Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

2 Pedro 1:1-21

1  Che, Simón Pedro, haʼéva Jesucristo apóstol* ha aservíva chupe tembiguáiramo, ahai ko kárta entéro umi ohupyty vaʼekuépe orendive ko jerovia ijojahaʼỹva. Upéva oiko Ñandejára ha ñande Salvadór Jesucristo hekojoja rupi:  Aipotaite Ñandejára mbaʼeporã ijojahaʼỹva* ha ipyʼaguapy taheta hetave peẽme g̃uarã, peikuaa porã rupi Ñandejárape ha ñande Ruvicha Jesúspe.  Ñandejára podér rupive oñemeʼẽ ñandéve opa mbaʼe ñaikotevẽva jaikove ha ñamombaʼeguasu hag̃ua chupe. Upéva oiko jaikuaa porã rupi upe ñanerenói vaʼekuépe tekomimbipa ha mbaʼeporã rupive.  Koʼã mbaʼe rupive, haʼe omeʼẽ ñandéve umi promésa tuicháva ha iporãitereíva. Péicha, umi promésa rupive, oikóta pendehegui espíritu Ñandejáraicha, pejei rire umi mbaʼe kyʼa oĩvagui ko múndope*; koʼã mbaʼe kyʼa oĩ umi hénte ojapose tarovaitégui ivaíva.  Upévare, peñehaʼãmbaitéke pejerovia ha penembaʼeporã. Peñehaʼãmbaite avei peikuaa Ñandejára Ñeʼẽ,  avei peñehaʼã pejejokokuaa, peaguanta ha pemombaʼeguasu Ñandejárape,  avei peñehaʼã pehayhu pene ermanokuérape ha pehayhu enterovépe.  Peguerekóramo koʼã mbaʼe ha koʼẽ koʼẽre heta hetavéramo pende pype, ndoikomoʼãi pendehegui peteĩ hekoreíva ha ojapoʼỹva mbaʼeve, síno pejapóta umi mbaʼe peaprende porã vaʼekue ñande Ruvicha Jesucrístogui.  Péro oĩramo ndoguerekóiva koʼã mbaʼe, upéva hesatũ, omboty hína hesa ndohechaséigui pe mbaʼerendy, ha hesaráima avei oñemopotĩ hague chupe ipekadokuéra ojapo vaʼekuégui ymave. 10  Peẽme ningo che ermanokuéra Ñandejára penerenói ha pendeporavo vaʼekue, upévare peñehaʼãmbaitéke haʼe akóinte pendeguerohory hag̃ua. Pesegíramo pejapo koʼã mbaʼe, ni mbaʼevéicharõ napeñepysangamoʼãi. 11  Añetehápe, upéicha peẽ tuichaiterei pejehovásata* ha peikéta ñande Ruvicha ha Salvadór Jesucristo Rréinope; upe Rréino ndopamoʼãi arakaʼeve. 12  Upévare che akóinte aiméta pomomanduʼa hag̃ua koʼã mbaʼére, jepe peẽ peikuaa porã umíva ha pejepytaso mbarete pe añetegua peaprende vaʼekuépe. 13  Chéve g̃uarã iporã pomomanduʼa jey koʼã mbaʼére aime aja ko óga kárpape*. 14  Che aikuaa porã koʼẽrõite ahejataha ko óga kárpa, upéicha voi ñande Ruvicha Jesucristo oikuaauka chéve. 15  Upévare akóinte añehaʼãmbaite, ikatu hag̃uáicha ág̃a aha rire, peẽ pesegi penemanduʼa pendejeheguiete koʼã mbaʼére. 16  Ore roikuaauka peẽme ñande Ruvicha Jesucristo podér ha haʼe oĩtaha*, ore voi rohechágui hekomimbipa tuichaitéva; ndahaʼeiete roiporúva kuénto rei omombeʼúva umi kuimbaʼe japu. 17  Ñande Ru Ñandejára hekomimbipáva ombotuicha vaʼekue Jesúspe ha omeʼẽ chupe tekomimbipa, heʼírõ guare chupe koʼã mbaʼe: “Kóva hína che raʼy ahayhuetéva ha aguerohorýva”. 18  Añetehápe ore rohendu vaʼekue koʼã ñeʼẽ oúva yvágagui, roimérõ guare hendive pe sérro marangatúpe. 19  Upéicha rupi jajerovia mbareteve umi profesíare*; ha iporã peẽ pejesarekóramo umívare, haʼeramoguáicha peteĩ lámpara omimbíva iñypytũháme, pene korasõme (og̃uahẽ meve koʼẽju ha pe luséro opuʼã). 20  Tenondete peẽ peikuaa ko mbaʼe: umi proféta ndohaíri ijehegui reínte ni peteĩ profesía oĩva Ñandejára Ñeʼẽme. 21  Umi profesía arakaʼeve noñemombeʼúi kuimbaʼekuéra oipota rupi, síno pe espíritu sánto* omomýi umi kuimbaʼépe omombeʼu hag̃ua umi mbaʼe oúva Ñandejáragui.

Nóta

Ehecha “Apóstol”, diksionário oĩva ko Bíbliape.
Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “peñevendesíta”. Ehecha “Vendisión”, diksionário oĩva ko Bíbliape.
Térã: “aiko aja yvypóraicha”.
Griégope heʼi: “presénsia”, ehecha Informasión Oĩvéva 5.
Ehecha “Profesía”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.