Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Tesalonicenses 4:1-18

4  Ipahápe che ermanokuéra, roʼéma kuri peẽme mbaʼéichapa peiko vaʼerã Ñandejára pendeguerohory hag̃ua, ha añetehápe peikóma voi hína upéicha. Péro koʼág̃a pomokyreʼỹ ha rojerure jey jey peẽme ñande Ruvicha Jesús rérape: pesegíkena pejapo porãve umi mbaʼe.  Peẽ peikuaa porã roʼéva guive peẽme ouha ñande Ruvicha Jesúsgui.  Kóva ningo Ñandejára rembipota: penemarangatu ha pemboyke vaʼerã tekovai*.  Káda uno ojejokokuaa* vaʼerã oiko hag̃ua tekopotĩme ha tekomarangatúpe.  Ani peiko tarovaite penembaʼepota vai rapykuéri, ojapoháicha umi tetã ndoikuaáiva Ñandejárape.  Ani avave ojapo ivaíva iñermánore ha ojaprovecha hese koʼã mbaʼépe. Roʼéma kuri peẽme ha romyesakã porãma avei: Jehová* okastigáta entéro umi ojapóvape koʼã mbaʼe.  Ñandejára ñandeporavo ñanemarangatu hag̃ua, ndahaʼéi ñanderekokyʼa* hag̃ua.  Upéicharõ, pe kuimbaʼe nopenáiva koʼã mbaʼére, ndahaʼéi kuimbaʼekuérare opuʼãva hína, síno Ñandejárare, upe omeʼẽva peẽme ijespíritu sánto*.  Natekotevẽi rohai peẽme pejoayhu vaʼerãha oñoermánoicha, Ñandejára voi penemboʼégui pejoayhu vaʼerãha. 10  Ha añetehápe ningo pejapóma voi hína upéicha entéro umi ermáno Macedoniagua ndive. Péro koʼág̃a rojerure jey jey peẽme pesegi hag̃ua pejoayhuve. 11  Peñehaʼãmbaitéke peiko pyʼaguapýpe ha ani peñentremete ótro ojapóvare, pembaʼapo jejopýke, roʼe porãma haguéicha peẽme. 12  Péicha penderekoporãta umi hénte renondépe ha napeikotevẽmoʼãi mbaʼeve. 13  Avei che ermanokuéra, roipota pentende mbaʼépa ohaʼarõ umi omanóvape*; ani hag̃ua peñembyasy, ojapoháicha umi ndorekóiva esperánsa. 14  Ñande jajeroviáramo Jesús omano ha opuʼã jey hague omanóva apytégui, upéicha avei jajerovia Ñandejára omoingove jeytaha umi omano vaʼekuépe osegívo Jesúspe, haʼekuéra oĩ hag̃ua hendive. 15  Jehová ñeʼẽ heʼiháicha, ore avei roʼe peẽme: ñande apytégui, umi oikóva gueteri ñande Ruvicha oĩ* aja, umíva oñemopuʼãta yvágape, péro haʼekuéra ni mbaʼevéicharõ naitenondemoʼãi umi okévagui ñemanóme. 16  Ñande Ruvicha voi oguejýta yvágagui Ñandejára trompéta reheve ha hatã osapukáita ojapoháicha peteĩ arkánhel*. Ha opuʼã raẽvéta Cristo* disipulokuéra* omanóma vaʼekue. 17  Upe rire, umi oikovéva gueteri ñande apytégui ojegueraháta hendivekuéra pe araíre, ohug̃uaitĩ hag̃ua ñande Ruvichápe yvate. Upéicha ñaiméta ñande Ruvichándi opa árare. 18  Upévare, pesegíkena peñokonsola koʼã mbaʼe haʼe vaʼekue peẽme rupive.

Nóta

Ehecha “Tekovai”, Informasión Oĩvéva 4-pe.
Griégope heʼi: “ojokokuaa vaʼerã hete”.
Ehecha Informasión Oĩvéva 1.
Ehecha “Tekokyʼa”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Griégope heʼi: “okévape ñemanóme”.
Griégope heʼi: “presénsia”.
Ehecha “Arkánhel”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.