Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

2 Corintios 6:1-18

6  Ore rombaʼapo Ñandejára ndive ha roʼe jey jey peẽme: aníkena perresivi Ñandejára mbaʼeporã ijojahaʼỹva* ha upéi ndapejapói chugui mbaʼeve.  Haʼe heʼi rupi: “Peteĩ tiémpo aguerohorývape rohendu ha pe salvasión árape roipytyvõ”. ¡Péina! Koʼág̃a hína pe tiémpo Ñandejára ñandeguerohory hag̃ua. ¡Péina! Koʼág̃a hína pe ára Ñandejára ñandesalva hag̃ua.  Ni mbaʼevéicharõ ndorojapói mbaʼeve penemoñepysangátava, ani hag̃ua ojetopa mbaʼeve ivaíva ore servísiope.  Upéva rangue, opa mbaʼépe rohechauka roserviha Ñandejárape: roaguantávo heta mbaʼe, rohasa asývo, roikotevẽvo, rombohováivo umi mbaʼe ijetuʼúva,  roñembyepotívo, rohóvo kárselpe, roaguantávo umi sarambi, rombaʼapo pohýivo, ndorokéivo, ndoroguerekóivo roʼu vaʼerã,  orerekopotĩvo, roikóvo Ñandejára Ñeʼẽ heʼiháicha, orepasiénsiavo rogueropuʼaka hag̃ua, orembaʼeporãvo, rohejávo espíritu sánto* oisãmbyhy ore rekove, roporohayhúvo tovamokõiʼỹre,  ndaorejapúivo, ha roguerekóvo Ñandejára podér. Rohechauka avei roserviha Ñandejárape rojagarrávo umi árma* hekopeguáva ore derécha ha ore iskiérdape.  Oĩ orembotuicháva ha oĩ oreapoʼíva; oĩ okopíva orerehe ha oĩ oñeʼẽ porãva orerehe; oĩ oretratáva ku rombotavyramoguáicha ore rapichápe, péro ore añeteguánte roʼe.  Ko múndo ndaorekuaái, péro Ñandejára orekuaa; ojeʼe orerehe romano vaʼerãha, upéicharamo jepe roikove; rojekastigáramo jepe noromanói. 10  Umi hénte opensa roñembyasyha, péro ore akóinte rovyʼa; oremboriahu, péro romeʼẽ heta mbaʼe porã ore rapichápe; ndoroguerekói mbaʼeve, péro roguereko opa mbaʼe. 11  Ermanokuéra Corintogua, roñeʼẽ peẽme kyhyjeʼỹme ha roavri ore korasõ. 12  Ore ningo rohechauka peẽme pohayhuha ore pyʼaite guive; peẽ katu ndapehechaukaiete orerayhuha. 13  Añeʼẽ peẽme añeʼẽramoguáicha che raʼykuérape. Peavrína tuicha porã pene korasõ, ikatu hag̃uáicha orerayhu avei ore rojapoháicha. 14  Ani peñemoĩ peteĩ júgo* guýpe umi ojeroviaʼỹva ndive. ¿Mbaʼéicha piko ojoajúta tekoporã ha tekoaña*? Térã, ¿mbaʼépe piko ojojogua ára ha pyhare? 15  Avei, ¿mbaʼéicha piko oiko porãta Cristo* ha Satanás*? Térã, ¿mbaʼépepa ojojogua peteĩ ojeroviáva ha peteĩ ojeroviaʼỹva? 16  ¿Mbaʼe guaʼu piko ojapóta umi ñandejára guaʼu* Ñandejára témplope? Cháke ñande hína Ñandejára oikovéva témplo. Heʼi haguéicha Ñandejára: “Che aikóta ijapytepekuéra ha aiméta hendivekuéra. Che haʼéta Ijarakuéra ha haʼekuéra haʼéta che puévlo”. 17  Jehová* heʼi voi: “‘Upévare, pesẽke ijapyteguikuéra, ha pejeíke chuguikuéra’, ‘ha anivéke pepoko pe mbaʼe kyʼa rehe’”, “‘ha che porresivíta’”. 18  “‘Ha che haʼéta pende Ru, ha peẽ haʼéta che raʼy ha che rajykuéra’, heʼi Jehová pe Ipuʼakapáva.”

Nóta

Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “umi árma roataka ha roñedefende hag̃ua”. Yma umi soldádo ojagarra vaʼekue ipo deréchape ijespáda, ha ijiskiérdape katu ijeskúdo.
Pe ñeʼẽ griégo ojeporúva koʼápe heʼise peteĩ júgo ojoavýva.
Térã: “peteĩ opuʼãva léi rehe”.
Ehecha “Cristo”, diksionário oĩva ko Bíbliape.
Térã: “Belial”.
Griégope heʼi: “taʼangakuéra”. Ehecha “Idolatría”, diksionário oĩva ko Bíbliape.
Ehecha Informasión Oĩvéva 1.