Ehecha oĩva pype

Ehecha oĩva pype

1 Timoteo 6:1-21

6  Umi haʼéva guive tembiguái akóinte omombaʼe vaʼerã ipyʼaite guive ipatronkuérape, ani hag̃ua arakaʼeve oñeñeʼẽ vai Ñandejára rérare ni umi mbaʼe haʼe omboʼévare.  Avei umi tembiguái orekóva patrón ojeroviáva ñande Ruvicháre, orrespeta vaʼerã chupe, haʼégui iñermáno. Ha koʼýte oservi porãve vaʼerã chupe, upe hembiapo ideprovécho rupi peteĩ ojeroviávape. Esegíkena eñemoñeʼẽ ha emboʼe koʼã mbaʼe.  Oĩramo peteĩ kuimbaʼe oikóva omboʼe japu, ha ojoavýva umi ñeʼẽ porãite oúvagui ñande Ruvicha Jesucrístogui, ha avei omboʼéramo hekopeʼỹ mbaʼéichapa ñamombaʼeguasu vaʼerã ñande pyʼaite guive Ñandejárape,  péva oñembotuicha ha nontendéi mbaʼeve, ifanatikoiterei, oiko vaise ha ojodiskutise ñeʼẽre. Upéva káusare umi hénte iñenvidióso, oiko vai, otaky hapicháre, ndojeroviavéi avavére  ha manterei ojodiskuti vaipa vyroreíre. Koʼã mbaʼe omoñepyrũ umi kuimbaʼe opensa meméva ivaívare, nontendevéimava pe añetegua ha oimoʼãva omombaʼeguasu rupi Ñandejárape ikatuha ogana heta mbaʼe.  Añetehápe, tuicha ideprovécho hína ñamombaʼeguasu Ñandejárape ñande pyʼaite guive, javyʼáma guive pe jarekomívare.  Mbaʼeve ningo ndajaguerúi ko múndope* ha mbaʼeve avei ndaikatúi jagueraha.  Upéicharõ, jarekóma guive jaʼumi vaʼerã ha ñañemoʼã hag̃ua, javyʼáma vaʼerã umi mbaʼére.  Péro umi ojedesidímava ipláta hetataha, hoʼa ñuhãme, peteĩ lásope ha oiko heta vyrorei ha mbaʼe vai rapykuéri, ha upéicha rupi haʼekuéra oñehundi. 10  Pe platarayhu omoheñói opaichagua mbaʼe vai. Ha ohupytységui umi mbaʼe, heta oĩ ohejáva ijerovia ha oikéva heta akãrasýpe. 11  Péro nde reservíva Ñandejárape, emboykete koʼã mbaʼe, ha eñehaʼã akóinte nderekojoja, emombaʼeguasu chupe nde pyʼaite guive, ejerovia, eporohayhu, eaguanta, ha ani ndepochy rei. 12  Eñorairõ pe ñorairõ iporãva redefende hag̃ua nde jerovia. Eñakarama hatãke pe jeikove opaveʼỹvare, Ñandejára ndeporavo kuri rehupyty hag̃ua ko mbaʼe, ha nde reikuaaukáma upéva hekoitépe heta hénte renondépe. 13  Amanda ndéve Ñandejára renondépe, haʼe hína upe omoingovéva opa mbaʼe, ha Cristo* Jesús renondépe, haʼe kyhyjeʼỹme ha hekoitépe oñeʼẽ vaʼekue Poncio Pilátope. 14  Henondepekuéra ajerure ndéve rekumpli hag̃ua hekoitépe umi mandamiénto ha ani avave heʼi nderehe mbaʼeve ivaíva, ñande Ruvicha Jesucristo ojehechauka peve. 15  Haʼe ojehechaukáta og̃uahẽ vove pe tiémpo oñemoĩ vaʼekue upearã. Haʼe hína pe ojehovasáva*, ha haʼe añoite pe Governánte, haʼéva Rréi umi rreikuéra ári ha Mburuvicha mburuvichakuéra ári. 16  Haʼe añoite hína pe ikatuʼỹva omano, oikóva peteĩ lugár* omimbipávape, avave ikatuʼỹháme og̃uahẽ, chupe avave ndohechái vaʼekue ha ndaikatúi ojehecha. Toñembotuicha chupe, ha ipodér toĩ opa ára g̃uarã. Taupéicha*. 17  Ere umi ipláta hetávape ko tiémpope*, ani hag̃ua oñembotuicha, ha ani ojerovia umi mbaʼerepy ikatúvare oñehundi. Upéva rangue tojerovia Ñandejárare, omeʼẽrasapáva ñandéve opa mbaʼe ñanembovyʼáva. 18  Ere chupekuéra tombaʼapo iporãvare, tojapo heta mbaʼe porã ha taipojera, taikyreʼỹ okomparti hag̃ua ótrondi umi mbaʼe orekóva. 19  Péicha haʼetéta ombyatýva hína umi mbaʼerepy oúva Ñandejáragui, upéva heʼise haʼekuéra omoĩha peteĩ simiénto iporãva tenonderãme g̃uarã, ikatu hag̃uáicha oñakarama hatã pe jeikove añeteguávare. 20  Nde, Timoteo, eñangareko porãke upe ojeheja vaʼekuére nde kárgope ha ani rehendu ñeʼẽrei ojeʼéva Ñandejára kóntrape, ni umi japu heʼíva umi hénte oñemoarandúva, upe haʼekuéra oikuaáva ningo oñemoĩ pe añeteguáre. 21  Péicha ohechaukaségui iñaranduha oĩ heta ohejáva ijerovia. Ñandejára taimbaʼeporã* penendive.

Nóta

Ehecha “Múndo”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Térã: “oñevendesíva”. Ehecha “Vendisión”, diksionário oĩva ko Bíbliape.
Griégope heʼi: “lus”.
Térã: “Amén”.
Térã: “ko múndope”.
Térã: “tohechauka peẽme mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.