Ehecha oĩva pype

Ehecha oĩva pype

2 Corintios 9:1-15

9  Natekotevẽi ahai peẽme peikuaa hag̃ua peipytyvõ* vaʼerãha umi imarangatúvape.  Che cheaguara pendereheve umi masedónio renondépe, aikuaágui penekyreʼỹha peporopytyvõ hag̃ua. Haʼe chupekuéra un áñoma peẽ pejeprepara hague Acáyape peporopytyvõ hag̃ua. Ha péicha penekyreʼỹ haguére, ijapytepekuéra heta oĩ ikyreʼỹva avei.  Che amondo hína umi ermánope, ani hag̃ua opyta ñeʼẽ reípente umi mbaʼe porã roʼe vaʼekue penderehe. Pejeprepara porãkena, cháke che haʼéma voi kuri upéicha peimetaha.  Péro ndaupéichairõ, tuicha peñemotĩta peẽ ha ore avei, umi masedónio ohóramo chendive ha potopa neʼĩraha pejeprepara. Ore ningo rojerovia hína penderehe.  Upévare apensa iporãtaha amondóma pene rendápe tenonderã umi ermánope. Upéicharõ, rog̃uahẽvo peẽ pepreparátama pe rregálo ha upéva ohechaukáta pendepojeraha, ha ndahaʼéi pemeʼẽha ótro pendejopýguinte.  Péro penemanduʼákena: pe saʼi oñotỹva, saʼi omonoʼõta; ha pe heta oñotỹva, heta omonoʼõta.  Káda uno tomeʼẽ ipyʼapýpe odesidiháicha, anítei omeʼẽ tovapukúpe ni ojejopýgui chupe; Ñandejára ohayhúgui upe vyʼapópe omeʼẽvape.  Avei Ñandejára ikatu ohykuavo pende ári mbaʼeporã ijojahaʼỹva*; ha péicha peẽ akóinte peguerekóta umi mbaʼe peikotevẽva ha peguerekopaitéta peikotevẽva guive pejapo hag̃ua opaichagua tembiapo porã.  (Ojehaiháicha Ñandejára Ñeʼẽme: “Haʼe ipojera orrepartívo ha omeʼẽ imboriahúvape. Hembiapo porã opytáta opa ára g̃uarã”. 10  Ñandejára omeʼẽ heta semílla pe oñemitỹvape, ha omeʼẽ pan ojeʼu hag̃ua; haʼe omeʼẽta peẽme hetaiterei semílla peñotỹ hag̃ua, ha penepytyvõta pemonoʼõ hag̃ua heta mbaʼe porã umi tembiapo porã pejapo vaʼekuégui.) 11  Ñandejára ningo tuicha penderovasa* ikatu hag̃uáicha peẽ pendepojera umi héntendi. Péicha ore roñehaʼã rupi ha peẽ pendepojera haguére, umi hénte oagradeséta Ñandejárape. 12  Ko servísio ndahaʼéi oñemeʼẽ hag̃uánte umi imarangatúvape umi mbaʼe oikotevẽva, síno avei hetaiterei hénte oagradesetereíta Ñandejárape ko servísio rupive. 13  Umi mbaʼe pejapóva ohechauka mbaʼeichaguápa peẽ, ha upévare haʼekuéra ombotuicháta Ñandejárape. Haʼekuéra ombotuicha Ñandejárape ohechávo peẽ ndahaʼéi peikuaaukánteva umi marandu porã* oñeʼẽva Crístore*, síno pekumpliha avei umíva; peẽ ningo pendepojera hendivekuéra ha opavavéndi. 14  Haʼekuéra ojerure asy penderehe Ñandejárape, ha penderayhu Ñandejára imbaʼeporãiterei haguére penendive. 15  Jaagradese Ñandejárape pe rregálo ijojahaʼỹva omeʼẽvare ñandéve.

Nóta

Térã: “peservi”.
Ehecha “Mbaʼeporã Ijojahaʼỹva”, diksionário oĩva ko Bíbliape.
Térã: “penevendesi”. Ehecha “Vendisión”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Cristo”, diksionário oĩva ko Bíbliape.