Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Pedro 2:1-25

2  Upéicharõ, pemboykete opa mbaʼe vai, japu, tovamokõi, envídia, ha ani ni mbaʼevéicharõ petaky ojuehe.  Umi mitãraʼýicha peheka meme vaʼerã pe kamby ipuroitéva, oúva Ñandejára Ñeʼẽgui, ikatu hag̃uáicha upéva rupive pekakuaa pejesalva hag̃ua,  peẽ pehechakuaáma* rupi ñande Ruvicha imbaʼeporãha.  Peẽ peñemboja ñande Ruvicha rendápe, haʼe ningo peteĩ ita oikovéva, Ñandejára oiporavo vaʼekue ha iporãva chupe g̃uarã, péro umi kuimbaʼekuéra omboyke vaʼekue chupe.  Peẽ haʼe avei ita oikovéva ha Ñandejára espíritu rupive peñemopuʼã hína peteĩ ógaicha, ikatu hag̃uáicha oiko pendehegui saserdóte* marangatu, ha pejapo sakrifísio Ñandejára espíritu poguýpe. Koʼã sakrifísio Ñandejára oguerohory Jesucristo rupive.  Ñandejára Ñeʼẽ heʼígui: “¡Péina! Amoĩ hína Siónpe peteĩ ita ojeporavo vaʼekue, iporãitereíva, haʼéva pe ita iñimportantevéva pe simiéntope. Pe ojeroviáva hese arakaʼeve nombyasymoʼãi ojapo haguére upéva”.  Peẽme g̃uarã haʼe iporãiterei pejeroviágui, péro umi ndojeroviáivape g̃uarã: “Pe ita omboyke vaʼekue umi óga apoha, upéva haʼe hína pe ita iñimportantevéva oĩva pe eskínape”,  ha haʼe avei “peteĩ ita umi hénte oñepysanga hag̃ua hese ha peteĩ ita guasu oporombopochýva”. Haʼekuéra oñepysanga naiñeʼẽrendúigui Ñandejára Ñeʼẽme. Ha ipahápe upéva voi la ohaʼarõva chupekuéra.  Péro peẽ haʼe hína “peteĩ trívu ojeporavopyre, saserdotekuéra oservíva rréiramo, peteĩ tetã marangatu, peteĩ puévlo Ñandejára mbaʼerã, ikatu hag̃uáicha pemombeʼu oparupiete umi mbaʼe porã” ojapo vaʼekue upe penerenóiva pytũmbýgui ha pendeguerúva imbaʼerendy ijojahaʼỹvape. 10  Yma peẽ ndahaʼéi vaʼekue Ñandejára puévlo, péro koʼág̃a haʼéma ipuévlo; yma Ñandejára napendeporiahuverekói vaʼekue, péro koʼág̃a pendeporiahuvereko. 11  Che ermanokuéra pohayhuetéva, peikóva arrivéñoicha ha tetã ambueguáicha ko múndope*, ajerure jey jey peẽme ani hag̃ua peñemeʼẽ pende rete rembipota vaípe, oñorairõva hína pene kóntrape*. 12  Akóinte penderekoporã vaʼerã umi hénte ko mundopegua apytépe, péicha haʼekuéra heʼi jave peẽ haʼeha mbaʼe vai apoha, ohecháta umi mbaʼe porã pejapóva ha upe haguére ombotuicháta hikuái Ñandejárape ág̃a haʼe ou vove ohecha yvyporakuéra rembiapo. 13  Ñande Ruvicha rehehápe, peñemoĩkena entéro umi autorida yvyporakuéra omoĩva poguýpe: tahaʼe peteĩ rréi poguýpe, tuichave haguére pendehegui, 14  térã mburuvichakuéra poguýpe, haʼe omboúva okastiga hag̃ua umi mbaʼe vai apohápe, péro ombotuicha hag̃ua umi ojapóvape iporãva. 15  Ñandejára oipota peẽ pejapo iporãva ikatu hag̃uáicha pemokirirĩ umi kuimbaʼe ndoikuaáivape mbaʼeve ha oñeʼẽreívape. 16  Peẽ ningo peteĩ puévlo orekóva liverta, péro ani peiporu pe liverta pejapo hag̃ua ivaíva. Upéva rangue, peservi Ñandejárape tembiguáiramo. 17  Pemombaʼe opaichagua yvypórape, pehayhu enterove ermánope, akóinte pekyhyje Ñandejáragui, pemombaʼe pe rréipe. 18  Umi tembiguái toñemoĩ ipatronkuéra poguýpe ha torrespeta chupekuéra ipyʼaite guive. Péro ani umi imbaʼeporãva ha horývape* añónte. Síno ojapo vaʼerã avei upéva, jepe hasy omeʼẽ hag̃ua gústo ipatrónpe. 19  Ñandejára oguerohory upe oaguantávape umi hénte opersegi jave chupe ha ohasa asýva iñeʼẽrendúgui* chupe. 20  ¿Mbaʼe iporãva guaʼu piko pejapo oĩramo pendetrata vaíva pepeka haguére ha peẽ peaguanta? Péro pehasa asýramo pejapo haguére iporãva ha peaguanta, upéva iporã Ñandejárape g̃uarã. 21  Añetehápe peẽ peñehenói pesegi hag̃ua ko tape, Cristo* voi ohasa asýgui penderehehápe ha oheja peẽme iñehémplo peguata hag̃ua hekoitépe ipyporére. 22  Haʼe ndopekái vaʼekue ni nombotavýi avavépe heʼíva rupive. 23  Umi hénte ojaʼo vaipárõ guare chupe, haʼe ndojeréi ojaʼo vaipa chupekuéra; ohasa asýrõ guare, haʼe noamenasái umi ombohasa asývape chupe; upéva rangue ohejánte opa mbaʼe upe oporohusgáva tekojojápe kárgope. 24  Oñemosaingóvo chupe yvyráre, haʼe ogueraha ijapére ñande pekádo, ikatu hag̃uáicha jajei ñande pekádo poguýgui ha jaiko jajapo hag̃ua iporãva. Haʼe “ojekutu haguére peẽ ikatu pekuera”. 25  Yma peẽ peiko ovecha okañy vaʼekuéicha, péro koʼág̃a peju jey pe ovecharerekua rendápe, haʼe oñangareko hína pene álma rehe.

Nóta

Griégope heʼi: “petanteáma”.
Ehecha “Saserdóte”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Griégope heʼi: “pene álma kóntrape”. Ehecha “Álma”, Informasión Oĩvéva 7A-pe.
Térã: “noñemohatãiva haʼe heʼívapente”.
Griégope heʼi: “ikonsiénsia rehehápe”. Ehecha “Konsiénsia”, diksionário oĩva ko Bíbliape.
Ehecha “Cristo”, diksionário oĩva ko Bíbliape.