Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

2 Corintios 4:1-18

4  Upéicharõ, Ñandejára oreporiahuvereko haguére rosegi rojapo ko tembiapo ha naorekaneʼõi.  Ndorojapói mbaʼeve ñemiháme ni oporomotĩva, ndoroikói rombotavy ótrope, ni romboʼe hekopeʼỹ Ñandejára Ñeʼẽ. Upéva rangue roikuaauka rupi pe añetegua oiko orehegui ehémplo iporãva enterovépe* g̃uarã, Ñandejára renondépe.  Umi marandu porã* roikuaaukáva oĩramo hína ñemiháme*, oĩ ñemiháme umi oñehundítavagui.  Haʼekuéra ningo ndojeroviái, ha ko múndo* jára omohesatũ chupekuéra ani hag̃ua ontende ni ohesape hiʼarikuéra umi marandu porã ojajáiva ha oñeʼẽva Crístore*. Haʼe hína Ñandejára joguahaite.  Ropredika jave noroñeʼẽi orejehe, síno romombeʼu Cristo Jesús haʼeha ñande Ruvicha, ha romombeʼu avei ore haʼeha pene rembiguái Jesús káusare.  Ñandejára hína upe heʼi vaʼekue: “Pe pytũmbýgui tohesape pe mbaʼerendy”, ha Ñandejára voi ohesape ore korasõme Cristo* rupive, roikuaa porã hag̃ua Ñandejára rekomimbipa.  Upéicharamo jepe, roguereko kambuchípe ko mbaʼerepy porãite, ojekuaa hag̃ua pe podér ijojahaʼỹva ouha Ñandejáragui ha ndahaʼéi orehegui.  Umi jehasa asy oremongora opáguio, péro ndaorejopýi ikatuʼỹ hag̃uáicha rokuʼe; ndoroikuaái jepi mbaʼépa rojapóta, péro katuete oĩ peteĩ tape rosẽ hag̃ua.  Oĩ orepersegíva, péro naoretyreʼỹi; oĩ orepetéva yvýre, péro noroñehundíri. 10  Rohohápente rojapeligra ha haimetemete romano, Jesús rehe oiko haguéicha. Péva ohechauka umi héntepe ore rohasa asyha Jesús ohasa asy haguéicha. 11  Ha roikovéramo jepe, akóinte roapeligra ore rekove rosegi rupi Jesúspe. Péva ohechauka umi héntepe ore rohasa asyha Jesús ohasa asy haguéicha. 12  Roapeligráramo jepe ore rekove, upéva rupive peẽ ikatu peikove. 13  Péicha heʼi Ñandejára Ñeʼẽ: “Ajerovia rupi ningo añeʼẽ”. Ha ore avei rohechauka rojeroviaha upéicha, ha upévare roñeʼẽ. 14  Roikuaa upe omopuʼã vaʼekue Jesúspe, oremopuʼãtaha avei chupe omopuʼã haguéicha, ha oreguerahataha penendive Jesús renondépe. 15  Opa koʼã mbaʼe ningo ideprovéchota peẽme, ikatu hag̃uáicha koʼẽ koʼẽre Ñandejára imbaʼeporãve* umi hénte ndive. Péicha oĩta hetave oagradeséva Ñandejárape ha upéva rupive oñembotuicháta chupe. 16  Upévare ñande nañanekaneʼõi, ñande rete oñembyaíramo jepe, ñande pyʼapy oñembopyahu ohóvo koʼẽ koʼẽre. 17  Pe jehasa asy ningo ivevýi ha sapyʼami g̃uarãnte, péro péva rupive jahupytýta pe prémio tuichavéva ohóvo ha opa ára g̃uarãva. 18  Ndajaikói ñapensa meme umi mbaʼe ikatúvare jahecha, ñapensa guei umi mbaʼe ikatuʼỹvare jahecha. Umi mbaʼe jahecháva ningo sapyʼami g̃uarãnte, umi mbaʼe ndajahecháiva katu opa ára g̃uarã.

Nóta

Griégope heʼi: “entéro yvypóra konsiénsiape”. Ehecha “Konsiénsia”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Térã: “oñemoʼã peteĩ páñope”.
Ehecha “Múndo”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “Cristo rova rupive”.
Térã: “ohechauka mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.