Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Timoteo 4:1-16

4  Péro Ñandejára espíritu heʼi porã amo gotyove oĩtaha umi ohejáva ijerovia, koʼãva ohendúta marandu japu haʼetétava oúva Ñandejáragui, ha ohendúta avei hikuái demoniokuéra* omboʼéva.  Upéva oikóta umi kuimbaʼe rovamokõi ijapu rupi; koʼãva konsiénsia* ningo iperepa ojehapyramoguáicha iérro akúpe.  Haʼekuéra oproivíta ñemenda, ha omandáta umi héntepe ani hag̃ua hoʼu tembiʼu Ñandejára ojapo vaʼekue. Hiʼarive haʼe ojapo umíva, ikatu hag̃uáicha umi ojeroviáva ha oikuaa porãva pe añetegua, hoʼu ha oagradese chupe.  Opa mbaʼe Ñandejára ojapo vaʼekue ningo iporãiterei, ha mbaʼevete noñemboykéi vaʼerã umi hoʼúva oagradeséramo Ñandejárape;  umi tembiʼu oñemomarangatúgui Ñandejára Ñeʼẽ ha ñemboʼe rupive.  Péicha reñemoñeʼẽramo umi ermánope, reservíta hekoitépe Cristo* Jesúspe, reñemongakuaágui Ñandejára Ñeʼẽ rupive ha reñehekomboʼe porã rupi. Ha nde reñatende porã ha resegi hekoitépe umi mbaʼe reaprende vaʼekue.  Péro remboyke vaʼerã umi kuénto japu ojeʼéva Ñandejára kóntrape, oikóva omombeʼu umi g̃uaig̃ui. Upéva rangue, reñehaʼã* meme vaʼerã remombaʼeguasu Ñandejárape nde pyʼaite guive.  Pe ehersísio jajapóva ñamombarete hag̃ua ñande rete, saʼimínte ideprovécho; péro ñamombaʼeguasúrõ Ñandejárape ñande pyʼaite guive, ideprovécho opa mbaʼépe, ñanepytyvõgui jahupyty hag̃ua heta mbaʼe porã koʼág̃ama voi ha amo gotyove avei.  Ko haʼéva ningo añete ha ikatu pejerovia hese. 10  Upearã ñambaʼapo pohýi ha ñañehaʼãmbaite, jareko rupi esperánsa Ñandejára oikovévare, haʼe osalva opaichagua tapichápe, péro koʼýte umi ojepytasóvape ijykére toiko la oikóva. 11  Esegíkena emanda koʼã mbaʼe ha emboʼe chupekuéra. 12  Aníke avave ndeapoʼi nemitã haguére. Upéva rangue, remoĩ vaʼerã ehémplo iporãva umi iñeʼẽrendúvape ipyʼaite guive, tahaʼe ne ñeʼẽme, reiko lájare, reporohayhúvo, nde jeroviápe ha nderekopotĩvo. 13  Ag̃uahẽ meve, resegi vaʼerã reñehaʼãmbaite relee opavave renondépe, reñemoñeʼẽ ha reporomboʼe. 14  Reñatende meme vaʼerã pe rregálo* Ñandejára omeʼẽ vaʼekuére ndéve; upéva oñemeʼẽ kuri ndéve peteĩ profesía* rupive umi ansiáno* omoĩrõ guare nde ári ipo. 15  Ejepyʼamongeta koʼã mbaʼére, ha eñemeʼẽmbaite umíva rehehápe; péicha opavave ohechakuaáta reñakãrapuʼãha rehóvo. 16  Akóintekena eñatende ndejehe ha remboʼe lájare. Esegíke ejapo koʼã mbaʼe; rejapóramo péicha rejesalváta nde ha avei umi nerendúva.

Nóta

Ehecha “Demónio”, diksionário oĩva ko Bíbliape.
Ehecha “Konsiénsia”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “reñentrena”.
Kóva hína pe katupyry Ñandejára omeʼẽva káda únope.
Ehecha “Profesía”, diksionário oĩva ko Bíbliape.
Ehecha “Ansiáno”, diksionário oĩva ko Bíbliape.