Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Gálatas 5:1-26

5  Cristo* ñanemosãso vaʼekue jareko hag̃ua pe liverta. Upévare pejepytasókena ha ani peiko jey tembiguáiramo.  Chete Pablo haʼe peẽme: peñesirkunsidáramo, Cristo ndaideprovechomoʼãi peẽme.  Avei pomomanduʼa jey, entéro kuimbaʼe oñesirkunsidáva okumpli vaʼerãha katuete pe Léi* kompletoite.  Peẽ peipota ojeʼe penderehe penderekojojaha* pekumpli rupi pe Léi, péro péicha peñemomombyry Crístogui ha ndaikatúi penderupyty imbaʼeporã ijojahaʼỹva*.  Oréve katu hiʼãiterei orerekojoja Ñandejára resa renondépe, espíritu sánto* ha ore jerovia rupive.  Péro Cristo Jesús segidorkuérape g̃uarã ndovaléi mbaʼeverã oñesirkunsida térã noñesirkunsidáiramo, la ovaléva hína ojeroviáramo hikuái oporohayhu rupi.  Peẽngo peho porã kuri hese. ¿Mávaiko pendestorva raʼe anive hag̃ua peneñeʼẽrendu pe añeteguápe?  ¿Mávaiko penemboliga pejapo hag̃ua péicha? Ndahaʼéi hína Upe penerenói vaʼekue.  Cháke michĩmi levadúra ombovupaitéma pe mása kompletoite. 10  Ajerovia peẽ pejoajúva ñande Ruvicháre pepensataha che apensaháicha; péro tahaʼe haʼéva upe penemolestáva, ohupytýta chupe pe kastígo omereséva. 11  Che ermanokuéra, che asegíramo gueteri apredika pe sirkunsisión, ¿mbaʼére piko upéicharõ oĩ gueteri chepersegíva? Che asegíramo apredika pe sirkunsisión, upéicharõ pe yvyra pohýi* nomoñepysangamoʼãvéima avavépe. 12  Aipotaite umi kuimbaʼe heʼíva peẽme peñesirkunsida hag̃ua, haʼekuéra voi tojapo ijehe* peteĩ mbaʼe ivaivéva. 13  Che ermanokuéra, peẽ ningo pejeporavo vaʼekue pereko hag̃ua liverta, péro aníke peiporu pe liverta peiko hag̃ua pende rete rembipota vai rapykuéri. Upéva rangue, peservi ojupe tembiguáiramo peporohayhu rupi. 14  Pe Léi kompletoite oñekumpli peteĩ mandamiénto rupive: “Rehayhu vaʼerã nde rapichápe, nde rejehayhuháicha”. 15  Péro peẽ pesegínteramo peñokarãi ha peñorairõ oñondive, peñatendéke, cháke péicha peẽ voi ikatu peñohundipa. 16  Péro che haʼe peẽme: Pesegíkena peiko pe espíritu poguýpe ha péicha ni mbaʼevéicharõ ndapejapomoʼãi pende rete rembipota vai. 17  Ñande rete rembipota oñemoĩ pe espíritu rehe, ha pe espíritu oñemoĩ ñande rete rembipotáre; mokõivéva oñemoĩ ojuehe, upévare ndaikatúi pejapo umi mbaʼe pejaposéva. 18  Avei pehejáramo pe espíritu penesãmbyhy, peẽ napeiméi Léi poguýpe. 19  Yvypóra rembipota vai ojekuaa porã umi mbaʼe ojapóvare, oĩ hína hekovaíva*, hekokyʼáva*, notĩriva* hembiapo vai hag̃ua, 20  omombaʼeguasúva ñandejára guaʼu*, ojapóva paje*, ijarhélva, ipyʼaróva, ipochy* reíva, oiko vaíva ótrondi, ojoavýva, osegíva yvyporakuéra omboʼéva, 21  iñenvidiósova, ikaʼúva, ofarreáva itarovávaicha, ha umícha. Che haʼéma voi kuri peẽme ha koʼág̃a poavisa jey: umi osegíva ojapo koʼã mbaʼe, ndoikemoʼãi Ñandejára Rréinope. 22  Umi mbaʼe porã oúva Ñandejára espíritugui haʼe: mborayhu, vyʼa, pyʼaguapy, pasiénsia, pyʼaporã, mbaʼeporã, jerovia, 23  pochyʼỹ ha jejokokuaa. Ndaipóri léi oñemoĩva koʼã mbaʼére. 24  Avei umi osegíva Cristo Jesúspe, ojuka* hete rembipota vai ha umi mbaʼe vai omoakãrakúva chupekuéra. 25  Upéicharõ, jahejáramo Ñandejára espíritu ñanesãmbyhy, jasegi vaʼerã jaiko hekoitépe pe espíritu oipotaháicha. 26  Aníkena ñañembovaleterei, ni jaiko vai ñande rapichándi ñaganaségui chupe, ni ñaneenvidióso.

Nóta

Ehecha “Cristo”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Hekojojáva Ñandejára Renondépe”, diksionário oĩva ko Bíbliape.
Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha “Yvyra Pohýi”, Informasión Oĩvéva 6-pe.
Griégope heʼi: “tojekapa ijupe voi”.
Ehecha “Tekovai”, Informasión Oĩvéva 4-pe.
Ehecha “Tekokyʼa”, diksionário oĩva ko Bíbliape.
Ehecha “Conducta Desvergonzada”, diksionário oĩva ko Bíbliape.
Ehecha “Idolatría”, diksionário oĩva ko Bíbliape.
Pévape oike opaichagua espiritísmo ha okultísmo. Ehecha “Espiritísmo”, diksionário oĩva ko Bíbliape.
Térã: “iselósova”.
Griégope heʼi: “omosaingo yvyráre”.