Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Gálatas 1:1-24

1  Che, Pablo, aservi apóstolramo*, ndahaʼéi peteĩ kuimbaʼe oipotágui ni yvypóra rupive, síno Jesucristo ha ñande Ru Ñandejára rupive, upe omopuʼã vaʼekue chupe omanóva apytégui.  Che ha entéro umi ermáno oĩva chendive, rohai umi kongregasiónpe* oĩva Galáciape:  Aipotaite ñande Ru Ñandejára, ha ñande Ruvicha Jesucristo, taimbaʼeporã* penendive ha tomeʼẽ peẽme pyʼaguapy.  Jesucristo oñemeʼẽ vaʼekue oipeʼa hag̃ua ñande pekadokuéra, ikatu hag̃uáicha ñandepeʼa ko múndo* añágui, ñande Ru Ñandejára oipota haguéicha.  Ñandejárape oñembotuicha vaʼerã opa ára g̃uarã. Taupéicha*.  Chejurujái ningo ahechávo mbaʼéichapa pyaʼete peñemomombyry Upe penerenói vaʼekuégui Cristo* mbaʼeporã ijojahaʼỹva rupive, ha peñepyrũ pehendu ótro marandu porã.  Péro ndaipóri ótro marandu porã. Oĩnte hína pende apytépe umi penembohasa asýva ha okambiaséva umi marandu porã* oñeʼẽva Crístore.  Upéicharõ jepe, oimérõ ore térã peteĩ ánhel yvagapegua oikuaauka peẽme peteĩ marandu porã idiferénteva umi ore roikuaauka vaʼekuégui peẽme, oñekondena vaʼerã.  Roʼéma haguéicha angete, koʼág̃a haʼe jey peẽme: Tahaʼe haʼéva upe oikuaaukáva peẽme peteĩ marandu porã idiferénteva umi ore roikuaauka vaʼekuégui peẽme, oñekondena vaʼerã. 10  ¿Che piko añemoĩ porãse kuimbaʼekuérandi térãpa Ñandejára ndive? Oiméramo añemoĩ porãse hína kuimbaʼekuérandi, che ndahaʼéi Cristo rembiguái. 11  Aipota peikuaa che ermanokuéra, umi marandu porã aikuaauka vaʼekue peẽme ndouiha yvypóragui. 12  Umíva che ndarresivíri yvypóragui ni avave nachemboʼéi, síno Jesucristo voi oikuaauka chéve. 13  Katuete peẽ pehendúne raʼe mbaʼépa che ajapo vaʼekue aĩrõ guare hudiokuéra rrelihiónpe, mbaʼéichapa apersegi vaipaite Ñandejára kongregasión ha añehaʼãmbaite ahundi. 14  Che retãme pyaʼetereive añakãrapuʼã hudiokuéra rrelihiónpe umi chejaveguakuéragui, ha amombaʼeterei che tuvakuéra kostúmbre. 15  Ñandejára opermiti vaʼekue anase ha imbaʼeporãiterei rupi cheporavo. Haʼe odesidi iporãtaha 16  ojevaléramo cherehe aikuaauka hag̃ua umi marandu porã umi tetã ambueguápe, oikuaa hag̃ua hikuái Itaʼýrape. Haʼe cheporavórõ guare upearã che naporandúi avavépe mbaʼépa ajapóta. 17  Ndajupíri avei Jerusalénpe umi apóstol rendápe, haʼekuéra oĩramo jepe apóstolramo che mboyve. Aha guei Arábiape ha upéi aha jey Damáscope. 18  Upe rire, tres áño haguépe, ajupi Jerusalénpe Cefas rendápe ha apyta hendive quince día. 19  Péro ndahechái ni peteĩ umi ótro apóstolpe, síno Santiágope añónte, haʼéva ñande Ruvicha ermáno. 20  Umi mbaʼe ahaívare peẽme katu, Ñandejára renondépe ahura ndachejapuiha. 21  Upéi aha Siria ha Cilicia gotyo. 22  Péro Cristo kongregasionkuérape oĩva Judéape avave ndachekuaái. 23  Haʼekuéra ohendúnte ojeʼeha: “Pe kuimbaʼe yma ñandepersegi vaʼekue, koʼág̃a oikuaauka umi marandu porã oñeʼẽva pe rrelihión yma haʼe ohundise vaʼekuére”. 24  Upévare haʼekuéra oñepyrũ ombotuicha Ñandejárape che rupive.

Nóta

Ehecha “Apóstol”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Térã: “tohechauka peẽme mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “Amén”.
Ehecha “Cristo”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.