Ehecha oĩva pype

Ehecha oĩva pype

2 Timoteo 1:1-18

1  Che, Pablo, Cristo* Jesús apóstol* Ñandejára oipota rupi, ajeporavo aikuaauka hag̃ua pe promésa omeʼẽtava jeikove, ikatúva ojehupyty Cristo Jesús rupive.  Amondo ko kárta Timotéope, che raʼy ahayhuetéva: Aipotaite ñande Ru Ñandejára ha ñande Ruvicha Cristo Jesús taimbaʼeporã* nendive, tandeporiahuvereko ha tomeʼẽ ndéve pyʼaguapy.  Aagradese Ñandejárape, che aservi chupe konsiénsia* potĩ reheve umi che ru ypykue ojapo haguéicha. Katuete chemanduʼa nderehe ajerure asy jave Ñandejárape ára ha pyhare,  ha chemanduʼa jave umi nde resay reñohẽ vaʼekuére hiʼãite chéve rohecha jey, ikatu hag̃uáicha avyʼaiterei.  Chemanduʼa mbaʼéichapa rejerovia tovamokõiʼỹre, nde avuéla Loida ha nde sy Eunice raẽ voi péicha ojerovia vaʼekue; ha che aikuaa porã nde peichaite avei resegiha rejerovia.  Upévare romomanduʼa kyreʼỹme resegi hag̃ua reiporu pe rregálo* oúva Ñandejáragui ha oñemeʼẽ vaʼekue ndéve amoĩrõ guare che po nde ári.  Pe espíritu sánto* Ñandejára omeʼẽva nañanembopyʼajúi, síno omeʼẽ ñandéve podér, mborayhu ha akãguapy.  Upévare, ani retĩ reñeʼẽ hag̃ua ñande Ruvicháre. Ani cheguerotĩ avei, chéngo aime préso héra rehehápe. Upéva rangue rejeroviávo Ñandejára podér rehe, reaguanta vaʼerã umi jehasa asy umi marandu porã* rehehápe.  Haʼe ñandesalva ha ñandeporavo ñanemarangatu hag̃ua, péro ndahaʼéi ñane rembiapo rupive, síno haʼe oipota rupi ha imbaʼeporãitereígui. Ymaite guive haʼe imbaʼeporã ñanendive Cristo Jesús rupive. 10  Péro koʼág̃a upéva ojekuaa porãvéntema ñande Salvadór Cristo Jesús ojehechauka rupi. Haʼe ohundi pe ñemano, ha umi marandu porã rupive oikuaauka ñandéve mbaʼéichapa ikatu jahupyty jeikove ikatuʼỹva oñembyai. 11  Aikuaauka hag̃ua umi marandu porã che ajeporavo, ikatu hag̃uáicha apredika, aservi apóstolramo ha aporomboʼe. 12  Che ahasa asy hína ko tembiapo rehehápe, péro natĩri. Aikuaa porã rupi mávarepa ajerovia; ha ajerovia haʼe ikatutaha oñangareko upe ára peve opa mbaʼe ameʼẽ vaʼekuére chupe. 13  Esegíkena umi ñeʼẽ porãite oĩva ehémploramo*, rehendu vaʼekue chehegui, rehechaukaháicha nde jerovia ha mborayhu reservi haguére Cristo Jesúspe. 14  Eñongatu porãke pe mbaʼe porãite ojeheja vaʼekue nde kárgope, upearã ejevale pe espíritu sánto oĩvare ñande pype. 15  Nde reikuaa porã entéro kuimbaʼe oĩva Ásiape* chereja rei hague. Umíva apytépe Figelo ha Hermógenes. 16  Ñande Ruvicha toiporiahuvereko Onesíforo rogayguakuérape, haʼe ningo pyʼỹinte chemokyreʼỹ vaʼekue ha notĩri chereheve aime haguére préso. 17  Upéva rangue, haʼe oĩrõ guare Rómape chereka oparupiete ha chejuhu. 18  Ñande Ruvicha Jehová* toiporiahuvereko chupe upe árape. Nde reikuaa porã opa mbaʼe haʼe ojapo vaʼekue cherehehápe Éfesope.

Nóta

Ehecha “Cristo”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Térã: “tohechauka ndéve mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Konsiénsia”, diksionário oĩva ko Bíbliape.
Kóva hína pe katupyry Ñandejára omeʼẽva káda únope.
Ehecha “Espíritu Sánto”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Térã: “peteĩ voského ỹrõ plánoramo”.
Ehecha nóta oĩva Hch 2:9-pe.
Ehecha Informasión Oĩvéva 1.