñandepeʼa ñande pekadokuéragui huguy rupive  (haʼe ojapo ñandehegui rréi ha saserdóte* Ñandejárape g̃uarã, haʼe hína Itúva ha Ijára). Si, chupe toñemeʼẽ tekomimbipa ha podér opa ára g̃uarã. Taupéicha*.  ¡Péina! Haʼe ou hína umi arai ári ha opavave ohecháta chupe, umíva apytépe umi oikutu vaʼekue chupe; ha entéro trívu ko yvy arigua ojepytiʼanupãta ñembyasýgui ikáusare. Si, taupéicha.  “Che hína Alfa ha Omega*”, heʼi Ñandejára Jehová*, “Pe oĩva koʼág̃a, oĩ vaʼekue yma ha oúva hína, Ñandejára Ipuʼakapáva”.  Che, Juan, pene ermáno, pomoirũ pende jehasa asýpe, aaguanta ha agovernáta penendive che haʼégui Jesús segidór. Che aime kuri ísla Pátmospe añeʼẽ rupi Ñandejárare ha apredika haguére Jesús rehe. 10  Espíritu sánto* rupive ajegueraha ñande Ruvicha árape, ha ahendu che kupépe peteĩ oñeʼẽ hatãva, iñeʼẽ ojoguáva trompéta púpe, 11  ha heʼíva: “Umi mbaʼe rehecháva ehai peteĩ kuatiañeʼẽme ha emondo umi siete kongregasiónpe oĩva Éfeso, Esmirna, Pérgamo, Tiatira, Sardis, Filadelfia ha Laodicéape”. 12  Ha ajere ahecha hag̃ua mávapa la oñeʼẽva chéve, ha ajerévo ahecha siete lámpara renda* de óro. 13  Ha umi lámpara renda mbytépe oĩ peteĩ ojoguáva yvypórape*, omondéva peteĩ ao puku ha orekóva peteĩ fáha de óro ipytiʼáre. 14  Iñakãrague ningo morotĩ asy, haʼete niéve ha hesa ojogua tatarendýpe. 15  Ipy ojogua kóvre porãme, omimbíva oñemoingévo tatakuápe; ha iñeʼẽ katu hyapu y osyry hatãvaicha. 16  Ipo deréchape oreko siete estrélla, ijurúgui osẽ peteĩ espáda ipukúva, hakuáva ha haimbe jováiva, ha hova omimbi pe kuarahy omimbiháicha asajepyte. 17  Ha ahechávo chupe, haʼa henondépe ku amanorõguáicha. Haʼe katu omoĩ ipo derécha che ári ha heʼi: “Ani rekyhyje. Che hína pe Primero ha Último, 18  ha pe oikovéva; amano kuri ha ¡péina!, aikove hína opa ára g̃uarã ha aguereko pe lláve aavri hag̃ua pe ñemano ha Sepultúra*. 19  Upévare, ehai umi mbaʼe rehecha vaʼekue, umi mbaʼe oikóva koʼág̃a ha umi oikótava upe rire. 20  Umi siete estrélla rehecha vaʼekue che po deréchape ha umi siete lámpara renda de óro ningo peteĩ sekréto marangatu*, ha umíva heʼise ko mbaʼe: Umi siete estrélla orrepresenta umi ánhel oĩva umi siete kongregasiónpe, ha umi siete lámpara renda orrepresenta umi siete kongregasiónpe.

Nóta

Térã: “Jesús rembiguái”.
Ehecha “Visión”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Ehecha nóta oĩva Hch 2:9-pe.
Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Saserdóte”, diksionário oĩva ko Bíbliape.
Térã: “Amén”.
Ehecha “Alfa ha Omega”, diksionário oĩva ko Bíbliape.
Ehecha Informasión Oĩvéva 1.
Ehecha “Espíritu Sánto”, diksionário oĩva ko Bíbliape.
Ehecha “Lámpara Renda”, diksionário oĩva ko Bíbliape.
Griégope heʼi: “yvypóra raʼy”, ehecha diksionário oĩva ko Bíbliape.
Griégope heʼi: “Hades”, ehecha Informasión Oĩvéva 8.
Ehecha “Sekréto Marangatu”, diksionário oĩva ko Bíbliape.