Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Pedro 3:1-22

3  Upéicha avei peẽ tembireko peñemoĩ vaʼerã pene ména poguýpe, upéicha oĩramo naiñeʼẽrendúiva Ñandejára Ñeʼẽme, ikatúta ojerovia Ñandejárare ojeʼeʼỹre chupe mbaʼeve, hembireko hekoporã rupi.  Upéva oikóta haʼekuéra ohechágui mbaʼéichapa penderekopotĩ ha perrespeta chupekuéra pende pyʼaite guive.  Peñemoporã jave, ani pepenaiterei pene píntare, ani petrensa pene akãrague ni peiporu aláha de óro, ni ao hepyetereíva.  Iñimportanteve hína pemoporã perekóva pende pyʼapýpe, peñehaʼãvo peneakãguapy ha ani pendepochy rei. Koʼãichagua adórno ndaikatúi oñembyai ha ovaleterei Ñandejára renondépe.  Yma péicha oñemoporã vaʼekue umi kuña marangatu orekóva esperánsa Ñandejárare, ha oñemoĩ hikuái iména poguýpe.  Por ehémplo, Sara iñeʼẽrendu vaʼekue Abrahánpe, ha ohenói chupe “che karai”. Ha peẽ koʼág̃a Sara memby hína, pesegíramo pejapo iporãva ha ndapekyhyjéiramo mbaʼeve ivaívagui.  Upéicha avei peẽ menakuéra pentende porã vaʼerã pene rembirekópe, peiko porã hag̃ua hendivekuéra. Haʼekuéra ningo ikangyve* hína pendehegui, upévare pemombaʼe vaʼerã chupekuéra, cháke upeichaʼỹrõ pene ñemboʼe ikatu nog̃uahẽi Ñandejárape. Penemanduʼáke peẽ perresivitaha avei hendivekuéra pe jeikove ñamereseʼỹva.  Ipahápe, enterove peẽ peiko vaʼerã peteĩ ñeʼẽme, pehasa asy oñondive, pejoayhu oñoermánoicha, pejoporiahuvereko ha peñemomirĩ.  Ani pemyengovia ivaíva, ivaívape; ni pejaʼo umi pendejaʼóvape. Upéva rangue, peñeʼẽ vaʼerã chupekuéra pyʼaporãme*; Ñandejára penerenóigui pesegi hag̃ua ko tape, ikatu hag̃uáicha haʼe penderovasa. 10  “Entéro ohayhúva hekove ha oikoséva vyʼápe, ojoko vaʼerã ijuru ani hag̃ua heʼi ivaíva ni ijapu. 11  Oheja vaʼerã ivaíva ha ojapo vaʼerã iporãva; oheka vaʼerã pyʼaguapy ha oñehaʼã vaʼerã akóinte ojogueraha porã hapichakuérandi. 12  Jehová* ojesareko umi hekojojávare ha ohendu chupekuéra ojerure asy jave; péro Jehová* oñemoĩ umi hembiapo vaíva kóntrape.” 13  Añetehápe, penekyreʼỹramo pejapo hag̃ua iporãva, ¿máva piko ojapóta penderehe mbaʼe vai? 14  Péro peẽ pevyʼa, pehasa asýramo jepe pejapo haguére iporãva. Upéicharamo jepe, ani pekyhyje umi mbaʼe omongyhyjévagui umi héntepe ni pejepyʼapyeterei. 15  Upéva rangue, pehechakuaáke pende pyʼapýpe Cristo* haʼeha ñande Ruvicha, ha oñembotuicha* vaʼerãha chupe. Ha akóinte peime vaʼerã pedefende hag̃uáicha pene esperánsa oĩramo oporandúva peẽme hese. Péro pejapo vaʼerã upéva pyʼaporãme* ha pehechauka perrespetaha pende pyʼaite guive pende rapichakuérape. 16  Peñehaʼãkena akóinte penekonsiénsia* potĩ, péicha oñeñeʼẽ vaíramo penderehe, umi oñeʼẽva pene kóntrape otĩta, peẽ penderekoporã haguére pesegívo Crístope. 17  Iporãve ningo pehasa asy pejapo haguére iporãva, Ñandejára opermitíramo, pehasa asy rangue pejapo haguére ivaíva. 18  Cristo voi omano una ves ha opa ára g̃uarã umi pekádore, peteĩ hekojojáva omano umi hekojojaʼỹvare, ikatu hag̃uáicha peiko porã jey Ñandejárandi. Haʼe omano yvypóraicha, péro oikove jey espírituicha. 19  Upe rire haʼe oho ha opredika avei umi espíritu oĩvape préso, 20  haʼekuéra naiñeʼẽrendúi vaʼekue Noé tiémpope. Upérõ Ñandejára ipasiénsia ha ohaʼarõ ojejapo aja pe árka*, ha upévape mbovymi tapicha ojesalva, ocho álmante*. Haʼekuéra ojesalva pe árkape, ohóvo hikuái pe y apére. 21  Pe oiko vaʼekue orrepresenta pe vautísmo*, ha upéva rupive koʼág̃a peẽ pejesalva hína (ndahaʼéi oñemopotĩvo pende rete, síno pejerurévo Ñandejárape peteĩ konsiénsia potĩ) Jesucrístope oñemoingove jey haguére. 22  Haʼe oho yvágape ha koʼág̃a oĩ Ñandejára deréchape, ha oñemoĩ ipoguýpe umi ánhel, autoridakuéra ha umi podér.

Nóta

Térã: “peteĩ mbaʼyru ikangyvéva”.
Térã: “pejerure Ñandejárape tovendesi chupekuéra”. Ehecha “Vendisión”, diksionário oĩva ko Bíbliape.
Ehecha Informasión Oĩvéva 1.
Griégope heʼi: “Jehová rova”.
Ehecha “Cristo”, diksionário oĩva ko Bíbliape.
Térã: “imarangatuha”.
Térã: “ani pendepochy rei”.
Ehecha “Konsiénsia”, diksionário oĩva ko Bíbliape.
Térã: “káha”. Kóva haʼe vaʼekue peteĩ várko guasu ojoguáva káhape.
Ehecha “Álma”, Informasión Oĩvéva 7A-pe.
Ehecha “Vautísmo”, diksionário oĩva ko Bíbliape.