Ehecha oĩva pype

Ehecha oĩva pype

2 Corintios 5:1-21

5  Jaikuaa ñande róga ko yvy arigua oñehunditaha, ha Ñandejára omeʼẽtaha ñandéve yvágape peteĩ óga ndahaʼéiva kuimbaʼe rembiapokue ha opytátava opa ára g̃uarã.  Jaiko aja ko ógape, añetehápe ñanepyahẽ hiʼãitereígui ñandéve jarresivi pe óga yvagapegua. Upéva ñanemoʼãta peteĩ aóicha.  Péicha ñañemonde vove, nañaimemoʼãvéima opívo.  Añetehápe ñande ñaiméva ko ógape ñanepyahẽ ha jajepyʼapyeterei, ndahaʼéi jahejaségui ko óga jaipeʼaramoguáicha peteĩ ao, síno jarresiviségui pe óga yvagapegua. Péicha pe jeikove opaveʼỹva omyengoviáta ñande rete omanóvape.  Ñandejára hína upe ñandepreparáva ko mbaʼerã. Haʼe omeʼẽ ñandéve pe espíritu ogaranti hag̃ua umi mbaʼe oútavare.  Upéicharõ, ñande akóinte jajerovia ha jaikuaa jaiko aja yvypóraicha, ñaimeha mombyry ñande Ruvichágui.  Ñande ndajaikói umi mbaʼe jahechávare, jaiko guei jajerovia rupi.  Ñande ningo akóinte jajerovia ha hiʼãiterei ñandéve jaheja ñande rete ha jaiko ñande Ruvicha ndive.  Upéicharõ, tahaʼe jaikóva hendive térã ñaime mombyry chugui, ñañehaʼã jaiko haʼe ñandeguerohory hag̃uáicha. 10  Cháke enterove ñaiméta Cristo* trivunál renondépe, káda únope ojepaga hag̃ua umi mbaʼe ojapo vaʼekuére oiko aja ko yvy ape ári, tahaʼe iporãva térã ivaíva. 11  Upéicharõ, roikuaágui rokyhyje vaʼerãha ñande Ruvichágui, roñehaʼã meme roikekuaa umi kuimbaʼépe jahecha ndogueroviáipa umi mbaʼe romboʼéva, péro Ñandejára oikuaa porã mávapa hína ore. Ha hiʼãite chéve peẽ* avei peikuaa mbaʼeichagua persónapa ore. 12  Ndahaʼéi ningo ore roñepyrũ jeýva roñeʼẽ porã orejehe, pomokyreʼỹnte hína pendeaguarami hag̃ua orereheve, ikatu hag̃uáicha pembohovái umi oikóvape oñembotuicha ipíntare, oñembotuicha rangue ipyʼapýpe oĩvare. 13  Oimérõ ndaorehuisiovéi raʼe, upéva Ñandejárape g̃uarã; orehuísio porãramo katu, upéva peẽme g̃uarã. 14  Cristo mborayhu oreovliga rojapo hag̃ua ko mbaʼe. Ore ningo rohechakuaa enterove umi kuimbaʼe omanóma hague, upévare oñekotevẽ kuri peteĩ kuimbaʼe omano enterove rehehápe. 15  Ha Cristo omano enterove rehehápe ha oñemopuʼã jey, ikatu hag̃uáicha umi oikovéva ndojapovéima haʼekuéra oipotávante, ojapo hag̃ua guei Cristo oipotáva. 16  Upéicharamo, koʼág̃a guive ndajahusgavéima ñande rapichápe umi mbaʼe jahechávarente. Ha oimérire yma péicha jahusga Crístope, koʼág̃a ndajajapovéima upéva. 17  Upéicharõ, oĩramo peteĩ ojoajúva Cristo rehe, Ñandejára okrea jey chupe. Umi mbaʼe tuja ohasáma, ¡péina!, koʼág̃a oĩ heta mbaʼe pyahu. 18  Péro opa mbaʼe ou Ñandejáragui, haʼe voi ñanepytyvõ jaiko porã jey hag̃ua hendive Cristo rupive, ha ñanemondo ñaipytyvõ hag̃ua ótrope oiko porã jey hag̃ua hendive. 19  Péva heʼise Ñandejára ojevaleha Crístore omoĩ porã jey hag̃ua hendive ko múndo*, ha oheja rei hag̃ua chupekuéra hembiapo vaikue. Haʼe ñanemondo ñamombeʼu hag̃ua umi héntepe ikatuha oñemoĩ porã jey Ñandejára ndive. 20  Ñande hína upéicharõ Ñandejára rembijokuái*, ha jajapo upéva Cristo vése. Ñandejára ojevale ñanderehe, Cristo vése jajerure asy hag̃ua umi héntepe: “Peiko porã jeýna Ñandejára ndive”. 21  Cristo ndopekái vaʼekue arakaʼeve ha Ñandejára omeʼẽ chupe sakrifísioramo ñande pekádore, haʼe rupive ñanderekojoja hag̃ua Ñandejára renondépe.

Nóta

Ehecha “Cristo”, diksionário oĩva ko Bíbliape.
Griégope heʼi: “pene konsiénsia”. Ehecha “Konsiénsia”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Pe ñeʼẽ griégo heʼise peteĩ persóna oñeʼẽva peteĩ tetã térã peteĩ governánte vése.