Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Pedro 5:1-14

5  Che ningo ansiáno*, ha ahecha vaʼekue mbaʼéichapa ohasa asy Cristo* ha ahupytýta avei pe tekomimbipa ojehechaukátava; upévare ajerure jey jey umi ansiáno oĩvape pende apytépe:  Peñangarekóke peteĩ ovecharerekuáicha Ñandejára ovechakuérare oĩva pende poguýpe, ani pejapo upéva oĩgui pendeovligáva, ni pokarẽme pejaprovechase rupi hesekuéra; síno pejapo vaʼerã vyʼápe ha kyreʼỹme.  Haʼekuéra Ñandejára mbaʼe hína, upévare ndovaléi pemanda guasu hesekuéra. Peẽ ningo ehémplo vaʼerã pe ovecha atýpe g̃uarã.  Ha ág̃a pe ovecharerekua tuichavéva ojehechauka vove, peẽme oñemeʼẽta pe prémio* omimbipáva ha noñehundimoʼãiva.  Upéicha avei peẽ kuimbaʼe penemitãvéva, peñemoĩ vaʼerã umi kuimbaʼe ijedavéva poguýpe. Enterovete peẽ peñemomirĩ vaʼerã pende rapicha renondépe, cháke Ñandejára oñemoĩ umi oñemombaʼeguasúvare, péro imbaʼeporãiterei* umi oñemomirĩvandi.  Upéicharõ, peñemomirĩkena ha peñemoĩ Ñandejára ipuʼakapáva poguýpe, ikatu hag̃uáicha haʼe penembotuicha og̃uahẽ vove pe tiémpo.  Ha pemoĩ ipópe opaite mbaʼe pendepyʼapýva, haʼe ojepyʼapýgui penderehe.  Akóintekena pepensa hekoitépe ha peñatende meme. Cháke pene enemígo, pe Aña*, okorre oikóvo pende jerére peteĩ león pochýicha ha oñehaʼã omokõ oimeraẽvape.  Upéicharõ, peñemoĩ mbaretéke ikóntrape ha pejerovia mbarete, peikuaágui enterove pene ermáno oĩva ko múndope* oaguantaha avei koʼãichagua jehasa asy. 10  Péro pehasa asy rire sapyʼaitemi, Ñandejára henyhẽva mbaʼeporã ijojahaʼỹvagui, penembokatupyrýta peporoservi hag̃ua ha penemombaretéta pejepytaso mbarete hag̃ua. Haʼe penerenói kuri pehupyty hag̃ua pe tekomimbipa opaveʼỹva Cristo ndive. 11  Chupe toñemeʼẽ podér opa ára g̃uarã. Taupéicha*. 12  Silvano, ñane ermáno jeroviaha, chepytyvõ ahai hag̃ua peẽme ko kárta. Mbykymínte ahai ikatu hag̃uáicha pomokyreʼỹ ha ahechauka peẽme Ñandejára añetehápe omeʼẽha peẽme mbaʼeporã ijojahaʼỹva. Peñakarama hatãke upévare. 13  Orahauka peẽme salúdo pe* oĩva Babilóniape, ojeporavo vaʼekue peẽicha, ha avei Marcos, che raʼy. 14  Pejosaludávo peñohetũ pehechauka hag̃ua pejoayhuha. Aipotaite pendepyʼaguapy enterovete peẽ Cristo disípulo*.

Nóta

Ehecha “Ansiáno”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “koróna”.
Térã: “ohechauka mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Térã: “Diablo”, ehecha diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “Amén”.
Koʼápe griégope oñeñeʼẽ peteĩ kuñáre, ha upéva orrepresenta pe kongregasión oĩva Babilóniape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.