Ehecha oĩva pype

Ehecha oĩva pype

1 Juan 5:1-21

5  Entéro ogueroviáva Jesús haʼeha pe Cristo, haʼe Ñandejára raʼy; ha entéro ohayhúva Ñandejárape, ohayhu Ñandejára raʼykuérape.  Péicha jaikuaa jahayhuha Ñandejára raʼykuérape: jahayhúramo Ñandejárape ha ñakumpli imandamientokuéra.  Jahayhu Ñandejárape heʼise ñakumpli imandamiénto; ha imandamientokuéra ndaipohýiri.  Entéro haʼéva Ñandejára raʼy, ipuʼaka ko múndore*. Ñande ñandepuʼaka ko múndore ñande jerovia rupive.  ¿Mávapa ikatu ipuʼaka ko múndore? ¿Ndahaʼéi piko pe ogueroviáva Jesús haʼeha Ñandejára Raʼy?  Jesucristo hína pe ou vaʼekue y ha tuguy rupive; ndahaʼéi y rupive añónte, síno y ha tuguy rupive. Ha pe espíritu sánto* oikuaauka ko mbaʼe, pe espíritu oikuaauka rupi pe añetegua.  Oĩ hína mbohapy mbaʼe oikuaaukáva mávapa Jesús:  pe espíritu, pe y ha pe tuguy, ha mbohapyvéva oĩ peteĩ ñeʼẽme.  Jagueroviáramo kuimbaʼekuéra heʼíva, Ñandejára heʼíva tuichave hína upévagui; Ñandejára oikuaauka rupi Jesús haʼeha Itaʼýra. 10  Pe ojeroviáva Ñandejára Raʼýre, oguereko ikorasõme umi mbaʼe heʼi vaʼekue chupe Ñandejára. Pe ndogueroviáiva añeteha umi mbaʼe Ñandejára heʼi vaʼekue Itaʼýrare katu, heʼi hese ijapuha. 11  Ha Ñandejára oikuaauka ñandéve ko mbaʼe: haʼe omeʼẽha ñandéve jeikove opaveʼỹva, ha jarresiviha upéva Itaʼýra rupive. 12  Pe ogueroviáva pe Taʼýrape, orresivi jeikove opaveʼỹva, pe ndogueroviáiva Ñandejára Raʼýpe, ndohupytymoʼãi jeikove opaveʼỹva. 13  Ahai peẽme koʼã mbaʼe peikuaa hag̃ua peguerekoha jeikove opaveʼỹva, peẽ pejeroviáva Ñandejára Raʼy rérare. 14  Ha jajeroviakuaa ko mbaʼére: oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta. 15  Avei jaikuaáramo haʼe ohenduha oimeraẽ mbaʼe jajeruréva chupe, jaikuaa katuete omeʼẽtaha ñandéve umi mbaʼe jajeruréva chupe. 16  Pehecháramo pene ermánope opekaha, péro ndahaʼéi peteĩ pekádo oporogueraháva ñemanóme; upéicharõ peñemboʼe vaʼerã hese ha Ñandejára omeʼẽta chupe jeikove. Upéva ikatu pejapo upe pekádo ndahaʼéiramo pe oporogueraháva ñemanóme. Péro oĩ hína peteĩ pekádo ñandegueraháva ñemanóme. Ha che ndaʼéi peẽme peñemboʼe hag̃ua upe ojapóvare peichagua pekádo. 17  Opaichagua tembiapo vai ningo pekádo; péro oĩ peteĩ pekádo nañandegueraháiva ñemanóme. 18  Jaikuaaháicha, entéro haʼéva Ñandejára raʼy ndoikói opeka meme, síno Ñandejára Raʼy* oñangareko hesekuéra ha pe aña ndaikatúi ojagarra chupekuéra. 19  Jaikuaa ningo ñande jajuha Ñandejáragui, péro ko múndo kompletoite oĩ pe aña poguýpe. 20  Ñande katu jaikuaa Ñandejára Raʼy ou hague, ha haʼe ñanepytyvõ ñantende hag̃ua opa mbaʼe, ikatu hag̃uáicha jaikuaa Ñandejára teépe. Itaʼýra Jesucristo rupive ñaime hendive. Añetehápe kóva hína Ñandejára tee ha jeikove opaveʼỹva. 21  Che raʼykuéra pohayhuetéva, peñemomombyrýke umi ñandejára guaʼúgui*.

Nóta

Ehecha “Múndo”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Kóva hína Jesucristo.
Griégope heʼi: “taʼangakuéragui”. Ehecha “Idolatría”, diksionário oĩva ko Bíbliape.