Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Gálatas 2:1-21

2  Upéi, catorce áño rire, ajupi jey Jerusalénpe Bernabé ndive, ha agueraha avei chendive Títope.  Che aha ñande Ruvicha oikuaauka rupi chéve aha vaʼerãha. Ha apresenta umi ermánope umi marandu porã* apredikáva tetã ambuegua apytépe. Upearã roñembyaty umi kuimbaʼe iñimportánteva ndive, ikatu hag̃uáicha aikuaa porã ndajaporeiriha yma guive koʼág̃a peve upe tembiapo.  Tito ningo griégo ha oĩ kuri chendive, upéicharamo jepe, ndojeovligái chupe oñesirkunsida hag̃ua.  Pe provléma oñepyrũ kuri umi ermáno guaʼu káusare. Haʼekuéra ou pe kongregasiónpe* opeska hag̃ua orerehe. Ombyaise hikuái pe liverta ore roguerekóva haʼégui Cristo* Jesús disípulo*. Haʼekuéra mbaretépe oremoĩse jey tembiguáiramo pe Léi* poguýpe...  Péro ore noroñemeʼẽi chupekuéra ha noroñemoĩri ipoguypekuéra ni sapyʼaitemi jepe, ikatu hag̃uáicha pe añetegua peikuaáva umi marandu porã rupive osegi penendive.  Umi ermáno ojerrespetaitéva ha iñimportánteva katu añetehápe nomombeʼúi chéve mbaʼeve ipyahúva (tahaʼe haʼéva upe ojapo vaʼekue hikuái yma, upéva ndoúi ni ndohói chéve..., Ñandejára nomañáigui kuimbaʼekuéra píntare).  Haʼekuéra ohechakuaa oñemanda hague chéve apredika vaʼerãha umi marandu porã umi noñesirkunsidáivape, Pédrope oñemanda haguéicha opredika vaʼerãha umi oñesirkunsidávape.  (Ñandejára ombokatupyry Pédrope oservi hag̃ua apóstolramo* umi oñesirkunsidávape, ha chéve avei chembokatupyry ajapo hag̃ua upe tembiapo umi tetã ambuegua apytépe.)  Santiago, Cefas ha Juan ningo kolúmna kongregasionpegua. Haʼekuéra ohechakuaávo Ñandejára imbaʼeporãitereiha* chendive, orepopyhy Bernabé ha chéve ohechauka hag̃ua enterove ore haʼeha oñoirũ; ha ore roho vaʼerãha umi tetã ambueguápe, péro haʼekuéra opytataha umi oñesirkunsidáva apytépe. 10  Haʼekuéra ojerurénte oréve oremanduʼa meme hag̃ua umi imboriahúvare; ha upéva che añehaʼãmbaite ajapo. 11  Cefas oúrõ guare Antioquíape katu, derechoite haʼe chupe hovaitépe oĩ vaiha upe ojapóva. 12  Ou mboyve umi kuimbaʼe ombou vaʼekue Santiago, haʼe okaru oikóvo kuri umi tetã ambueguándi; péro og̃uahẽvo umi kuimbaʼe, haʼe ndojapovéima upéva ha oñemomombyry, okyhyje rupi umi oñesirkunsidávagui. 13  Umi ótro hudío hovamokõi avei haʼéicha; ha ipahápe Bernabé entéro hovamokõima avei haʼekuéraicha. 14  Péro che ahechávo haʼekuéra ndoikoiha pe marandu porã heʼiháicha, haʼe Céfaspe enterove rovake: “Nde ningo hudío ha upéicharamo jepe ndereikói umi hudíoicha, síno umi tetã ambueguáicha, ¿ha piko mbaʼéicha reovligáta umi tetã ambueguápe oiko hag̃ua umi hudío oikoháicha?”. 15  Ñande ningo hudío ñanase guive, ndahaʼéi pekadór tetã ambuegua, 16  ha jahechakuaa peteĩ kuimbaʼe hekojojaha* ojerovia rupi Cristo Jesús rehe añónte, ndahaʼéi okumpli haguére pe Léi heʼíva. Upévare jajerovia Cristo Jesús rehe, ikatu hag̃uáicha ñanderekojoja jajerovia rupi Crístore, ha ndahaʼéi ñakumpli haguére pe Léi heʼíva. Avavére ndojeʼemoʼãi hekojojaha okumpli haguére pe Léi heʼíva. 17  Péro ojeʼéramo japekaha ñañehaʼã rupi ñanderekojoja Cristo rupive, ¿heʼise piko upéva Cristo ñanemboligaha japeka hag̃ua? ¡Ni mbaʼevéicharõ! 18  Aikóramo amopuʼã jey umi mbaʼe yma aity vaʼekue yvýre, ahechauka che voi nakumpliriha pe Léi. 19  Péro che amano pe Léipe g̃uarã, pe Léi voi chejukágui ikatu hag̃uáicha aikove Ñandejárape g̃uarã. 20  Koʼág̃a añemosaingo yvyráre Cristo ndive. Ndahaʼevéima che la aikovéva, síno Cristo oiko chendive. Añetehápe koʼág̃a aiko hína yvypóraicha ajerovia rupi Ñandejára Raʼýre, haʼe ningo cherayhu ha oñemeʼẽ cherehehápe. 21  Che namboykéi Ñandejára mbaʼeporã ijojahaʼỹva; peteĩ kuimbaʼe hekojojáramo okumpli haguére pe Léi, añetehápe Cristo omano reiete.

Nóta

Ehecha “Marandu Porã”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Léi”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Térã: “ohechaukaha chéve mbaʼeporã ijojahaʼỹva”.
Ehecha “Hekojojáva Ñandejára Renondépe”, diksionário oĩva ko Bíbliape.