Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

2 Corintios 11:1-33

11  Ajoguáramo jepe peteĩ itarovávape, aipotaite peẽ cheaguanta. ¡Ha añetehápe ningo cheaguanta voi hína!  Chete voi apromete kuri pomeʼẽtaha pemenda hag̃ua Crístore*, ha popresentase chupe peteĩ mitãkuña pyahúicha*. Upévare ajepyʼapyeterei penderehe Ñandejára ojapoháicha.  Péro pe mbói ombotavy haguéicha Évape iletrádo rupi, péicha avei akyhyje oĩrõ g̃uarã omongyʼáva umi mbaʼe pepensáva, ha oipeʼa pende pyʼapýgui pe mborayhu añetegua ha ipotĩva peñandúva Crístore.  Peẽ napeneprovlemaiete voi pehendu hag̃ua oĩramo oñeʼẽva peẽme ótro Jesús rehe, ndahaʼéiva pe ore roikuaaukáva peẽme; térã oúramo penemboliga pepensa hag̃ua umi hénte ko mundopeguáicha* ha ndahaʼéi ore pomboʼe haguéicha; térã pehendu hag̃ua umi marandu porã idiferénteva umi peguerovia vaʼekuégui.  Chéverõ g̃uarã umi pende apostolkuéra oñembovaletéva, ni peteĩ mbaʼépe ndaivalevéi chehegui.  Ndachekatupyrýiramo jepe añeʼẽ hag̃ua, añetehápe aikuaa hína heta mbaʼe; upéva rohechauka porãma peẽme opa mbaʼépe.  Che ningo vyʼápe aikuaauka peẽme umi marandu porã oñeʼẽva Ñandejárare ha ndajeruréi peẽme pláta. Avei ajeapoʼi peẽ peñembotuicha hag̃ua. ¿Apeka piko raʼe ajapóvo upéva?  Ótra kongregasióngui* jepe aipeʼa, ameʼẽ hag̃ua peẽme peikotevẽva.  Upéicharamo jepe, che aikotevẽramo guare nañasaingói penderehe, umi ermáno ou vaʼekue Macedóniagui omeʼẽmbaite rupi chéve opa mbaʼe aikotevẽva. Añetehápe, añatende ani hag̃ua oiko chehegui peteĩ kárga peẽme g̃uarã ha asegíta añatende ani hag̃ua oiko upéva. 10  Che asegi aja Crístope, Acaya tuichakuére añembotuicháta ko mbaʼére ha ndaipóri chejoko vaʼerã. 11  ¿Mbaʼérepa ndajeruréi raʼe peẽme che remikotevẽ? ¿Ndapohayhúigui piko? Ñandejára oikuaa pohayhuha. 12  Oĩ oñembotuicháva ha oikóva heʼi haʼeha apóstol oréicha avei. Upévare asegíta ajapo umi mbaʼe ajapóva jepi voi, ajurumboty hag̃ua chupekuéra ha anive oiko oñembotuicha. 13  Umi kuimbaʼe ningo apóstol japu, ombotavýva ótrope ha oiko guaʼúva Cristo apóstolramo. 14  Ha ndahecharamói upéva, Satanás* voi oikógui oñemonde ánhel omimbipávaramo. 15  Upévare ndahecharamói avei hembiguaikuéra oikoha oservi guaʼu Ñandejárape. Péro chupekuéra oñemyengoviáta umi hembiapokuére. 16  Haʼe jeýta: Ani avave opensa chetarovaha. Péro peẽ pepensáramo upeichaha, cheaguantána añeʼẽramo jepe peteĩ itarovávaicha, ikatu hag̃uáicha añembotuicha michĩmi jepe. 17  Koʼág̃a nañeʼẽi ñande Ruvicha ojapo haguéicha, síno añembotuicha peteĩ itarováva ojapoháicha. 18  Oĩgui heta oñembotuicháva umi mbaʼe ko mundopeguáre, che añembotuicháta avei. 19  Peẽ ningo penearanduete guaʼu ha napeneprovlemaiete peaguanta hag̃ua umi itarovávape. 20  Añetehápe peẽ peaguanta oimeraẽ pendeguerekóva hembiguáiramo, oimeraẽ ojaprovecháva penderehe, oimeraẽ oguerahapáva la perekomíva, oimeraẽ oñembotuicha ha pendeapoʼíva, ha oimeraẽ penderovapetévape. 21  Rotĩ roʼe hag̃ua koʼã mbaʼe, haʼetégui orepyʼamirĩva. Péro oĩramo ótro ipyʼaguasúva (añeʼẽ hína peteĩ itarovávaicha), che chepyʼaguasu avei. 22  ¿Haʼekuéra piko evréo? Che avei. ¿Haʼekuéra piko isrraelíta? Che avei. ¿Haʼekuéra piko Abrahán familiare? Che avei. 23  ¿Haʼekuéra piko Cristo rembiguái? ¡Ambohovái itarovávaicha! Cheichagua ndaipóri: hetave ambaʼapo, hetave vése aha kárselpe, hetaiterei vése añembyepoti, ha hetaiterei vése haimetemete amano. 24  Cinco vése umi hudío chembyepoti, ha káda vuélta chenupã hikuái treinta y nueve vése. 25  Tres vése ajegarrotea, una ves chejapi hikuái itápe, aviaha jave várkope tres vése ore várko oñehundi, mar mbytépe apyta peteĩ pyhare ha peteĩ ára pukukue. 26  Pyʼỹi ajapeligra aviaha jave, ajapeligra rríope, ajapeligra mondaha káusare, ajapeligra che retãyguakuéra káusare, ajapeligra tetã ambuegua káusare, ajapeligra pe siudápe, ajapeligra desiértope, ajapeligra márpe, ajapeligra umi ermáno guaʼu apytépe. 27  Ambaʼapo pohýi chekarapãmba peve, heta vése ndakevéi pyharekue, cheñembyahýi ha cheyʼuhéi, pyʼỹinte ndarekói haʼu vaʼerã, cheroʼy ha ndacheaói. 28  Ha ndahaʼéi koʼã mbaʼe añónte, síno káda día aiko ajepyʼapy entéro umi kongregasiónre. 29  Añeñandu vai oĩ jave ikangýva. Ha akairo voi oĩramo omoñepysangáva ótrope. 30  Ha tekotevẽramo añembotuicha, añembotuicháta umi mbaʼe ohechaukávare chekangyha. 31  Toñemombaʼeguasu opa ára g̃uarã Ñandejárape, haʼéva hína ñande Ruvicha Jesús Túva, haʼe oikuaa ndachejapuiha. 32  Damáscope, pe governadór oĩva rréi Aretas poguýpe, opeska cherehe upe siudápe chejagarra hag̃ua. 33  Péro umi ermáno chemboguejy kanástope peteĩ ventánarupi oĩva pe murállare. Ha péicha ajesalva chugui.

Nóta

Ehecha “Cristo”, diksionário oĩva ko Bíbliape.
Griégope heʼi: “vírhen”.
Ehecha “Múndo”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Ehecha “Satanás”, diksionário oĩva ko Bíbliape.