Ehecha oĩva pype

Ehecha oĩva pype

1 Tesalonicenses 1:1-10

1  Che, Pablo, Silvano, ha Timoteo, romondo ko kárta pe kongregasión* oĩva Tesalónicape. Peẽ pejoaju ñande Ru Ñandejárandi ha ñande Ruvicha Jesucrístondi: Aipotaite Ñandejára taimbaʼeporã* penendive ha tomeʼẽ peẽme pyʼaguapy.  Akóinte roagradese Ñandejárape oremanduʼa jave penderehe ore ñemboʼépe,  ha oremanduʼa meme ñande Ru Ñandejára renondépe pe tembiapo pejapóvare pende jerovia rupive; mbaʼeichaitépa peñehaʼã peporohayhu rupi, ha peaguanta heta mbaʼe perekógui esperánsa ñande Ruvicha Jesucrístore.  Ñandejára ningo penderayhu che ermanokuéra, ha roikuaa haʼe pendeporavo hague.  Ha umi marandu porã* roikuaauka vaʼekue peẽme ndopytái ñeʼẽ reípente, síno opoko voi penderehe, ha espíritu sánto* rupive pejerovia mbarete hese. Peẽ peikuaa mbaʼéichapa ore rombaʼapo kuri penderehehápe.  Peẽ pesegi ore ehémplo ha ñande Ruvicha ehémplo. Heta pehasa asýramo jepe, pe espíritu sánto rupive vyʼápe perresivi Ñandejára Ñeʼẽ.  Péicha pemoĩ ehémplo iporãva enterove Jesús segidorkuérape oĩva Macedonia ha Acáyape.  Añetehápe, ndahaʼéi Macedonia ha Acáyape añónte Jehová* ñeʼẽ iñasãiva peẽ rupive. Síno oparupiete ojekuaa pejeroviaha Ñandejárare, upévare natekotevẽvéima ore roʼe mbaʼeve.  Upérupi umi hénte osegi omombeʼu mbaʼéichapa peẽ orerresivi, peheja hague umi ñandejára guaʼu* ha pejevy peservi hag̃ua tembiguáicha Ñandejára teete ha oikovévape, 10  ha pehaʼarõ yvágagui Itaʼýrape, upe haʼe omopuʼã vaʼekue omanóva apytégui. Péva hína Jesús, haʼe ñandesalva pe kastígo oútavagui.

Nóta

Ehecha “Kongregasión”, diksionário oĩva ko Bíbliape.
Térã: “tohechauka peẽme mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha Informasión Oĩvéva 1.
Griégope heʼi: “taʼanga”. Ehecha “Idolatría”, diksionário oĩva ko Bíbliape.